ក្រចេះ ៖ ទោះជាប្រមុខរាជរដ្ឋាភិបាលបានដាក់បញ្ជាមិនឲ្យមានមន្ដ្រីកម្លាំងប្រដាប់អាវុធធ្វើសកម្មភាពដឹកឈើល្មើសច្បាប់យ៉ាងណាក៏ដោយក៏នៅតែមានមន្ដ្រីមួយចំនួនធ្វើសកម្មភាពដឹកឈើយ៉ាងអនាធិបតេយ្យបំផុត ដូចដែលប្រជាពលរដ្ឋរស់នៅស្រុកសំបូរ បានឲ្យដឹងថាលោក ញា ជាមន្ដ្រីកងរាជអាវុធហត្ថស្រុកសំបូរនៅតែបន្ដដឹកឈើល្មើសច្បាប់ជារៀងរាល់ថ្ងៃក្នុងដែលមួយថ្ងៃៗយ៉ាងហោចណាស់លោក ញា ដឹកជញ្ជូនឈើពី បីទៅបួនជើងដោយប្រើមធ្យោបាយដឹកជញ្ជូនតាមរថយន្ដម៉ាក កាមរីឆ្លាមដឹកចេញពីទឹកដីស្រុកសំបូរ ចូលមកទីរួមខេត្ដក្រចេះ ដើម្បីចែកចាយតាមសិប្បកម្មកែច្នៃជាច្រើនកន្លែងនៅភូមិ សង្កាត់ក្រចេះ ក្រុងក្រចេះ ។
ប្រភពមួយទៀតបានឲ្យដឹងថា លោក ញា ថ្លើមធំហ៊ានដឹកឈើទាំងថ្ងៃទាំងយប់បែបនេះ ក៏ដោយសារតែគាត់មានខ្នងបង្អែក ហើយគេមិនដឹងថា លោក ញា ជាមនុស្សដែលរកសេដ្ឋកិច្ចឲ្យលោក អ៊ុំ សុគន្ធា ឬយ៉ាងណានោះឡើយ ទើបលោក អ៊ុំ សុគន្ធា មិនមានវិធានការទប់ស្កាត់កូនចៅរបស់ខ្លួន ។ ប្រជាពលរដ្ឋរស់នៅតាមដងទន្លេ ចាប់ពីស្រុកសំបូរ រហូតដល់ទីរួមខេត្ដក្រចេះ មានការព្រួយបារម្ភយ៉ាងខ្លាំងពីបញ្ហាសុវត្ថិភាពរបស់បងប្អូនប្រជាពលរដ្ឋ ធ្វើចរាចរណ៍លើដងផ្លូវពីព្រោះពេលដែលលោក ញា ធ្វើចរាចរណ៍ដឹកឈើម្ដងៗបើកឡានយ៉ាងលឿន ហើយពួកគាត់ព្រួយបារម្ភថា គង់តែមានថ្ងៃណាមួយ នឹងមានគ្រោះថ្នាក់ចរាចរណ៍កើតឡើងជាមិនខាន ព្រោះផ្លូវខូច ចង្អៀត ហើយលោក ញា បើកឡានលឿនយ៉ាងនេះ។
ប្រជាពលរដ្ឋបានសំណូមពរឲ្យថ្នាក់លើ ជាពិសេសសុំឲ្យអាជ្ញាធរខេត្ដមេត្ដាទប់ស្កាត់ការដឹកជញ្ជូនឈើខុសច្បាប់របស់លោក ញា និងការបើកបរហួសល្បឿនកំណត់នេះផង ។ ពាក់ព័ន្ធនឹងបញ្ហាដែលលោក ញា ដឹកឈើល្មើសច្បាប់ខាងលើនេះកន្លងមកភ្នាក់ងារព័ត៌មានវរជនខ្មែរ ក៏ធ្លាប់បានសុំការបំភ្លឺពីលោក អ៊ុំ សុគន្ធា តាមទូរស័ព្ទផងដែរប៉ុន្ដែលោក អ៊ុំ សុគន្ធា ឆ្លើយថាគាត់ធ្លាប់ដឹងថាលោក ញា ដឹកឈើដែរតែមិនមែនទ្រង់ទ្រាយធំទេត្រឹតែជាកូនក្រឡឹងប៉ុណ្ណោះ ៕
No comments:
Post a Comment
yes