អ្នកនាំពាក្យរដ្ឋាភិបាលកម្ពុជា គឺលោក ខៀវ កាញារិទ្ធ នៅថ្ងៃចន្ទនេះ បានសម្តែងប្រតិកម្មខ្លាំងក្លាចំពោះអត្ថបទមួយដែលសរសេរដោយអ្នកអង្គម្ចាស់ នរោត្តម សោម៉ា ក្រោមចំណងជើងថា «អនាគតរាជានិយមស្ថិតក្នុងកណ្តាប់ដៃបក្សប្រជាជន» ហើយត្រូវកាសែតភ្នំពេញប៉ុស្តិ៍ចុះផ្សាយកាលពីថ្ងៃទី២៦ តុលា ថា គឺជាការញុះញង់ និងចង់បំបែកបំបាក់ជាតិខ្មែរ។
លោក ខៀវ កាញារិទ្ធ អ្នកនាំពាក្យរដ្ឋាភិបាល
លោក ខៀវ កាញារិទ្ធ បាននិយាយក្នុងសន្និសីទកាសែតនាថ្ងៃទី២៩ តុលានេះថា អត្ថបទនោះ «ជាអត្ថបទបញ្ឆេះធំណាស់ ដោយអ្នកសរសេរបានឆ្លៀតពេលដែលយើងមានទុក្ខសោកទាំងមូល ដើម្បីបង្កជាការបំបែកបំបាក់ក្នុងប្រទេសជាតិរបស់យើងផង បំបែកបំបាក់រវាងព្រះរាជវង្សានុវង្ស និងរាជរដ្ឋាភិបាលផង ក៏ដូចជារវាងរាជវង្ស និងគណបក្សប្រជាជនផង»។
គួររំលឹកថា អត្ថបទរបស់អ្នកអង្គម្ចាស់ នរោត្តម សោម៉ា ដែលត្រូវកាសែតភ្នំពេញប៉ុស្តិ៍ចុះផ្សាយកាលពីថ្ងៃទី២៦ ខែតុលា បានសរសេរថា «ក្នុងអំឡុងព្រះរាជពិធីបុណ្យព្រះបរមសពព្រះមហាវីរក្សត្រ នរោត្តម សីហនុ នៅថ្ងៃទី ១៧ ខែតុលា ឆ្នាំ ២០១២ ខ្ញុំបានមើលឃើញផ្ទាល់ភ្នែកថា ការរួបរួម ក្នុងចំណោមគ្រួសាររាជវង្ស មានលក្ខណៈពុំរឹងមាំ និងមានការបែងចែកក្នុងរដ្ឋាភិបាលបច្ចុប្បន្ន។ ព្រះមហាក្សត្រ នរោត្តម សីហមុនី ជាព្រះមហាក្សត្រ តែគ្មានអំណាច ហើយរដ្ឋាភិបាលគឺជាអ្នកកាន់អំណាចទាំងស្រុង»។
អ្នកអង្គម្ចាស់ នរោត្តម សោម៉ា បានបន្តលើកឡើងនៅក្នុងអត្ថបទនោះថា «លោកនាយករដ្ឋមន្រ្តី ហ៊ុន សែន និងរដ្ឋាភិបាល គ្រប់គ្រងសង្វៀននយោបាយនិងរាជានិយម ហើយនឹងបន្តគ្រប់គ្រងដរាបណាលោកនៅកាន់អំណាច។ រដ្ឋាភិបាលមានអំណាចក្នុងការសម្រេចថា តើសមាជិករាជវង្សអង្គណានឹងក្លាយជាព្រះមហាក្សត្របន្ទាប់។ សមាជិកក្រុមប្រឹក្សារាជសម្បត្តិដែលមានសមាជិក ៩ រូប មានលោកនាយករដ្ឋមន្រ្តី ប្រធានព្រឹទ្ធសភា ប្រធានរដ្ឋសភា និងមន្ត្រីជាន់ខ្ពស់មកពីគណបក្សប្រជាជនកម្ពុជាផ្សេងទៀត។ អនាគតរាជានិយម ស្ថិតក្នុងកណ្តាប់ដៃរបស់ពួកគេ»។
ប៉ុន្តែទោះជាយ៉ាងណាក៏ដោយ ក្នុងសន្និសីទកាសែតលោក ខៀវ កាញារិទ្ធ មិនបានបង្ហាញពីចំណាត់ការណាមួយចំពោះអត្ថបទនេះទេ៕
No comments:
Post a Comment
yes