បុគ្គលិកផ្នែកលក់ និងបំរើអតិថិជនដែលបំរើការនៅក្នុងក្រុមហ៊ុនទូរស័ព្ទចល័តHello ប្រមាណជិត១០០នាក់បានដាក់ពាក្យបណ្តឹងមួយច្បាប់ជូនរដ្ឋមន្ត្រីក្រសួងការងារកម្ពុជា ប្តឹងតវ៉ានឹងក្រុមហ៊ុនដែលបានចេញគោលការណ៏ថ្មីមួយ ដោយកាត់ប្រាក់ខែគោលរបស់បុគ្គលិក នៅពេលដែលបុគ្គលិកមិនអាចលក់តាមការកំណត់របស់ក្រុមហ៊ុនបាន។
នៅក្នុងពាក្យបណ្តឹងរបស់បុគ្គលិកតវ៉ាចុះថ្ងៃទី ១៣ សីហា ឆ្នាំ ២០១២ដែលភ្នំពេញប៉ុស្តិ័ទទួលបានកាលពីថ្ងៃម្សិលមិញបានលើកឡើងថា គោលការណ៏ថ្មីដែលមានឈ្មោះថា Hellopoint Incentive Scheme Policy និង Sale Commission Policy របស់ក្រុមហ៊ុនHello Axiata Company Limited គឹថា ក្រុមហ៊ុនបានកំណត់អំពីបរិមាណលក់ប្រចាំខែ ក្នុងករណីដែលបុគ្គលិកណាមិនអាចលក់បានបរិមាណកំណត់ទេ បុគ្គលិកនោះនឹងត្រូវបានកាត់ប្រាក់បៀវត្សតាមអត្រាដែលក្រុមហ៊ុនកំណត់។
ពាក្យបណ្តឹងបានបញ្ជាក់ថា ការកាត់ប្រាក់ឈ្នួលរបស់បុគ្កលិកជារៀងរាល់ខែ ដែលមិនបានបំពេញតាមការកំណត់របស់ក្រុមហ៊ុននោះ គឺបានធ្វើឡើងផ្ទុយនឹងខ្លឹមសារនៃកិច្ចសន្យាការងាររវាងបុគ្គលិក និងក្រុមហ៊ុន ពីព្រោះថានៅក្នុងកិច្ចសន្យាបានចែងអំពី«ប្រាក់បៀវត្សប្រចាំខែ» គឺពុំមែនជាការធ្វើការងារម៉ៅការ ឫ«គិតតាមបរិមាណផលិតផលនោះទេ»។
No comments:
Post a Comment
yes