ភ្នំពេញៈ អង្គការឃ្លាំមើលការបោះឆ្នោត ខុម ហ្វ្រែល បានចេញរបាយការណ៍បឋមមួយកាលពីថ្ងៃអង្គារស្តីពីការចុះឈ្មោះអ្នក បោះឆ្នោត ដោយបានរិះគន់ថា ដំណើរការនៃការចុះឈ្មោះអ្នកបោះឆ្នោត មានភាពមិនប្រក្រតីខ្លះ ហើយបានបន្ទោសលើគណៈកម្មាធិការជាតិរៀបចំការបោះឆ្នោត(គ.ជ.ប) ថាខ្វះការទទួលខុសត្រូវ។
ផ្អែកតាមរបាយការណ៍ ដែលភ្នំពេញ ប៉ុស្តិ៍ ទទួលបានម្សិលមិញ COMFREL អះអាងថា ឃុំជិត២៥០ ដែលខ្លួនដាក់ភ្នាក់ងារសង្កេតការណ៍ បានរកឃើញថា មានតែគណបក្សប្រជាជនកម្ពុជា ទេ ដែលមានមេឃុំ/ចៅសង្កាត់ ជាក្រុមប្រឹក្សាឃុំ/សង្កាត់ បានរៀបចំការចុះឈ្មោះបោះឆ្នោត ហើយក៏បានដាក់ពង្រាយក្រុមសង្កេតការណ៍របស់ខ្លួនផងដែរ។
របាយការណ៍កត់សម្គាល់ថា ៖«សមាជិកក្រុមប្រឹក្សាមកពីបក្សប្រឆាំងត្រូវគេរារាំងមិនឲ្យ ចូលរួមដំណើរការចុងក្រោយបំផុតនៃការចុះបញ្ជីឈ្មោះអ្នកបោះឆ្នោត ព្រោះ សមាជិកទាំងនេះ មិនបានទៅចុះឈ្មោះជាអ្នកសង្កេតការណ៍»។
ខុម ហ្វ្រែលបញ្ជាក់ថា បក្សប្រឆាំងសមរង្ស៊ី និងបក្សសិទ្ធិមនុស្ស មានតំណាង ២៩៥៥នាក់ ដែលជាប់ឆ្នោតនៅក្នុងការបោះឆ្នោតឃុំ-សង្កាត់ គួរតែមានតួនាទី ក្នុងការឃ្លាំមើលការចុះឈ្មោះអ្នកបោះឆ្នោត ដើម្បីធានាថាមន្រ្តីទទួលខុសត្រូវការងារនេះ បានអនុវត្តត្រឹមត្រូវស្របតាមច្បាប់និងនីតិវិធីនៃការចុះឈ្មោះ ដែរទេ។
ខុម ហ្វ្រែលរកឃើញថា មានឃុំសង្កាត់ ចំនួន៥ មានភាពមិនប្រក្រតីនៅក្នុងដំណើរការនៃការចុះឈ្មោះអ្នកបោះឆ្នោត មានរាជធានីភ្នំពេញ ខេត្តប៉ៃលិន កណ្តាល កោះកុង និងខេត្តសៀមរាប។ របាយការណ៍នេះថា ឃុំ-សង្កាត់ទាំងនោះ មិនបំពេញតួនាទីខ្លួនឲ្យបានសមស្របទេ។ មន្រ្តីខ្លះ មិនបានបំពេញភារកិច្ចចុះឈ្មោះប្រជាពលរដ្ឋ ហើយធ្វើឲ្យបាត់ឈ្មោះពលរដ្ឋជាច្រើន។ សម្រាប់ខេត្តរតនគិរីវិញខុម ហ្វ្រែលរកឃើញថា នៅឃុំម៉ាលិក ស្រុកអន្លង់មាស ស្មៀនឃុំ បានយកលុយពីប្រជាពលរដ្ឋដែលមកចុះឈ្មោះចាប់ពី២ពាន់រៀល ដល់១ម៉ឺនរៀល សម្រាប់មនុស្សម្នាក់ ប៉ុន្តែប្រាក់នោះត្រូវបានគេប្រគល់ឲ្យមកវិញ បន្ទាប់ពីមានអន្តរាគមន៍ពីសមាជិកក្រុមប្រឹក្សាឃុំ។
អគ្គលេខាធិការ គ.ជ.ប.លោក ទេព នីថា ច្រានចោលរបាយការណ៍ខុម ហ្វ្រែលថា របាយការណ៍នេះមិនពិត ដោយសារថា ក្រុមសង្កេតការណ៍ខុម ហ្វ្រែល យឺតយ៉ាវក្នុងការដាក់ពាក្យសុំទៅគ.ជ.ប. សម្រាប់សង្កេតការណ៍ក្នុងដំណើរការចុះឈ្មោះអ្នកបោះឆ្នោត ព្រោះដំណើរការនៃការចុះឈ្មោះអ្នកបោះឆ្នោត ចាប់ផ្តើមពីថ្ងៃទី១ ខែកញ្ញា ហើយខុម ហ្វ្រែលចាប់ចុះសង្កេតការណ៍ចាប់ពីថ្ងៃទី៦ ខែកញ្ញា ប៉ុន្តែរបាយការណ៍នេះ រៀបរាប់ពីថ្ងៃទី១-២ ខែកញ្ញា។
លោក ទេព នីថា ថា ៖«ខុម ហ្វ្រែល បានទៅយកប័ណ្ណអ្នកសង្កេតការណ៍ ដែលធ្វើការក្នុងឃុំកាលពីថ្ងៃទី៦-៧ ខែកញ្ញា។ ប៉ុន្តែរបាយការណ៍គាត់លើកឡើងពីថ្ងៃទី១-២ កញ្ញា តើគាត់បានរបាយការណ៍ពីណា? ខ្ញុំ គិតថា របាយការណ៍នេះមិនគួរឲ្យជឿទេ»។
ទន្ទឹមគ្នានេះដែរ គ.ជ.ប បានអញ្ជើញតំណាងស្ថានទូតជាង១០ប្រចាំនៅកម្ពុជា ចូលរួមកិច្ចប្រជុំកាលពីថ្ងៃម្សិលមិញដោយបង្ហាញពីព័ត៌មានចុង ក្រោយបំផុតអំពីការកែប្រែបញ្ជីអ្នកបោះឆ្នោត និងការចុះឈ្មោះអ្នកបោះឆ្នោត ក្នុងដំណើរការនៃការចុះឈ្មោះអ្នកបោះឆ្នោត។
ថ្លែងទៅកាន់ តំណាងស្ថានទូតចំនួន១៣ ដែលរួមមានស្ថានទូតអាមេរិក អង់គ្លេស បារាំង ... អ្នកស្រី ស៊ីន ជុំបូរ អនុប្រធានគ.ជ.ប ថ្លែងថា ចាប់ពីឆ្នាំ២០០២ ដើម្បីរៀបចំពិនិត្យបញ្ជីឈ្មោះអ្នកបោះឆ្នោតនិងការចុះឈ្មោះអ្នក បោះឆ្នោត ប្រចាំឆ្នាំ គ.ជ.ប. បានផ្ទេរអំណាចទៅឲ្យ ក្រុមប្រឹក្សាគ្រប់ឃុំ-សង្កាត់ ស្មៀន និងជំនួយការចាត់តាំងធ្វើការងារនេះ។
អ្នកស្រី បន្ដថា ៖ «គោលបំណង(នៃកិច្ចប្រជុំ)ដែលបានធ្វើនៅព្រឹកនេះ ដើម្បីប្រាប់សហគមន៍អន្តរជាតិថា ពួកគេកំពុងតែធ្វើការនៅក្នុងប្រទេសយើង ហើយចង់ដឹងអំពីការបោះឆ្នោតនៅក្នុងប្រទេសរបស់យើង»៕
No comments:
Post a Comment
yes