ភ្នំពេញ: សមត្ថកិច្ចប៉ូលិសការិយាល័យព្រហ្មទណ្ឌកម្រិតស្រាលរាជធានីភ្នំពេញ សហការជាមួយសមត្ថកិច្ចប៉ូលិសក្រសួងមហាផ្ទៃ បានចាប់ខ្លួនក្រឡាបញ្ជីម្នាក់ បម្រើការងារនៅសាលាដំបូងរាជធានីភ្នំពេញ កាលពីម៉ោង ១ រំលងអធ្រាត្រ ឈានចូលថ្ងៃទី២៩ ខែតុលា ឆ្នាំ២០១២ ក្នុងក្លឹបកម្សាន្តមួយក្នុងទីក្រុងភ្នំពេញ ពាក់ព័ន្ធរឿងស៊ីដាច់ប្រាក់គូភាគីក្នុងសំណុំរឿងរដ្ឋប្បវេណី ចំនួន ២៥ ម៉ឺនដុល្លារសហរដ្ឋអាមេរិក។
ក្រឡាបញ្ជីដែលត្រូវបានចាប់ខ្លួននេះ មានឈ្មោះ គ្រួច បូរ័ត្ន ត្រូវបានអយ្យការអមសាលាដំបូងរាជធានីភ្នំពេញ ចោទប្រកាន់ពីបទ រំលោភលើទំនុកចិត្ត និងក្លែងលិខិតឯកជន ដោយភ្ជាប់យកករណីស៊ីដាច់ប្រាក់ចំនួន ២៥ ម៉ឺនដុល្លារ ដែលគូភាគីក្នុងរឿងក្តីរដ្ឋប្បវេណីបានតម្កល់ទុក ដើម្បីដោះស្រាយបញ្ហាជម្លោះ កាលពីអំឡុងឆ្នាំ២០១១ កន្លងទៅ។
ក្រោយពីចៅក្រមបានចាត់ការជាបន្តបន្ទាប់តាមនីតិវិធីរួចហើយ គូភាគីក្នុងសំណុំរឿងនេះ បានព្រមព្រៀងគ្នាឈានដល់ការសុំដកប្រាក់តម្កល់ ២៥ ម៉ឺនដុល្លារនេះ ដើម្បីបញ្ចប់រឿង។ ប៉ុន្តែពេលទៅដកប្រាក់នោះ ទើបដឹងថាក្រឡាបញ្ជី គ្រួច បូរ័ត្ន បានយកប្រាក់នេះទៅចាយវាយអស់ហើយ។
នៅចន្លោះពេលដែលរឿងនេះត្រូវបានបែកធ្លាយ ឈ្មោះ គ្រួច បូរ័ត្ន បានចេញពីប្រទេសកម្ពុជា ទៅប្រទេសបារាំងមួយរយៈ។ លុះមកដល់ដើមឆ្នាំ២០១២ គ្រួច បូរ័ត្ន បានត្រឡប់មកកម្ពុជាវិញ ហើយបានចូលឆ្លើយនៅដំណាក់កាលអយ្យការ ថា ខ្លួនពិតជាបានដកប្រាក់នោះយកទៅចាយប្រាកដមែន ហើយរឿងនេះទៀតសោត ពុំមានជាប់ពាក់ព័ន្ធនឹងចៅក្រមណាម្នាក់ទេ ពោលគឺខ្លួនប្រព្រឹត្តតែម្នាក់ឯង។
ក្រោយពេលសាកសួររួចហើយ លោក លី សុផាណា ព្រះរាជអាជ្ញារងអមសាលាដំបូងរាជធានីភ្នំពេញ បានចោទប្រកាន់ គ្រួច បូរ័ត្ន ពីបទរំលោភលើទំនុកចិត្ត និងក្លែងលិខិតឯកជន រួចបញ្ជូនសំណុំរឿងនេះទៅចៅក្រមស៊ើបសួរ ចាត់ការបន្តតាមនីតិវិធី ក្រោមរូបភាពជនត្រូវចោទស្ថិតនៅក្រៅឃុំ។ ប៉ុន្តែក្នុងនោះ តុលាការបានសម្រេចហាមឃាត់ជនត្រូវចោទ មិនឲ្យចេញពីប្រទេសកម្ពុជា ដើម្បីរង់ចាំការស៊ើបអង្កេតពីករណីនេះ។
ចន្លោះពេលដែលចៅក្រមកំពុងចាត់ការសំណុំរឿងនេះ ជនត្រូវចោទបានគេចខ្លួនទៅរស់នៅតាមបណ្តាខេត្តមួយចំនួន ដែលមានព្រំប្រទល់ជាប់ប្រទេសវៀតណាម និងថៃ ដោយពុំព្រមចូលខ្លួនបំភ្លឺពីករណីនេះទេ។ ហេតុដូច្នេះហើយ ទើបចៅក្រមសម្រេចចេញដីកាបង្គាប់ឲ្យសមត្ថកិច្ចស្វែងរកចាប់ខ្លួន គ្រួច បូរ័ត្ន យកមកសាកសួរ ពីករណីដែលត្រូវបានចោទប្រកាន់នេះ។
មួយរយៈពេលដែលសមត្ថកិច្ចពុំទាន់ចាប់ខ្លួន គ្រួច បូរ័ត្ន បាននោះ ចៅក្រមបានសម្រេចបិទការស៊ើបសួរ រួចបញ្ជូនសំណុំរឿងទៅចៅក្រមជំនុំជម្រះចាត់ការបន្ត។ ប៉ុន្តែរហូតមកទល់ពេលនេះ តុលាការពុំទាន់កំណត់ពេលបើកសវនាការជំនុំជម្រះនៅឡើយទេ។
តាមប្រភពមួយបានឲ្យដឹងថា ទឹកប្រាក់ចំនួន ២៥ ម៉ឺនដុល្លារនោះ គ្រួច បូរ័ត្ន បានយកទៅចាយវាយ និងចាញ់ល្បែង ពិសេសចាញ់ល្បែងចាក់បាល់តែម្តង។
ចំពោះករណីនេះ ប៉ូលិសនឹងបញ្ជូន គ្រួច បូរ័ត្ន មកតុលាការនៅថ្ងៃទី២៩ ខែតុលា ឆ្នាំ២០១២ ដើម្បីចាត់ការបន្តតាមនីតិវិធី ថាតើត្រូវឃុំខ្លួន ឬមិនឃុំខ្លួន៕
No comments:
Post a Comment
yes