ភ្នំពេញៈ កម្មករកាត់ដេរជិត២០០នាក់នៅរោងចក្រចំនួនពីរក្នុងរាជធានីភ្នំពេញ បានដួលសន្លប់កាលពីចុងសប្តាហ៍។ កម្មករនិងសហជីពបាននិយាយថា ការដួលសន្លប់នេះគឺបណ្តាលមកពីជាតិគីមីដែលគេបាញ់ទៅលើ ក្រណាត់របស់រោងចក្រ ប៉ុន្តែភាគីរោងចក្រនិយាយថា គឺបណ្តាលមកពីបរិយាកាសក្នុងរោងចក្រ។
អ្នកនាង អ៊ំ លីណា មន្រ្តីសហជីពសេរីកម្មករ បានថ្លែងកាលពីម្សិលមិញថា មានកម្មករជាង ១០០នាក់នៅរោងចក្រ Hi Fashion Co. Ltd ក្នុងខណ្ឌសែនសុខ រាជធានីភ្នំពេញ បានដួលសន្លប់រយៈពេលពីរថ្ងៃ។
អ្នកនាងថ្លែងបន្តថា ៖ «កម្មករបានប្រាប់ខ្ញុំកាលពីថ្ងៃសុក្រថា ពួកគេធំក្លិនជាតិគីមីបាញ់ទៅលើសាច់ក្រណាត់ ដែលជាមូលហេតុបណ្តាលឲ្យពួកគេដួលសន្លប់បន្តបន្ទាប់គ្នា»។
អ្នកនាងបានថ្លែងបន្តទៀតថា កម្មករនៅរោងចក្រ Hi Fashion បានដួលសន្លប់រយៈពេលបីដង នៅពេលព្រឹកម្តង ពេលរសៀលម្តង និងពេលល្ងាចម្តង ហើយបន្ទាប់មកពួកគេត្រូវបញ្ជូនទៅមន្ទីរពេទ្យរដ្ឋ និងគ្លិនិកឯកជនដើម្បីជួយសង្គ្រោះ។
អ្នកនាង អ៊ំ លីណា បានបញ្ជាក់ទៀតថា មានមូលហេតុចំនួនពីរដែលបានបណ្តាលឲ្យកម្មករដួលសន្លប់ ទីមួយគឺបណ្តាលមកពីធំក្លិនជាតិគីមីពីសាច់កំណាត់ និងទីពីរដោយសាររោងចក្រមិនបានសែនម្ហូបអាហារឲ្យអ្នកតាក្នុង អំឡុងសែនក្បាលទឹក។
អ្នកនាងបានបន្តថា៖ «សហជីពរបស់យើងនឹងបន្តធ្វើការស៊ើបអង្កេតលើករណីដួលសន្លប់ នេះ ហើយបញ្ជូនរបាយការណ៍ ទៅមន្រ្តីរដ្ឋាភិបាល និងក្រសួងពាក់ព័ន្ធដើម្បីឲ្យពួកគេគ្រប់គ្រងស្ថានភាពនៃការ ដួលសន្លប់របស់កម្មករ»។
កម្មករនៅរោងចក្រ Hi Fashion ដែលសុំមិនបញ្ចេញឈ្មោះ បានថ្លែងកាលពីម្សិលមិញដែរថា បងប្អូនរបស់នាងបានដួលសន្លប់យ៉ាងធ្ងន់ធ្ងរ កាលពីថ្ងៃសុក្រ ហើយមិនទាន់ធូរស្បើយនៅឡើយទេ មកដល់ពេលនេះ។
នាងបន្តទៀតថា៖ «ខ្ញុំបានបញ្ជូនបងប្អូនស្រីរបស់ខ្ញុំទៅមន្ទីរពេទ្យព្រះ កុសុមៈដើម្បីទទួលការព្យាបាល និងបានសម្រាកនៅមន្ទីរពេទ្យនោះអស់មួយយប់ ទើបបាននាំយកនាងមកផ្ទះវិញ កាលពីថ្ងៃសៅរ៍។ គ្រូពេទ្យបានព្យួរសេរ៉ូមឲ្យនាងប្រហែល៧ផ្លោក ហើយនៅផ្ទះយើងបានដាក់សេរ៉ូមឲ្យនាងបន្ថែមទៀត ប៉ុន្តែ នាងមិនទាន់ក្រោកដើរបាននៅឡើយ»។
នាងបន្តទៀតថា បងប្អូនរបស់នាងបានទៅធ្វើការកាលពីថ្ងៃសៅរ៍ ប៉ុន្តែ មានកម្មករប្រហែល៥០នាក់ បានបន្តដួលសន្លប់ជាថ្មីម្តងទៀត។
កម្មការិនី រូបនេះ បានអះអាងទៀតថា៖ «មានកម្មករជាង១០០នាក់ បានដួលសន្លប់ក្នុងរយៈពេលពីរថ្ងៃនៅរោងចក្ររបស់ខ្ញុំ។ បរិស្ថាននៅក្នុងរោងចក្រមានភាពអាប់អួ ក្តៅ និងធំក្លិនអាក្រក់ពីកំណាត់»។ នាងបានបន្ថែមទៀតថា នាងបានប្រាប់ទៅមន្រ្តីរោងចក្រកាលពីរបីថ្ងៃមុន ពីមុនពេលកម្មករដួលសន្លប់ អំពីការធំក្លិនពីក្រណាត់ដែលបានឲ្យអ្នកនាងមានសុខភាព ខ្សោយ ប៉ុន្តែ រោងចក្រមិនខ្វល់នឹងអ្វីដែលនាងបានប្រាប់គេនោះទេ។
នាង បន្តថា ៖ «ខ្ញុំចង់ស្នើសុំឲ្យរោងចក្ររៀបចំបន្ទប់ការងារឲ្យមាន ខ្យល់អាកាសគ្រប់គ្រាន់និងមិនត្រូវផ្តល់ការងារច្រើនហួសឲ្យ កម្មករនោះទេ និងមិនត្រូវបង្ខំកម្មករឲ្យធ្វើការងារថែមម៉ោង»។ «ខ្ញុំបារម្ភថា ការដួលសន្លប់នឹងកើតមានទៀតនៅពេលយើងចូលធ្វើការវិញ»។
លោក ហេង វីរៈ ប្រធានរដ្ឋបាលនៅរោងចក្រ Hi Fashion Co., Ltd បានថ្លែងពីម្សិលមិញថា មូលហេតុដែលកម្មករដួលសន្លប់ គឺដោយសារតែពុំមានខ្យល់អាកាសចេញចូលគ្រប់គ្រាន់នៅក្នុងរោង ចក្រ។
លោកបានបន្តថា៖ «ដោយសារបរិយាកាសនៅក្នុងរោងចក្រមិនល្អ និងអាប់អួ ទើបបានបណ្តាលឲ្យកម្មករដួលសន្លប់ ប៉ុន្តែឥឡូវនេះ យើងកំពុងរៀបចំកន្លែងការងារ ដោយដាក់កង្ហារច្រើនជាងមុន និងធ្វើការសម្អាតនៅក្នុងរោងចក្រ»។ លោកបន្ថែមថា វាគ្មានធំក្លិនជាតិគីមីនៅក្នុងរោងចក្រនោះទេ។
លោក អះអាងថា រោងចក្រមិនជឿលើអបិយជំនឿទេ ប៉ុន្តែ រោងចក្រ នឹងសែនម្ហូបអាហារឲ្យអ្នកតានៅរក្សាក្នុងរោងចក្រ។
លោកបន្តទៀតថា ៖ «យើងបានឲ្យកម្មកឈប់សម្រាកការងារ ហើយពួកគេនឹងចូលធ្វើការវិញនៅថ្ងៃអង្គារ»។
លោក ប៉ុក វ៉ាន់ថាត ប្រធាននាយកដ្ឋានពេទ្យការងារ នៃក្រសួងការងារ បានថ្លែងថា បុព្វហេតុដែលបណ្តាលឲ្យមានការដួលសន្លប់នេះ មិនមែនមកពីការពុលនោះទេ ប៉ុន្តែ គឺដោយសារសុខភាពរបស់កម្មករនិងខ្យល់អាកាសចេញចូលនៅក្នុងរោងចក្រមិនគ្រប់គ្រាន់។
ទន្ទឹមនេះ កម្មករចំនួន ៣៦ នាក់រោងចក្រ Conpress Holding Industrial Co., Ltd. ក្នុងខណ្ឌមានជ័យ រាជធានីភ្នំពេញ ក៏បានដួលសន្លប់ដែរ កាលពីថ្ងៃព្រហស្បតិ៍ និងថ្ងៃសុក្រ។
កម្មការិនី មាស សុផល បានថ្លែងកាលពីម្សិលមិញថា កាលពីថ្ងៃព្រហស្បតិ៍ មានកម្មករ ២៩នាក់ បានដួលសន្លប់ បន្ទាប់មក មានកម្មករចំនួន៧នាក់បន្ថែមទៀតបានដួលសន្លប់។
នាងបន្តថា ៖ «មូលហេតុនៃការដួលសន្លប់នេះ គឺដោយសារតែខ្យល់អាកាសអាប់អួ ក្តៅ និងក្លិនអាក្រក់នៅក្នុងកន្លែងការងារ»នាងថា កម្មករនឹងចូលធ្វើការវិញនៅថ្ងៃចន្ទ៕
No comments:
Post a Comment
yes