លោក ទូច ណារ៉ុថ នាពេលកន្លងមក
ភ្នំពេញៈ លោកឧត្តមសេនីយ៍ ទូច ណារ៉ុថ ស្នងការនគរបាលរាជធានីភ្នំពេញ នឹងលះបង់តំណែងរបស់ខ្លួន ទៅទទួលតួនាទីថ្មី ជាប្រធាននាយកដ្ឋានអង្គរក្សនៃក្រសួងមហាផ្ទៃ។ នេះបើយោងតាមការលើកឡើងរបស់លោកផ្ទាល់ កាលពីថ្ងៃសៅរ៍។
លោក ទូច ណារ៉ុថ អាចត្រូវបានតែងតាំងជាប្រធាននាយកដ្ឋាន នៅថ្ងៃពុធ ដែលប្រព័ន្ធផ្សព្វផ្សាយក្នុងស្រុកចុះផ្សាយថា នេះជាការដំឡើងឋានន្តរស័ក្តិ ហើយដែលត្រួសត្រាយផ្លូវឲ្យលោកឧត្តមសេនីយ៍ ជួន សុវណ្ណ អគ្គស្នងការរងនៃនគរបាលជាតិក្រសួងមហាផ្ទៃ ទទួលតំណែងរបស់លោក ទូច ណារ៉ុថ។
លោក ណារ៉ុថ បានបញ្ជាក់ថា៖ «យើងទាំងអស់គ្នាបានដឹងអំពីការតែងតាំងនេះ»។
ទោះជាយ៉ាងណា លោកមិនបាននិយាយថាតើ លោកចាត់ទុកតួនាទីនេះជាការដំឡើងតំណែងឬយ៉ាងណាឡើយ។
លោកបានបន្ថែមថា៖ «ខ្ញុំគិតថា យើងនឹងរង់ចាំរហូតដល់មានពិធីផ្លូវការ មុនពេលយើងនិយាយបន្ថែមទៀតអំពីចំណុចនេះ»។
លោក គៀត ច័ន្ទថារិទ្ធ អ្នកនាំពាក្យនគរបាលជាតិ បានថ្លែងកាលពីម្សិលមិញថា លោកមិនបានទទួលព័ត៌មានអំពីការតែងតាំងថ្មីនេះទេ ហើយលោកក៏មិនអាចបញ្ជាក់បានទេថាតើនឹងមានការតែងតាំងបន្ថែម ទៀត ក្នុងជួរតំណែងនគរបាលជាន់ខ្ពស់ ឬយ៉ាងណា។
គេហទំព័ររបស់ សារព័ត៌មានក្នុងស្រុក ដូចជា កាសែត កម្ពុជាថ្មី កាសែត ដើមអម្ពិល និង Cambodia Express News បានរាយការណ៍ កាលពីថ្ងៃម្សិលមិញថា ការដោះដូរនេះគ្រោងធ្វើឡើង ហើយលោក ជួន សុវណ្ណ នឹងទទួលយកតួនាទីជាស្នងការរាជធានីភ្នំពេញ បន្ថែមពីលើតំណែងដែលលោកមាននាពេលបច្ចុប្បន្ន។
លោក ជួន សុវណ្ណ បានប្រាប់ ភ្នំពេញ ប៉ុស្តិ៍ថា លោករំពឹងការទទួលខុសត្រូវបន្ថែម ប៉ុន្តែលោកមិនត្រូវបានប្រគល់ការងារនេះជាផ្លូវការនៅឡើយទេ។
លោកបានថ្លែងថា៖ «ខ្ញុំមិនមានការភ្ញាក់ផ្អើលទេ ព្រោះព័ត៌មានដែលកើតមានឡើង គឺតាមសារព័ត៌មាន។ ខ្ញុំគិតថា អ្នកកាសែត នឹងទទួលបានព័ត៌មានគ្រប់គ្រាន់ទៅតាមប្រភពរបស់គេមុននឹងចុះផ្សាយ »។
លោក ប៉ុល ភិធេយ្យ ស្នងការរងរាជធានីភ្នំពេញ ត្រូវបានដំឡើងតំណែងជាប្រធាននាយកដ្ឋានប្រឆាំងការជួញដូរមនុស្ស (ជំនួសលោក ប៊ិត គឹមហុង)។
លោក គល់ បញ្ញា នាយកប្រតិបតិ្តនៃអង្គការ ខុម ហ្វ្រេល បានថ្លែងពីម្សិលមិញថា ការផ្លាស់ប្តូរឆាប់រហ័សនេះ គឺតែងតែធ្វើឡើង តាមបញ្ជារបស់អ្នកនយោបាយមានអំណាច។
លោកថា៖ «នេះមិនស្របតាមប្រព័ន្ធច្បាប់ទេជាធម្មតា»។
លោក សឺន ស៊ូប៊ែរិ៍ អ្នកវិភាគនយោបាយ បានថ្លែងថា វាជាការសំខាន់ត្រូវសួរថាតើអ្នកណាបញ្ជាឲ្យផ្លាស់ប្តូរ និងដោយសារមូលហេតុអ្វី?
លោក ខៀវ សុភ័គ អ្នកនាំពាក្យក្រសួងមហាផ្ទៃ មិនអាចទាក់ទងសុំការអត្ថាធិប្បាយបានទេ កាលពីម្សិលមិញ៕
No comments:
Post a Comment
yes