ក្រុង បាងកកៈ ជម្លោះមួយដែលកំពុងតែកើតមានរវាងរដ្ឋមន្រ្តីហិរញ្ញវត្ថុ លោកគិតទិរ៉ាត់ ណារ៉ាក់ណង និងប្រមុខទីប្រឹក្សារបស់នាយករដ្ឋមន្រ្តី គឺលោកប៉ាន់សាក់ វីនយ៉ារ៉ាត់ បានចង្អុលទៅរកស្ថានភាពមួយដែលគេគិតមិនដល់កាលពីមុន គឺការប្រេះឆាមួយរវាងនាយករដ្ឋមន្រ្តី លោកស្រី យីងឡាក់ និងបងប្រុសរបស់លោកស្រីដែលមានឥទ្ធិពល គឺលោក ថាក់ស៊ីន។
កាសែត The Nation និងបណ្តាញព័ត៌មានអាស៊ី (Asia News Network) បានរាយ ការណ៍ថា មានគេដឹងថា លោកប៉ាន់សាក់កំពុងតែព្យាយាមបណ្តេញលោក គិតទិរ៉ាត់ ដែលជារដ្ឋមន្រ្តីក្រសួងហិរញ្ញវត្ថុ និងជាឧបនាយករដ្ឋមន្រ្តីទទួលបន្ទុកក្រុមសេដ្ឋកិច្ចរដ្ឋាភិបាល។
លោកគិតទិរ៉ាត់ បានបដិសេធដាច់ខាតមិនធ្វើតាមការលើកឡើងពីលោកប៉ាន់សាក់ ដែលបានចាត់ទុកខ្លួនឯងជាទីប្រឹក្សាសេដ្ឋកិច្ចដ៏សំខាន់មួយ រូប។
ក្នុងនាមជាទីប្រឹក្សាជាទីទុកចិត្តម្នាក់ក្នុងចំណោមក្រុម ទីប្រឹក្សារបស់លោកថាក់ស៊ីន លោក ប៉ាន់សាក់ បានដាក់ស្នើសុំវិធានការជាច្រើន សម្រាប់បញ្ហាហិរញ្ញវត្ថុ និងរូបិយប័ណ្ណ។
បន្ទាប់ពីលោកគិតទិរ៉ាត់ ទទួលស្គាល់ចំពោះការនិយាយ«ភូតកុហក»អំពីគោលដៅកំណើនសេដ្ឋកិច្ច ជាតិ វាត្រូវមានពាក្យចចាមអារ៉ាមថា លោកនឹងត្រូវផ្លាស់ចេញ។ ទោះជាយ៉ាងនេះក្តី វាទំនងថា តំណែងទាំងពីររបស់លោក នៅតែមានស្ថិរភាព។
បន្ទាប់មកក៏មានរឿងចម្រូងចម្រាសថ្មីមួយ អ្នកយកព័ត៌មានរដ្ឋាភិបាលមួយក្រុម ត្រូវបានគេថតក្នុងខ្សែវីដេអូមួយកំពុងរិះគន់ការអនុវត្ត របស់លោកគិតទិរ៉ាត់ នៅក្នុងបន្ទប់ព័ត៌មាន។
ក្រោយមក វីដេអូច្បាប់ចម្លងមួយ ត្រូវបានគេបញ្ជូនចេញពីបន្ទប់របស់លោកប៉ាន់សាក់ ទៅការិយាល័យរបស់នាយករដ្ឋមន្រ្តី នៅក្នុងអគារ ថៃ ឃូហ្វា។
វីដេអូខ្លីនេះ ទំនងជាត្រូវគេថតក្នុងបំណងបង្ហាញថា ក្រុមអ្នកយកព័ត៌មាន មិនចាប់អារម្មណ៍នឹងលោក គិតទិរ៉ាត់ទេ ។ នោះគឺជារឿងចុងក្រោយបំផុតនៅក្នុងទង្វើជាច្រើនដែលយករដ្ឋ មន្រ្តីក្រសួងហិរញ្ញវត្ថុរូបនេះ ជាគោលដៅ យ៉ាងជាក់ស្តែង។
ទោះជាយ៉ាងណាក៏ដោយ ក៏លទ្ធផលរហូតមកដល់នឹងពេលនេះ គេស្មានមិនត្រូវនោះទេ យ៉ាងហោចណាស់ក៏សម្រាប់លោក ប៉ាន់សាក់ដែរ។ ក្រុមអ្នកយកព័ត៌មាន បានត្អូញត្អែរអំពី ប្រព័ន្ធផ្សព្វផ្សាយកំពុងត្រូវគេប្រើប្រាស់ជាឧបករណ៍នយោបាយ ហើយលោកស្រី យីងឡាក់ មានការខឹងសម្បាជាខ្លាំង ចំពោះលោក ប៉ាន់សាក់។
សម្រាប់លោកស្រី ភាពចម្រូងចម្រាសវីដេអូឃ្លីបនេះ កំពុងតែបន្ទាបបន្ថោក និងបង្ខូចកិត្តិយស។ អ្នកដែលពាក់ព័ន្ធ ត្រូវបានគេមើលឃើញថា មិនបានគោរពលោកស្រី យីងឡាក់ ក្នុងនាមជា មេដឹកនាំរដ្ឋាភិបាលសោះ។
បន្ទាប់ពីកាន់តំណែងបានជាង១ឆ្នាំ ក្នុងនាម ជាប្រមុខរដ្ឋ លោកស្រី យីងឡាក់ ទំនងជាកាន់តែមានទំនុកចិត្តក្នុងការគ្រប់គ្រងប្រទេស ទោះបីមានគុណវិបត្តិមួយចំនួននៅក្នុងក្រសែភ្នែកក្រុមអ្នករិះគន់ និងអ្នកសង្កេតការណ៍ក្តី។
លោកស្រីទទូចថា លោកគិតទិរ៉ាត់នៅតែប្រមុខសេដ្ឋកិច្ច៕
No comments:
Post a Comment
yes