ពលរដ្ឋខ្មែរនៅក្រៅប្រទេសជាច្រើន ត្រៀមចូលរួមបាតុកម្មអហិង្សាមួយ នៅមុខទីស្នាក់ការធំរបស់អង្គការសហប្រជាជាតិ (អ.ស.ប) ក្នុងទីក្រុងញីវយ៉ក (New York) នៅថ្ងៃទី១៩ ខែតុលា ឆ្នាំ២០១២។
បាតុកម្មនេះ ធ្វើឡើងដើម្បីទាមទារឲ្យរដ្ឋាភិបាលខ្មែរ គោរពកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ស្ដីពីកម្ពុជា ដែលមានប្រទេសជាច្រើនចុះហត្ថលេខា។
អ្នកវិភាគស្ថានការណ៍នយោបាយកម្ពុជាឯករាជ្យម្នាក់ រស់នៅរដ្ឋម៉ារីឡិន (Maryland) សហរដ្ឋអាមេរិក លោក គុច ចាន់លី មានប្រសាសន៍ថា បាតុកម្មរបស់ពលរដ្ឋខ្មែរនៅមុខអង្គការសហប្រជាជាតិឆ្នាំនេះ ជាការទាមទារមុតមាំជាងឆ្នាំណាៗទាំងអស់ ព្រោះរដ្ឋាភិបាលកម្ពុជា បានរំលោភសិទ្ធិសេរីភាពប្រជាពលរដ្ឋខ្លាំងឡើង ដែលផ្ទុយនឹងកិច្ចព្រមព្រៀងសន្តិភាពក្រុងប៉ារីស ទាំងស្រុង៖ «ខ្មែរយើងកំពុងត្រូវគេរំលោភ គេឈ្លានពាន។ យើងមានសង្ឃឹមទៅលើសន្ធិសញ្ញាសន្តិភាពក្រុងប៉ារីស ហើយនៅក្នុងសន្ធិសញ្ញាក្រុងប៉ារីស នោះ សមាជិកនៃអង្គការសហប្រជាជាតិដែលបានចុះហត្ថលេខានៅក្នុងកិច្ចព្រមព្រៀងនោះ ជួយធ្វើអន្តរាគមន៍ ដើម្បីលើកយកសន្ធិសញ្ញាទីក្រុងប៉ារីស នោះ មកពិនិត្យសាឡើងវិញ ហើយផ្ទៀងផ្ទាត់នូវការរំលោភមកលើបូរណភាពទឹកដីរបស់ខ្មែរយើង។ ហើយម្យ៉ាងទៀត យើងចង់ឲ្យគេសើរើផងដែរអំពីដែនសមុទ្រ»។
លោកបន្តថា សកម្មជនការពារដីធ្លី និងអ្នកនយោបាយនៅកម្ពុជា កំពុងតែបាត់បង់សិទ្ធិសេរីភាព និងរងការគំរាមកំហែងពីសំណាក់រដ្ឋអំណាចបច្ចុប្បន្ន។ លោកសង្ឃឹមថា អង្គការសហប្រជាជាតិ និងប្រទេសហត្ថលេខីទាំងអស់ នឹងពិនិត្យផ្ទៀងផ្ទាត់លើកិច្ចព្រមព្រៀងសន្ធិសញ្ញាក្រុងប៉ារីស ថ្ងៃទី២១ តុលា ឆ្នាំ១៩៩១ ដែលរដ្ឋាភិបាលកម្ពុជា បានចុះហត្ថលេខា។
លោកក៏អំពាវនាវដល់ពលរដ្ឋខ្មែរនៅក្រៅប្រទេសទាំងអស់ ឲ្យចូលរួមច្រើនថែមទៀត៖ «អង្គការសហប្រជាជាតិ និងប៉ូលិសក្រុងញីវយ៉ក អនុញ្ញាតឲ្យយើងធ្វើហ្នឹងហើយ។ ហើយកំពុងតែជូនដំណឹងដល់ប្រជាពលរដ្ឋខ្មែរយើង ហើយយើងមិនភ្លេចទេ មិនចោលទេ។ ហើយនេះជាសេចក្តីសង្ឃឹមមួយដ៏ធំរបស់ប្រជាពលរដ្ឋខ្មែរនៅក្រៅប្រទេស។ ដូច្នេះហើយ ឆ្លៀតក្នុងឱកាសនេះ ខ្ញុំសូមអញ្ជើញបងប្អូនប្រជាពលរដ្ឋខ្មែរទាំងអស់គ្នា ដែលនៅមានទឹកចិត្តអាណិតអាសូរដល់មាតុភូមិរបស់យើង ចូលរួមអំពាវនាវសុំឲ្យអង្គការសហប្រជាជាតិជួយអន្តរាគមន៍របស់យើងផង»។
ចំណែកតំណាងសមាគមខ្មែរនៅទីក្រុងហ្វីឡាដែលហ្វ្យ៉ា (Philadelphia) លោក មាស ជា ដែលនឹងដឹកនាំពលរដ្ឋខ្មែរចូលរួមបាតុកម្មនេះដែរ មានប្រសាសន៍ថា កម្ពុជាមិនអាចបាត់បង់គណបក្សប្រឆាំងនៅក្នុងការបោះឆ្នោតឆ្នាំ២០១៣ នេះទេ។ ពលរដ្ឋខ្មែរនៅក្រៅប្រទេស នឹងទាមទារឲ្យអង្គការសហប្រជាជាតិពិនិត្យស្ថានការណ៍នយោបាយនៅកម្ពុជាឡើងវិញ នូវអ្វីដែលមិនបានអនុវត្តតាមកិច្ចព្រមព្រៀងក្រុងប៉ារីស៖«យើងអំពាវនាវដោយឲ្យប្រទេសហត្ថលេខីមួយចំនួន ដែលបានទទួលស្គាល់សន្ធិសញ្ញាហ្នឹង ជំរុញឲ្យអនុវត្តនូវសន្ធិសញ្ញាហ្នឹងឲ្យបានមួយរយភាគរយ។ ជាក់ស្ដែង នៅពេលថ្មីៗនេះ គឺបញ្ហាអត់មានគណបក្សប្រឆាំងចូលរួមនៅក្នុងការបោះឆ្នោត»។
បាតុកម្មនឹងធ្វើឡើងនៅថ្ងៃសុក្រ ទី១៩ ខែតុលា ចាប់ពីម៉ោង ៩ព្រឹក រហូតដល់ម៉ោង ៣រសៀល នៅមុខទីស្នាក់ការអង្គការសហប្រជាជាតិ ក្នុងទីក្រុងញីវយ៉ក។ បាតុករពី ដែលបានត្រៀមចូលរួម មានដូចជាពីរដ្ឋម៉ារីឡិន (Maryland) រ៉ូដអាយឡិន (Rhode Island) ប៉ែនស៊ីលវ័ញ៉ា (Pennsylvania) វឺហ្យីនា (Virginia) ញីវជ័រស៊ី (New Jersey) ញីវយ៉ក (New York) ណតការ៉ូឡាញណា (North Carolina) និងពីប្រទេសកាណាដា (Canada) ផងដែរ។
បាតុកម្មនោះ រៀបចំ និងដឹកនាំដោយលោក ដួង ម៉ែខល (Michael Duong) រស់នៅរដ្ឋម៉ារីឡិន៕
No comments:
Post a Comment
yes