កំពង់ស្ពឺ ៖ ក្រុមកម្មករ-ការិនីរោងចក្រ អានហ៊្វូលហ្គាមេន ជាង៦០០នាក់ បាននាំគ្នាមកតវ៉ាទាមទារលក្ខខណ្ឌការងារចំនួន៥ចំណុច ដែលថៅកែមិនទាន់គោរព តាមច្បាប់ការងារដល់មន្ទីរការងារ និង បណ្តុះបណ្តាលវិជ្ជាជីវៈ ខេត្តកំពង់ស្ពឺ នៅព្រឹកថ្ងៃទី២៦ ខែកញ្ញា ឆ្នាំ២០១២នេះ។
រោងចក្រកាត់ដេរសំលៀកបំពាក់ អានហ៊្វូលហ្គាមេន ដែលកម្មករធ្វើកូដកម្មនេះមានទីតាំងជាប់ផ្លូវជាតលេខ៥១ ស្ថិតក្នុងឃុំសំបូរ ស្រុកសំរោងទង ខេត្តកំពង់ស្ពឺ ត្រូវបានផ្ទុះកូដកម្ម ចាប់តាំងពីថ្ងៃទី១៧ ខែកញ្ញា ឆ្នាំ២០១២ កន្លងមកនេះ ប៉ុន្តែពុំទាន់មានដំណោះស្រាយនោះទេ ។
ក្រុមកម្មករ-ការិនីដែលឈរតវ៉ា នៅមុខមន្ទីរការងារ បានរៀបរាប់ប្រាប់ឲ្យដឹងថា ពួកគាត់នាំគ្នាធ្វើកូដកម្មនេះ ដើម្បីទាមទារលក្ខខណ្ឌការងារចំនួន៥ចំណុច សំខាន់់ៗ ក្នុងនោះ ទី១. សុំឲ្យថៅកែរោងចក្រឧបត្ថម្ភប្រាក់ពេលថ្ងៃត្រង់១៥ដុល្លា ទី២. បើសិនកម្មករធ្វើការងារនៅថ្ងៃឈប់សំរាក ឬ ថ្ងៃបុណ្យ ត្រូវគុណនឹង២ ទី៣. សុំថៅកែផ្តល់ប្រាក់ខែគោល៧០ដុល្លា ទី៤. បើរោងចក្រគ្មានការងារសំរាប់ ឲ្យកម្មករធ្វើ នៅថ្ងៃធម្មតា ឬ ថ្ងៃសំរាក ត្រូវគិតលុយ១០០% មិនត្រូវកាត់នោះទេ និង ទី៥. ត្រូវរៀបចំរោង និង តុសំរាប់កម្មករហូបបាយថ្ងៃត្រង់។ ពួកគាត់បានបន្តថា បើនិយាយពីការតវ៉ានេះវិញ គិតត្រឹមថ្ងៃទី២៦ គឺមានរយៈពេល៩ថ្ងៃគត់ ហើយសហជីព២ផ្សេងគ្នា ដែលចេញមុខដឹកនាំកូដកម្មនេះ ។
ក្រុមកម្មករ-ការិនីបានបញ្ជាក់ថា ពួកគាត់ចាប់ផ្តើមកូដកម្មពីថ្ងៃទី១៧ ខែកញ្ញាដែលមានសហជីព សេរីកម្មករដឹកនាំកូដកម្ម ទាមទារលក្ខខណ្ឌ៦ចំណុច ហើយបានដោះស្រាយបាន២ចំនុច សល់៤ចំណុចទៀតមិនទាន់ឯកភាព ខាងមន្ទីរអស់លទ្ធភាពសម្របសម្រួលក៏បញ្ជូនទៅកាន់ក្រុមប្រឹក្សាអាជ្ញាកណ្តាល តាមនីតិវិធី ។ ក្រោយមកទៀតស្រាប់តែមានសម្ព័ន្ធសហជីព កម្ពុជា បានដឹកនាំកូដកម្មវិញម្តង ទាមទា៥ចំណុចប្រហាក់ប្រហែលគ្នា បន្តមកដល់មន្ទីរការងារ ខេត្តកំពង់ស្ពឺ ។
មន្ត្រីសម្ព័ន្ធសហជីពកម្ពុជាបានថ្លែងថា បន្ទាប់ពីកម្មករ-ការិនីរោងចក្រអានហ៊្វូលហ្គារមេន នាំគ្នាតវ៉ាជាច្រើនថ្ងៃមកនេះ គ្មានដំណោះស្រាយ បែរជាមានដីការក្សាការពាររបស់តុលាការខេត្តកំពង់ស្ពឺចេញថ្ងៃទី២២ ខែកញ្ញា សំរេចបង្គាប់ឲ្យកម្មករ-ការិនីទាំងអស់ត្រូវ ចូលធ្វើការងារធម្មតាវិញ ក្នុងរយៈពេល៤៨ម៉ោង បើមិនដូច្នេះទេចាត់ទុកថា ក្រុមកម្មករបានបោះបង់ចោលការងារ ប៉ុន្តែដោយសារពួកគាត់ជាកម្មករមិនសុខចិត្ត ទើប បន្តការទាមដល់មន្ទីរការងារ បើមិនបញ្ចប់ទៀត នឹង បន្តទៅភ្នំពេញទៀត។
មន្ត្រីជំនាញមន្ទីរការងារខេត្តកំពង់ស្ពឺ ដែលទទួលដោះស្រាយករណីវិវាទនេះ កម្ពុជាថ្មីបានព្យាយាមទាក់ទងតាមទូរស័ព្ទ ដើម្បីសុំការបំភ្លឺប៉ុន្តែមិនមានអ្នកទទួលនោះទេ៕
No comments:
Post a Comment
yes