ក្រុមហ៊ុន Samsung Electronics Co បានឲ្យដឹងកាលពីថ្ងៃចន្ទថា ក្រុមហ៊ុនរបស់ខ្លួននឹងស៊ើបអង្កេតក្រុមហ៊ុនចិនចំនួន២៥០ក្រុមហ៊ុន ដែលផលិត ផលិតផលឲ្យក្រុមហ៊ុនកូរ៉េខាងត្បូងមួយនេះ ដើម្បីធានាថាក្រុមហ៊ុនទាំងនោះពុំបានបំពានច្បាប់ពលកម្មទេ បន្ទាប់ពីក្រុមហ៊ុនមួយដែលមានមូលដ្ឋាននៅអាមេរិក បានចោទប្រកាន់ក្រុមហ៊ុនមួយក្នុងចំណោមក្រុមហ៊ុនផ្គត់ផ្គង់របស់ខ្លួនពីបទប្រើប្រាស់ពលកម្មកុមារ។
ក្រុមហ៊ុន Samsung ក៏បានឲ្យដឹងបន្តដែរថា ការធ្វើសវនកម្មរបស់ខ្លួនលើលក្ខខណ្ឌការងារនៅរោងចក្រ HEG Electronics នៅទីក្រុង Huizhou ភាគខាងត្បូងនៃប្រទេសចិន ពុំបានរកឃើញពលករជាកុមារទេ។
អង្គការឃ្លាំមើលពលករចិន ដែលមានមូលដ្ឋាននៅទីក្រុងញូវយ៉ក បានឲ្យដឹងកាលពីខែមុនថា កុមារចំនួន៧នាក់ ដែលមានអាយុក្រោម១៦ឆ្នាំ កំពុងបម្រើការនៅរោងចក្រ ដែលផលិតទូរស័ព្ទ និងម៉ាស៊ីនចាក់ឌីវីឌីឲ្យក្រុមហ៊ុន Samsung ។
តែក្រុមហ៊ុន Samsung បានឲ្យដឹងថា ការធ្វើសវនកម្មខាងលើ បានរកឃើញថា មានករណីគ្រប់គ្រងមិនបានគ្រប់ជ្រុងជ្រោយមួយចំនួន និងករណីអនុវត្តការងារគ្មានសុវត្ថិភាព ដូចជាការធ្វើការងារច្រើនម៉ោងលើសច្បាប់ការងារក្នុងស្រុក វិធានការរក្សាសុវត្ថិភាពមិនសមស្រប និងប្រព័ន្ធផាកពិន័យចំពោះការមកធ្វើការងារមិនទាន់ពេល ឬអវត្តមានពីការងារជាដើម។
ក្រុមហ៊ុន Samsung បានឲ្យដឹងក្នុងសេចក្តីថ្លែងការណ៍មួយថា៖«ក្រុមហ៊ុន Samsung បានទាមទារឲ្យក្រុមហ៊ុន HEG កែលម្អលក្ខខណ្ឌការងាររបស់ខ្លួនជាបន្ទាន់ បើក្រុមហ៊ុន HEG នេះ មិនអាចអនុវត្តតាមគោលនយោបាយគ្មានការលើកលែងរបស់ក្រុមហ៊ុន Samsung លើពលកម្មកុមារទេនោះ ក្រុមហ៊ុន Samsung នឹងផ្តាច់កិច្ចសន្យាជាមួយក្រុមហ៊ុន HEG ភ្លាម»៕
ក្រុមហ៊ុន Samsung បានឲ្យដឹងថា ក្រុមហ៊ុនរបស់ខ្លួន នឹងធ្វើការស៊ើបអង្កេតក្រុមហ៊ុនផ្គត់ផ្គង់របស់ខ្លួនទាំងអស់ចំនួន១០៥ក្រុមហ៊ុននៅប្រទេសចិន ដែលផលិតទំនិញផ្តាច់មុខឲ្យក្រុមហ៊ុន Samsung នៅចុងខែកញ្ញានេះ ព្រមទាំងធ្វើការវាយតម្លៃតាមរយៈឯកសារ នៅចុងឆ្នាំនេះ ព្រមទាំងក្រុមហ៊ុនផ្គត់ផ្គង់ចំនួន ១៤៤នាក់ទៀត ដែលផលិតផលិតផលឲ្យក្រុមហ៊ុនរបស់ខ្លួន និងក្រុមហ៊ុនផ្សេងទៀត។
ក្រុមហ៊ុន Samsung មានប្រសាសន៍ថា៖«បើក្រុមហ៊ុនរកឃើញថាក្រុមហ៊ុនផ្គត់ផ្គង់ណាមួយ រំលោភលើគោលនយោបាយរបស់ខ្លួន ហើយមិនបានចាត់វិធានការកែតម្រូវឲ្យបានត្រឹមត្រូវទេនោះ ក្រុមហ៊ុន Samsung នឹងបញ្ចប់កិច្ចសន្យារបស់ខ្លួនជាមួយនឹងក្រុមហ៊ុនផ្គត់ផ្គង់ទាំងនោះ»៕
No comments:
Post a Comment
yes