ប្រជានេសាទនៅស្រុកអង្គរបុរី និងស្រុកបូរីជលសារ ខេត្តតាកែវ បានចោទអាជ្ញាធរពាក់ព័ន្ធមូលដ្ឋាននេះថា បានអនុញ្ញាតឲ្យទូកនេសាទជនជាតិវៀតណាម ចូលនេសាទក្នុងដែនទន្លេកម្ពុជា ជាថ្នូរទទួលប្រាក់សំណូកប្រចាំខែ។
អ្នកនេសាទខ្មែរ បានត្អូញត្អែរថា រាល់ថ្ងៃនេះ ពួកគាត់មិនអាចរកត្រីដើម្បីចិញ្ចឹមគ្រួសារដូចបណ្ដាឆ្នាំមុនៗទៀតទេ ព្រោះអ្នកនេសាទវៀតណាម បានចូលមកនេសាទដោយប្រើឧបករណ៍ខុសច្បាប់អនាធិបតេយ្យ ប៉ុន្តែអាជ្ញាធរមិនមានវិធានការទប់ស្កាត់ទេ។
ប្រជានេសាទរស់នៅស្រុកអង្គរបុរី និងស្រុកបូរីជលសារ ខេត្តតាកែវ បានឲ្យដឹងថា អាជ្ញាធរពាក់ព័ន្ធខេត្តតាកែវ បានបើកដៃឲ្យឈ្មួញនេសាទវៀតណាម ចូលនេសាទប្រើឧបករណ៍ខុសច្បាប់ តាមឃុំជាប់ព្រំដែនកម្ពុជា និងវៀតណាម យ៉ាងអានាធិបតេយ្យ។
ប្រជានេសាទស្នើមិនបញ្ចេញឈ្មោះ បានឲ្យដឹងថា បទល្មើសទូកនេសាទប្រើឧបករណ៍ខុសច្បាប់ អាចចូលមកនេសាទក្នុងដែនទន្លេកម្ពុជា ទៅបាន ដោយសារតែមានការអនុញ្ញាតពីអាជ្ញាធរពាក់ព័ន្ធខេត្តតាកែវ ពីថ្នាក់មូលដ្ឋានដល់ថ្នាក់ខេត្ត។
ពលរដ្ឋបានចោទអាជ្ញាធរគ្រប់ជំនាញ ជាអ្នកបើកដៃឲ្យឈ្មួញនេសាទវៀតណាម អាចប្រើឧបករណ៍នេសាទ និងអាចចូលនេសាទក្នុងទឹកដីកម្ពុជា។ ពលរដ្ឋឲ្យដឹងថា សព្វថ្ងៃនេះ ទោះបីលោកនាយករដ្ឋមន្ត្រី ហ៊ុន សែន បានកាត់រំសាយឡូត៍នេសាទ មានដូចជាឡូត៍លេខ៥ និងឡូត៍លេខ១១ ក៏អាជ្ញាធរពាក់ព័ន្ធ មានមន្ត្រីជលផលជាដើម មិនអនុញ្ញាតឲ្យអ្នកនេសាទខ្មែរ ចូលនេសាទក្នុងឡូត៍កាត់រំសាយនេះទេ ដោយយកឡូត៍កាត់រំសាយរបស់ប្រមុខដឹកនាំលក់បន្តឲ្យឈ្មួញនេសាទវៀតណាម ធ្វើរបរនេសាទទៅវិញ។
ទាក់ទិនបញ្ហានេះ លោក ស្រី បេន អភិបាលខេត្តតាកែវ ធ្លាប់បានបដិសេធថា គ្មានជនអន្តោប្រវេសន៍ជនជាតិវៀតណាម ចូលមកប្រទេសកម្ពុជា ដូចពលរដ្ឋចោទទេ ហើយថាករណីបទល្មើសនេសាទ មិនមែនជាសមត្ថកិច្ចរបស់លោកត្រូវដោះស្រាយទេ ព្រោះបទល្មើសនេះជាសមត្ថកិច្ចរបស់រដ្ឋបាលជលផល។
វិទ្យុអាស៊ីសេរី មិនអាចទាក់ទងមន្ត្រីជលផលខេត្តតាកែវ ដើម្បីបំភ្លឺជុំវិញបទល្មើសនេសាទដែលកំពុងកើតមានក្នុងស្រុកអង្គរបុរី និងស្រុកបូរីជលសារ បានទេ តាមទូរស័ព្ទ នៅរសៀលថ្ងៃទី២៤ ខែតុលា។
ទោះយ៉ាងណា លោក ម៉ៅ សុផល សមាជិកក្រុមប្រឹក្សាខេត្តតាកែវ បានទទួលស្គាល់ថា បទល្មើសនេសាទរបស់ជនជាតិវៀតណាម ពិតជាកំពុងធ្វើសកម្មភាព និងប្រើឧបករណ៍នេសាទ ដែលច្បាប់កម្ពុជា បានហាមឃាត់ពិតមែន។ លោកថា បទល្មើសនេសាទអាចធ្វើសកម្មភាពនៅក្នុងមូលដ្ឋានស្រុកអង្គរបុរី និងស្រុកបូរីជលសារ ដោយសារអាជ្ញាធរមូលដ្ឋាន និងផ្នែកពាក់ព័ន្ធជាអ្នកអនុញ្ញាតជាថ្នូរទទួលបានលាភសក្ការៈជាដើម។
ប្រជានេសាទខ្មែរ បានឲ្យដឹងថា បទល្មើសនេសាទរបស់ជនជាតិវៀតណាម អាចធ្វើសកម្មភាពក្នុងស្រុកបូរីជលសារ និងស្រុកអង្គរបុរី ខេត្តតាកែវ ទៅបាន ដោយសារអាជ្ញាធរចាប់ពីថ្នាក់មូលដ្ឋាន ដល់ថ្នាក់ខេត្ត ជាអ្នកអនុញ្ញាត ទើបបទល្មើសអាចធ្វើសកម្មភាព និងគ្មានការហាមឃាត់៕
No comments:
Post a Comment
yes