(រូបភាពពី បាងកកប៉ុស្ដិ៍)
មេដឹកនាំបាតុករនៅទីក្រុងបាងកកមកពីគណបក្សប្រឆាំង លោក ស៊ូថេប ថងស៊ូបាន ថ្លែងថា លទ្ធផលនៃបាតុកម្មដែលកំណត់លើវាសនារដ្ឋាភិបាលរបស់លោកស្រី យីងឡាក់ ថា ត្រូវចុះចេញពីតំណែង ឬបន្តគ្រប់គ្រងទៀតនោះ នឹងត្រូវបង្ហាញនៅថ្ងៃចន្ទ ដើមសប្តាហ៍ក្រោយនេះ។
លោក ស៊ូថេប ថ្លែងប្រាប់បាតុករនៅយប់ថ្ងៃសុក្រម្សិលមិញថា នៅថ្ងៃចន្ទជាថ្ងៃតវ៉ាបង្ហាញលទ្ធផលចុងក្រោយ។ លោក ក៏បានអំពាវនាវឲ្យប្រជាពលរដ្ឋគ្រប់ច្រកល្ហកទូទាំង ប្រទេសចាប់ផ្តើមចេញមុខតវ៉ានៅតាមផ្លូវឲ្យបានទាំងអស់គ្នានៅថ្ងៃចន្ទ ដើម្បីទាមទារឲ្យលោកស្រី យីងឡាក់ ចុះចេញពីតំណែង និងបញ្ចប់ការដឹកនាំដែលមានជាប់ខ្សែស្រាឡាយរបស់លោក ថាក់ស៊ីន។ នេះបើតាមការចុះផ្សាយរបស់បណ្តាញសារព័ត៌មានបាងកកប៉ុស្តិ៍។
លោក ស៊ូថេប បញ្ជាក់ថា ការតវ៉ាថ្ងៃចន្ទ ជាការតស៊ូស្លាប់រស់ចុងក្រោយ ហើយលោកបញ្ជាក់ថា ប្រសិនបើការតវ៉ាទម្លាក់លោកស្រី យីងឡាក់ ពីនាយករដ្ឋមន្ត្រីបរាជ័យនោះ លោក នឹងប្រគល់ខ្លួនទៅសមត្ថកិច្ចចាប់ដោយមិនរត់គេចទេ។
មេដឹកនាំបាតុករនៅទីក្រុងបាងកកលោក ស៊ូថេប ថងស៊ូបាន មកពីគណបក្សប្រឆាំងត្រូវតុលាការក្រុងបាងកកចេញដីកាចាប់ខ្លួនពីរលើករួចមកហើយ ទាក់ទងបទចោទដឹកនាំ បាតុកម្មបង្កភាពចលាចលក្នុងសង្គម។
ការតវ៉ានៅទីក្រុងបាងកក ដើម្បីទម្លាក់លោកស្រី យីងឡាក់ ចេញពីតំណែងចាប់ពី ខែវិច្ឆិកាមក បានបណ្តាលឲ្យមនុស្ស៤នាក់ស្លាប់ និងជាង២០០នាក់ផ្សេងទៀតរងរបួស។ ក្នុងពេលបាតុកម្ម បាតុករបានចូលលុកលុយក្រសួងសំខាន់របស់រដ្ឋ រួមមាន ក្រសួងមហាផ្ទៃ ក្រសួងហិរញ្ញវត្ថុ ក្រសួងទេសចរណ៍ រួមទាំងវិមានរដ្ឋាភិបាលផងដែរ៕
No comments:
Post a Comment
yes