លោកនាយករដ្ឋមន្ត្រី ហ៊ុន សែន នៅថ្ងៃទី២៧ តុលា ប្រកាសពីគម្រោងសាងសង់ព្រលានយន្តហោះអន្តរជាតិថ្មី នៅខេត្តកំពង់ឆ្នាំង នៅក្នុងពិធីប្រគល់ប្លង់ដីជូនពលរដ្ឋនៅទីនោះ។
១៥-មិថុនា-២០១១៖ លោកនាយករដ្ឋមន្ត្រី ហ៊ុន សែន ថ្លែងក្នុងឱកាសចែកសញ្ញាបត្រដល់និស្សិតនៅសាកលវិទ្យាល័យវិទ្យាសាស្ត្រសុខាភិបាល រាជធានីភ្នំពេញ។
លោក ហ៊ុន សែន មានប្រសាសន៍ថា អាជ្ញាធរអនុញ្ញាតឲ្យពលរដ្ឋដែលរស់នៅតំបន់ព្រលានយន្តហោះបន្តរស់នៅទីនោះជាធម្មតា ប៉ុន្តែមិនផ្តល់កម្មសិទ្ធិ ព្រមទាំងមិនអនុញ្ញាតឲ្យសាងសង់សំណង់រឹង ឬសំណង់ធំៗនោះទេ។ លោកបន្តថា ព្រលានយន្តហោះនៅកំពង់ឆ្នាំង នឹងក្លាយជាទីតាំងដែលទទួលភ្ញៀវទេសចរជាច្រើនលាននាក់ពីជុំវិញពិភពលោក។ លោក ហ៊ុន សែន បញ្ជាក់ថា ពលរដ្ឋដែលអាស្រ័យផលនៅលើដីព្រលានយន្តហោះ អាចអាស្រ័យផលបានធម្មតា តែអាជ្ញាធរនឹងយកដីនេះវិញ ពេលណាត្រូវការស្ថាបនាសំណង់ប្រវត្តិសាស្ត្រនេះ។
លោកនាយករដ្ឋមន្ត្រី ហ៊ុន សែន៖ «ខ្ញុំសូមជម្រាបថា ចក្ខុវិស័យដែលខ្ញុំធ្លាប់និយាយប្រាប់ថា សុំលាក់ទុកនោះ គឺតំបន់កំពង់ឆ្នាំង មានទំហំ ១.៤៦៣ហិកតារ តំបន់នេះជាមូលដ្ឋានចល័តទ័ពអាកាស និងដឹកជញ្ជូនផ្លូវអាកាសសម្រាប់អាស៊ាន គឺតំបន់កំពង់ឆ្នាំង នេះឯង»។
បច្ចុប្បន្ន កម្ពុជា មានព្រលានយន្តហោះ៣ ដែលកំពុងដំណើរការ គឺអាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ។ លោក ហ៊ុន សែន ក៏បានប្រកាសលុបចោលគម្រោងដីអភិវឌ្ឍន៍ទំហំជិត ២ម៉ឺនហិកតារ ដែលធ្វើឲ្យប៉ះពាល់ដល់ទីតាំងស្ថាប័នរដ្ឋ និងឯកជនចំនួន ៤ស្រុក រួមទាំងក្រុងកំពង់ឆ្នាំង ដែលរាជានុញ្ញាតដោយព្រះរាជក្រឹត្យ ឆ្នាំ១៩៩៦។ លោក ហ៊ុន សែន ក៏បានទទួលស្គាល់នូវកំហុសរបស់ខ្លួន ដែលចុះហត្ថលេខាស្នើសុំរាជានុញ្ញាតពីព្រះមហាក្សត្រទៀតផង៕
No comments:
Post a Comment
yes