បាត់ដំបង ៖ សកម្មភាពនៃការជីកកកាយរុករករ៉ែមាសនៅតំបន់ភ្នំព្រឹក បានផ្អាកមួយរយះពេលខ្លី ក្រោយពីមានមនុស្សស្លាប់ ហើយប៉ុន្មានខែចុងក្រោយនេះ ភាពអនាធិបតេយ្យបានចាប់ផ្តើមកម្រើកឡើងវិញ ដែលក្នុងនោះក្រុមឈ្មួញប្រកបអាជីវកម្មផ្នែកឯកជនត្រូវបាន ក្រុមអជ្ញាធរ និងសមត្ថកិច្ចពាក់ពន្ធ័ ធ្វើការរឹតបន្តឹង ដើម្បីមានឱកាសជំរុញ ឱ្យអ្នកប្រកបអាជីវកម្មបង់ប្រាក់ក្រោមតុ ជាមធ្យោបាយ ដោះដូរ និងជាថ្នូរនៃការជីករុករករ៉ែខុសច្បាប់នៅតំបន់ភ្នំព្រឹក។
កម្មករម្នាក់ឈ្មោះ បា សែត ភេទ ប្រុស អាយុ ៤៩ ឆ្នាំ មានដើមកំណើតនៅ ភូមិតាប៉ុន ឃុំ តាប៉ុន ស្រុកសង្កែ ខេត្ដបាត់ដំបង បានឲ្យដឹងថា គាត់បានមកធ្វើជាកម្មករនៅទីនេះ ជាង២ឆ្នាំមកហើយ ដោយ មួយថ្ងៃទទួលបានប្រាក់ ២៥០០០រៀល។ កម្មករដដែលបានបន្ដប្រាប់ទៀតថា ពួកគាត់ធ្វើការជីករ៉ែនេះឱ្យឈ្មោះ ធា ដែលជាថៅកែ ហើយដីដែលត្រូវជីករុករករ៉ែនោះ មួយកន្លែងមានតម្លៃ ៣ពាន់ដុល្លារទៅ ៥ពាន់ដុល្លារ សំរាប់ក្បាលមួយម៉ែត្រនិងបណ្ដោយ ៣ម៉ែត្រ ហើយសកម្មភាពជីករ៉ែនៅទីនោះ មានរាប់រយរណ្ដៅ និងកម្មកររាប់ពាន់នាក់ផងដែរ។
ចំណែកលោក គង ឬទ្ធី ថៅកែអណ្តូងរ៉ែមានដើមកំណើតនៅភូមិ បេងស្អាត ស្រុក ភ្នំព្រឹក ខេត្ដ បាត់ដំបង បានប្រាប់ឲ្យដឹងថា មូលហេតុដែលជាកត្ដាឱ្យពួកគាត់ធ្វើអាជីវកម្មបាននោះ គឺក្រុមខាងសមត្ថកិច្ច បូលិសការពារព្រំដែន និង កងរាជអវុធហត្ថ ជាពិសេសកម្លាំង នគរបាលស្រុកភ្នំព្រឹក ដែលជាញឹកញាប់ តែងតែមកទារ ប្រាក់ដាក់ខែ ហើយក្រៅពីនោះ ក៏មានរដ្ឋអំណាច និងអាជ្ញាធរថ្នាក់មូលដ្ឋានផងដែរ។ ដោយមានការបើកភ្លើងខៀវពីមន្ដ្រីពាក់ព័ន្ធ យ៉ាងនេះហើយ ទើប បង្កឱ្យមាន សកម្មភាពនៃការជីកកកាយរុករករ៉ែនេះ កម្រើកឡើងវិញជាថ្មីម្ដងទៀត។
ស្ដ្រីម្នាក់ដែលសុំមិនបញ្ចេញឈ្មោះ បានឲ្យដឹងថា ពួកគាត់សព្វថ្ងៃនេះ មិនហ៊ានឱ្យកូនចៅទៅដើរទៅលេង នៅតំបន់ភ្នំព្រឹកនេះទេ ព្រោះខ្លាចធ្លាក់អណ្តូងងរ៉ែស្លាប់ ព្រោះថា រាល់ការជីកកកាយនេះ មិនដែលបានឃើញ ក្រុមឈ្មួញទាំងនោះ លុបរណ្ដៅវិញទេ គឺពួកគេទុករណ្ដៅចោលពាសពេញតំបន់ភ្នំតែម្ដង ។ ចំណែក លោក ស៊ុង សុភក្រ អធិការនគរបាលស្រុកភ្នំព្រឹក បានប្រាប់តាមទូរសព្ទ័មកថា ការជីករុករករ៉ែ មាសនៅស្រុកភ្នំព្រឹកនេះ មិនមានសកម្មភាពច្រើនពេកទេ បើមានគឺជាលក្ខណះលួចលាក់តែប៉ុណ្ណោះ។ អធិការនគរបាលស្រុកភ្នំព្រឹក បានព្យាយាមនិយាយសម្រួលចំពោះបញ្ហានេះ ទំនងជាគាត់ទទួលបានផលប្រយោជន៏ពីការជីករុករករ៉ែមាសនេះដែរហើយមើលទៅ៕
No comments:
Post a Comment
yes