ផ្លេកបន្ទរ ក្នុងទីក្រុងភ្នំពេញ
បុរសកសិករម្នាក់ទៀតបានស្លាប់ដោយសាររន្ទះបាញ់ នៅថ្ងៃពុធនេះ នៅខេត្តបាត់ដំបង ខណៈកំពុងភ្ជួរស្រែពេលភ្លៀងធ្លាក់ ដែលធ្វើឲ្យចំនួនអ្នកស្លាប់ដោយរន្ទះនេះបានកើនរហូតដល់ ៩២នាក់ ក្នុងរយះ ពេលជិត៩ខែ ក្នុងឆ្នាំនេះ ប៉ុន្តែចំនួននេះមានការថយចុះ បើប្រៀបនឹងរយះពេល៨ ខែ ឆ្នាំមុនមានចំនួន១៤៦នាក់។
លោក ពុទ្ធ ថាន់ នាយប៉ុស្តិ៍នគរបាលគោកឃ្មុំ បានឲ្យដឹងថា បុរសដែលរន្ទះបាញ់ស្លាប់មានឈ្មោះ សៀង គង់ អាយុ៣៥ឆ្នាំ។លោកថា ជនរងគ្រោះស្លាប់ ខណៈកំពុងបើកគោយន្តភ្ជួរស្រែពេល មេឃភ្លៀងផ្គរខ្លាំង កាលពីវេលាម៉ោង៩ព្រឹកថ្ងៃទី២៦ ខែកញ្ញា ឆ្នាំ២០១២ នៅចំណុចអូរព្រែកខាងត្បូងភូមិចំងាយ១គីឡូម៉ែត្រ ឋិតក្នុងភូមិឆ្កែកូនឃុំគោកឃ្មុំ ស្រុកថ្មគោល ខេត្តបាត់ដំបង។
បើតាមលោក កែវ វី នាយកខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយបានថ្លែងប្រាប់ភ្នំពេញប៉ុស្តិ័នៅថ្ងៃនេះថា រន្ទះបាញ់បានសម្លាប់មនុស្ស ៩១នាក់ ក្នុងរយះពេល ៨ខែក្នុងឆ្នាំ ២០១២នេះ ដែលចំនួននេះវាបានថយប្រហែល ៣៧ភាគរយ បើប្រៀបធៀបនឹងរយះពេលដូចគ្នា កាលពីឆ្នាំទៅ ដែលមានអ្នកស្លាប់រហូតដល់ទៅ ១៤៦នាក់។
លោកបន្ថែមថា រន្ទះបាញ់ក្រៅពីបង្កឲ្យមានមនុស្សស្លាប់ វាបានបង្កឲ្យមនុស្ស៦៩នាក់ផ្សេងទៀតរងបបួស និង គោក្របីចំនួន ៣២ក្បាលត្រូវបានស្លាប់។ លោកបន្តថា គ្រោះកាចរន្ទះបាញ់ច្រើនកើតឡើងនៅតាមទីជនបទ ជាពិសេលកើតឡើងនៅពេលរដូវធ្លាក់ភ្លៀង។
លោកបានបញ្ជាក់មូលហេតុនៃការធ្លាក់ចុះចំនួនអ្នកស្លាប់ដោយសាររន្ទះបាញ់ក្នុងឆ្នាំនេះថា៖« ពេលវេលាធ្លាក់ភ្លៀងដែលបង្កឲ្យមានផ្គររន្ទះមានការប្រែប្រួល មានន័យថា កើតមានគ្រោះរាំងស្ងួត ការផ្សព្វផ្សាយអំពីគ្រោះថ្នាក់ និងការការពារអំពីរន្ទះដល់ប្រជាពលរដ្ឋបានទូលំទូលាយ និងការប្រុងប្រយ័ត្នខ្ពស់ ដោយខ្លួនឯងរបស់ប្រជាពលរដ្ឋ គឺជាកត្តាដែលធ្វើឲ្យការស្លាប់មានការថយចុះយ៉ាងដូច្នេះ»។
រន្ទះបាញ់បានសម្លាប់មនុស្សចំនួន ១៦៥នាក់ និងបង្ករបួសចំនួន ១៣៩នាក់ កាលពីអំឡុងឆ្នាំ២០១១កន្លងទៅ។
No comments:
Post a Comment
yes