ខេត្តក្រចេះ៖ បទល្មើសព្រៃឈើនៅតែមានយ៉ាងពេញបន្ទុក នៅក្នុងសង្កាត់រដ្ឋបាលព្រៃឈើថ្មគ្រែ ដោយអស់លោកមេព្រៃបិទស្នាក់ការចោល មិនព្រមលៃលកចាត់វិធានការបង្រ្កាបរាល់បទល្មើស ដែលកំពុងតែកើតមាននាពេលបច្ចុប្បន្ននេះ។
ដោយយោងតាមប្រភពពត៌មាន ពីឃុំថ្មគ្រែបានប្រាប់ឱ្យដឹងថា ឈ្មួញស្រីដ៏ដុះស្លែនៅតែបន្តដឹកជញ្ជូនឈើយ៉ាងពេញទំហឹង តែគេមិនដែលឃើញអស់លោកមេព្រៃ ចេញមុខមកបង្ក្រាបរាល់បទល្មើសដែលឈ្មួញស្រីកំពុងតែដឹកយ៉ាងសស្រាក់ស្រាំ នោះឡើយហើយគេក៏មិនបានដឹងពីមូលហេតុ ដែលមេព្រៃនៅសង្កាត់នោះមិនព្រមមានវិធានការបង្ក្រាប។
ប្រពភពត៌មានបានបន្តទៀតថា ឈ្មួញស្រីដែលរកស៊ីដឹកឈើតាមរម៉កម៉ូតូមានឈ្មោះ ស៊ាត ផល្លី ដែលឈ្មួញស្រីម្នាក់នេះរស់នៅក្នុងភូមិ ឬស្សីចារ ឃុំថ្មគ្រែ ស្រុក ចិត្របុរី ខេត្តក្រចេះ។ ឈ្មួញស្រីម្នាក់បានប្រកបមុខរបរដឹកឈើប្រភេទឈើអារនេះជាយូរយាណាស់មកហើយដោយទំនងជាត្រូវរ៉ូវជាមួយអស់លោកមេព្រៃនៅក្នុងសង្កាត់នោះ ទើបការរកស៊ីរបស់គាត់ទៅមុខបានយ៉ាងរលូនជារៀងរាល់ថ្ងៃនេះ ហើយការដឹកជញ្ជូនឈើរបស់ឈ្មួញស្រីដុះស្លែម្នាក់នោះ គាត់បានប្រើរូបភាពដោយដឹកតាមរម៉កបន្តិចម្តងៗ លុះបានច្រើនម៉ែត្រគូប ទើបគេលើកដាក់ទូកឈ្មួញផ្សេងទៀត ដែលមកទិញដើម្បីយកទៅលក់បន្ត នៅក្នុងខេត្តកំពង់ចាម។
បើតាមប្រពភពត៌មានផ្សេងទៀតបានប្រាប់ថា ជារៀងរាល់ថ្ងៃនេះលោក ប៉ុក វណ្ណា និង លោក ឃ្លាំង រ័ត្ន ដែលជានាយសង្កាត់ និងនាយរងសង្កាត់ថ្មគ្រែ កំពុងតែធូររលុងក្នុងការឱ្យឈ្មួញរកស៊ីដឹកឈើខុសច្បាប់ ដោយមិនមានវិធានបង្ក្រាបអ្វីឡើយ ដោយប្រជាពលរដ្ឋឃើញតែមេព្រៃ បើករថយន្តចុះឡើងៗក៏ប៉ុន្តែបទល្មើសព្រៃឈើ នៅតែកើតមានគៀនិងជើងដដែល។
ប្រភពនោះបានបន្តទៀតថា គេក៏មិនដឹងដែរថា លោក សូយ សារឹទ្ធ បានដឹងអំពីបញ្ហាខាងលើដែរឬអត់ នោះទេឬមួយក៏លោកបានទទួលលាភសក្ការៈពីលោក ឃ្លាំង រ័ត្ន ដែរឬយ៉ាងណាទើបស្ងាត់ជ្រាបមិនព្រមបញ្ជាឱ្យមន្ត្រីរបស់ខ្លួន ធ្វើការបង្ក្រាបផង ពីព្រោះរាល់ថ្ងៃនេះស្នាក់ការរបស់សង្កាត់ថ្មគ្រែ កំពុងតែបិទទ្វាចោល ដោយមន្រ្តីរបស់លោក និយាយថា អត់មានមនុស្សធ្វើការ។
ទាក់ទិនបញ្ហានេះកាលពីព្រឹកថ្ងៃទី ២៩ ខែកញ្ញា ឆ្នាំ២០១២ អ្នកយកពត៌មានក៏បានធ្វើការទំនាក់ទំនងជាមួយលោក ប៉ុក វណ្ណា នាយសង្កាត់ថ្មគ្រែ តែលោកមិនលើកទូរស័ព្ទ ក៏ទំនាក់ទំនងទៅលោក ឃ្លាំង រ័ត្ន នាយរងសង្កាត់ លោកក៏បានឆ្លើយថា (អត់ដឹងទេវី)។
No comments:
Post a Comment
yes