ក្រចេះ៖ ឈើបេង ប្រមាណជាចំនួន ៥៤ ដុំ ត្រូវបានកម្លាំងជំនាញផ្នែករដ្ឋបាលព្រៃឈើក្រចេះ និងផ្នែករដ្ឋបាលព្រៃឈើ ស្រុកព្រែកប្រសព្វ រួមសហការណ៍ជាមួយកម្លាំងសមត្ថកិច្ចពាក់ព័ន្ធ រឹបអូសបាន កាលពីថ្ងៃទី២៥ ខែកញ្ញា ឆ្នាំ២០១២ បន្ទាប់ពីក្រុមឈ្មួញទុច្ចរិតបម្រុងនឹងលួចស៊ីដាច់។
មន្ត្រីរដ្ឋបាលព្រៃឈើខេត្ត បាននិយាយឲ្យដឹងថា ឈើបេង ចំនួន ៥៤ ដុំនេះ ត្រូវបានកម្លាំងជំនាញសហការណ៍ជាមួយកម្លាំងអាជ្ញាធរដែនដី ធ្វើការបង្ក្រាបបាន បន្ទាប់ពីលោកបានទទួលព័ត៌មានពីការដឹកជញ្ជូនឈើល្មើសច្បាប់ពីសំណាក់ក្រុមឈ្មួញ ដែលប្រកបរបរដឹកជញ្ជូនឈើខុសច្បាប់។
លោកបានឲ្យដឹងទៀតថា ឈើមួយទូក ដែលបង្ក្រាបបាននេះ មាន ចំនួន ៥៤ ដុំ គឺជាប្រភេទឈើបេងទាំងអស់ ហើយមានមុខកាត់ធំៗ ប្រវែង ១ ម៉ែត្រ ទៅ ២ ម៉ែត្រ គឺជាប្រភេទឈើត្រូវប៉ាន់ មានតំម្លៃខ្ពស់នាពេលបច្ចុប្បន្ន។ មន្ត្រីរូបនេះ បាននិយាយទៀតថា ចាប់តាំងពីទឹកទន្លេរមេគង្គចាប់ផ្តើមឡើង គឺងាយស្រួលក្នុងការចរាចរណ៍ឈើល្មើសច្បាប់តាមទូក តាមក្បួន ហើយការដឹកជញ្ជូននេះ គឺពួកឈ្មួញច្រើនធ្វើឡើងនៅពេលយប់។
ប្រភពព័ត៌មាន ចេញពីស្រុកសំបូរ បានខ្សឹបប្រាប់ថា ម្ចាស់ឈើបេង ចំនួន ៥៤ ដុំ ខាងលើនេះ មានម្ចាស់ ឈ្មោះ ចេត ហៅ ជ្រេស និងប្រពន្ធ ឈ្មោះ មុំ ជាខ្មែរអ៊ីស្លាម រស់នៅស្រុកសំបូរ ខេត្តក្រចេះ។ ប្រភពបានបន្តឲ្យដឹងទៀតថា ឈ្មួញឈើទាំង ២ នាក់ ប្តីប្រពន្ធនេះ បានប្រកបមុខរបររកស៊ីជួញឈើប្រណិតខុសច្បាប់ជាយូរមកហើយ តែកន្លងមកមានមន្ត្រីជំនាញមួយចំនួន បានឃុបឃិបបិទបាំង ទើបតែពេលនេះ ត្រូវជាប់អន្ទាក់របស់មេព្រៃផ្នែកក្រចេះ និងផ្នែកព្រែកប្រសព្វ។
គួរបញ្ជាក់ថា លោក ចេត ហៅ ជ្រេស នេះ បានប្រកបមុខរបរដឹកឈើដុះស្លែមកហើយ ក៏ប៉ុន្តែ មួយរយៈក្រោយមកនេះ ប្រពន្ធជាអ្នកចេញមុខរកម្តង ដោយប្តីនៅពីខាងក្រោយ។ ហើយក្នុងយុទ្ធនាការចុះបង្ក្រាបបទល្មើសព្រៃឈើខុសច្បាប់ខាងលើ សមត្ថកិច្ចពុំបានឃាត់ខ្លួនជនណាម្នាក់យកមកផ្តន្ទាទោសតាមច្បាប់រដ្ឋបាលព្រៃឈើនោះទេ ទោះជាសមត្ថកិច្ចទាំងនោះ ស្គាល់ម្ចាស់ឈើក៏ដោយ គឺក្រាន់តែចាប់រឹបអូសតែឈើប៉ុណ្ណោះ។ ចំណែកឈើបេង ចំនួន ៥៤ ដុំ ត្រូវបានកម្លាំងជំនាញរដ្ឋបាលព្រៃឈើក្រចេះ នាំយកទៅរក្សាទុកនៅថ្នាលបណ្តុះកូនឈើខ្សារ៕
No comments:
Post a Comment
yes