លោកអូន ព័ន្ធមុន្នីរ័ត្ន នៅក្នុងសន្និសីទកាសែត ពេលវិលត្រឡប់មកដល់
ប្រទេសកម្ពុជាវិញកាលពីម្សិលមិញ
ភ្នំពេញៈ ក្រុមហ៊ុនវិនិយោគចិនមួយមានបំណងមកបណ្តាក់ទុន ២ ពាន់លានដុល្លារ ក្នុងគម្រោងបង្កើតសួនឧស្សាហកម្ម និងរោងចក្រស្លដែកដ៏ធំមួយ នៅខេត្តជាប់មាត់សមុទ្រ ក្នុងប្រទេសកម្ពុជា ដែលមានសមត្ថភាពផលិតដែកចំនួន៣លានតោន ក្នុងមួយឆ្នាំ។ នេះបើយោងតាមមន្ត្រីរដ្ឋាភិបាលថ្លែងកាលពីម្សិលមិញ។
លោក អូន ព័ន្ធមុន្នីរ័ត្ន រដ្ឋលេខាធិការ ក្រសួងសេដ្ឋកិច្ច បានប្រកាសនៅក្នុងសន្និសីទកាសែតមួយ កាលពីម្សិលមិញ នៅពេលលោកនាយករដ្ឋមន្ត្រីហ៊ុន សែន និងគណៈប្រតិភូកម្ពុជា បានវិលត្រឡប់មកពីចូលរួមកិច្ចប្រជុំនៃបណ្តាប្រទេស ចលនាមិនចូលបក្សសម្ព័ន្ធលើកទី ១៦ នៅប្រទេសអ៊ីរ៉ង់ និងពិព័រណ៍ចិន អាស៊ីអឺរ៉ុប នៅសាធារណរដ្ឋប្រជាមានិតថា ក្នុងដំណើរទស្សនកិច្ចនៅប្រទេសចិន ក្រុមហ៊ុនឯកជនចិនមួយឈ្មោះ ឌីឡុង ហូលឌីងគ្រុប បានចូលជួបជម្រាបលោកហ៊ុន សែនថា ក្រុមហ៊ុនវិនិយោគទុនមួយនេះ នឹងជួយបង្កើតការងារនៅក្នុងប្រទេសកម្ពុជា ឲ្យបានដល់ ១ ម៉ឺននាក់។ លោកបាននិយាយថា៖«សួនឧស្សាហកម្មនេះ គឺមានក្រសោបផ្នែកសេវាសម្រួល ផ្នែករោងចក្រផលិតអគ្គិសនី រោងចក្រផលិតនិងកែច្នៃដែកថែបកំពង់ផែសមុទ្រ និងមជ្ឈមណ្ឌលបណ្តុះបណ្តាលធនធានមនុស្ស»។
លោក អូន ព័ន្ធមុន្នីរ័ត្នថ្លែងទៀតថា លោកនាយករដ្ឋមន្ត្រី បានស្វាគមន៍ នូវគម្រោងវិនិយោគទុនដ៏ធំ និងណែនាំឲ្យក្រុមហ៊ុននេះ យកចិត្តទុកដាក់លើបញ្ហាបរិស្ថាន ដោយសារជា«គម្រោងមានលក្ខណៈឧស្សាហកម្មខ្នាតធំ និងមានលក្ខណៈរសើបលើផ្នែកបរិស្ថាន»។ លោកបន្តថា លោកហ៊ុន សែន ណែនាំឲ្យបន្តកិច្ចសហការ ជាមួយមន្ត្រីកម្ពុជា ផ្នែកវិនិយោគ ដើម្បីសម្របសម្រួល លើគម្រោងការដ៏ធំមួយនេះ និង «ណែនាំឲ្យជ្រើសរើសយកទីតាំងសមស្រប តែចៀសឲ្យបាន នូវខេត្តព្រះសីហនុ ដែលរដ្ឋាភិបាលកំណត់ជាតំបន់ទេសចរណ៍ឆ្នេរកម្ពុជា និងជាឆ្នេរអន្តរជាតិ»។
ដោយឡែកក្នុងជំនួបទ្វេភាគី ជាមួយនាយករដ្ឋមន្ត្រីចិន លោក វេន ជាប៉ាវ លោកនាយករដ្ឋមន្ត្រីហ៊ុន សែន បានស្នើសុំឲ្យចិន ផ្តល់នូវកម្ចីសម្បទាន ដើម្បីកសាងហេដ្ឋារចនាសម្ព័ន្ធរូបវន្តនៅប្រទេសកម្ពុជាសម្រាប់ រយៈពេល ៥ ឆ្នាំ មានទឹកប្រាក់ពី «៣០០ ទៅ ៥០០ លានដុល្លារអាមេរិក» ហើយដែលបញ្ហានេះ ត្រូវភាគិចិនឆ្លើបតប «ជាវិជ្ជមាន»។
ក្នុងនោះ ដែរ ប្រទេសចិន ក៏បានប្រកាសផ្តល់ហិរញ្ញប្បទានសម្បទាន ១៥០ លានយ័នថែមទៀត ដល់ប្រទេសកម្ពុជា សម្រាប់ចាត់ចែងប្រើប្រាស់ តាមតម្រូវការក្នុងប្រទេស។ សូមបញ្ជាក់ថា នៅក្នុងឆ្នាំ២០១២ នេះ មានគម្រោងអភិវឌ្ឍន៍ចំនួន ៧ នៅកម្ពុជា ដែលទទួលកម្ចីសម្បទានពីចិន ដែលក្នុងនោះ គម្រោងបួន បានចុះហត្ថលេខារួចមកហើយ ក្នុងទំហំទឹកប្រាក់៤២០ លានដុល្លារ។
ចំពោះបញ្ហាសមុទ្រចិនខាង ត្បូង ភាគីចិន បានវាយតម្លៃខ្ពស់ ចំពោះកម្ពុជា ក្នុងនាមជាប្រធានអាស៊ាន ដើម្បីឲ្យសមាជិកអាស៊ាន បន្តការពិភាក្សាពីបញ្ហានេះ ក្នុងក្របខណ្ឌ«អាស៊ាន និងចិន»។
«ចិន បានបង្ហាញជំហរម៉ឺងម៉ាត់របស់ខ្លួន ក្នុងការចង់ដោះស្រាយបញ្ហា ជាមួយប្រទេសជិតខាង ក្នុងតំបន់ប្រកបដោយសន្តិវិធី តាមមធ្យោបាយការទូត ឈរលើនីតិវិធីច្បាប់ ដើម្បីប្រយោជន៍សន្តិភាព ស្ថិរភាព និងការអភិវឌ្ឍក្នុងតំបន់»។
ដោយឡែកក្នុងជំនួប ទ្វេភាគីរវាងកម្ពុជា និងអ៊ឺរ៉ង់ នៅប្រទេសអ៊ីរ៉ង់ ភាគីទាំងពីរ បានជំរុញកិច្ចសហប្រតិបត្តិការទ្វេភាគី លើផ្នែកសេដ្ឋកិច្ចពាណិជ្ជកម្ម វិនិយោគ និងវប្បធម៌។
វិស័យប្រេង ក៏ត្រូវភាគីទាំងពីរ លើកឡើងផងដែរ ក្នុងជំនួបរវាងលោកហ៊ុន សែន និងលោក ម៉ាមូដ អាម៉ាឌីនេចាដ ប្រធានាធិបតីប្រទេសអ៊ីរ៉ង់ ដែលជាប្រទេសនាំចេញប្រេងច្រើននៅលើពិភពលោក។ លោក អូន ព័ន្ធមុន្នីរ័ត្ន ថ្លែងថា៖«អ៊ីរ៉ង់ មានកិច្ចសហប្រតិបត្តិការខ្លះហើយ ជាមួយយើងក្នុងវិស័យប្រេង ហើយគេនឹងជួយបណ្តុះបណ្តាលមន្ត្រីកម្ពុជាបន្ថែមទៀត»។
ចំពោះកិច្ច ប្រជុំនៃចលនាប្រទេសមិនចូលបក្សសម្ព័ន្ធ ដែលប្រព្រឹត្តនៅប្រទេសប្រទេសអ៊ីរ៉ង ពីថ្ងៃ ៣០ ដល់ថ្ងៃទី ៣១ សីហា លោក នាយករដ្ឋមន្ត្រី ហ៊ុន សែន បានស្នើឲ្យសមាជិកក្រុមចលនានេះទាំងអស់ចំនួន ១២០ ប្រទេស គាំទ្របេក្ខភាពរបស់កម្ពុជា ក្នុងសមាជិកភាព មិនអចិន្ត្រៃយ៍ នៃក្រុមប្រឹក្សាសន្តិសុខអង្គការសហប្រជាជាតិ សម្រាប់ឆ្នាំ ២០១៣-២០១៤ ខាងមុខនេះ៕
No comments:
Post a Comment
yes