ជីវិតកូនអ្នកភូមិដែលត្រូវបណ្តេញចេញពីតំបន់សម្បុកចាប
រឿងរបស់ សុខ ជា គឺជារឿងជោគជ័យមួយ។ ដោយកើតមកជាទារកម្នាក់ ដែលមានភាពស្គមស្គាំង ហើយបានក្លាយជាក្មេងចេះដើរតះៗ ដែលមានសុខភាពល្អ។ ភស្តុតាងអំពីទារកនេះ បង្ហាញថា ការធ្វើការរួមគ្នានឹងទទួលបានលទ្ធផលប្រសើរ។
មូលនិធិ អភិវឌ្ឍន៍សហស្សវត្សរ៍រួមគ្នា ដើម្បីកុមារ សុវត្ថិភាពស្បៀងអាហារ និងអាហារូបត្ថម្ភ ដែលជួយទារក សុខ ជា ឲ្យជាសះស្បើយពីជំងឺខ្វះអាហារូបត្ថម្ភបាននាំឲ្យរដ្ឋាភិបាលកម្ពុជារួមនឹងស្ថាប័នអង្គការសហប្រជាជាតិចំនួន ៦ មកធ្វើការជាមួយគ្នា។
ក្រុមទាំងនេះ មាននូវគោលដៅរួមគ្នាគឺផ្តល់អនាគតដល់ក្មេងៗកម្ពុជា និងគ្រួសាររបស់ពួកគេ ដូចទៅនឹងអនាគតរបស់កុមារ សុខ ជា ដែលពួកគេចង់បាន។
ជារៀងរាល់ឆ្នាំ ថ្ងៃទី ២៤ តុលា គឺជាថ្ងៃរំឭកខួប ទិវាអង្គការសហប្រជាជាតិ។ វាជាទិវាមួយ សម្រាប់យើងទាំងអស់គ្នា រួមទាំងស្ថាប័នអង្គការសហប្រជាជាតិចំនួន ២៧ អង្គការមូលនិធិ និងកម្មវិធីផ្សេងៗ ធ្វើការរួមគ្នា ដើម្បីសន្តិភាព ការកាត់បន្ថយភាពក្រីក្រ និងសិទ្ធិមនុស្សក្នុងប្រទេសកម្ពុជា និងដើម្បីឆ្លុះបញ្ចាំង អំពីការងាររបស់យើងនៅទីនេះ គឺដើម្បីមនុស្សទាំងអស់គ្នាឲ្យដូចទៅនឹងកុមារ សុខ ជា។ ដោយចុះហត្ថលេខា នៅថ្ងៃទី ២៤ ខែតុលា ១៩៤៥ ពាក្យពេចន៍នៅក្នុងធម្មនុញ្ញអង្គការសហប្រជាជាតិ បានកំណត់អំពីការងាររបស់យើង ដែលយើងត្រូវតែធ្វើ និងរបៀបដែលត្រូវធ្វើ។ ពាក្យពេចន៍នៅក្នុងធម្មនុញ្ញនេះ គឺស្ថិតនៅក្នុងចិត្តរបស់យើងជានិច្ច ខណៈស្ថាប័នអង្គការសហប្រជាជាតិ ខិតខំធ្វើការងារបម្រើប្រជាជន៖ «យើងទាំងអស់គ្នា គឺជាប្រជាជនពិភពលោក»។ យើងសហការជាដៃគូស្មើភាពគ្នាជាមួយរាជរដ្ឋាភិបាលកម្ពុជា និងប្រតិបត្តិការជាមួយភាគីពាក់ព័ន្ធទាំងអស់។ វាមានវិធីសាស្រ្តផ្សេងៗ ក្នុងការធ្វើការងារជាមួយគ្នាស្របទៅតាមស្មារតីធម្មនុញ្ញ អង្គការសហប្រជាជាតិ។ ជាឧទាហរណ៍ប្រទេសកម្ពុជា គាំទ្រទំនាក់ទំនងសន្តិភាព និងរាក់ទាក់ក្នុងចំណោមប្រទេសនានា ឲ្យស្របទៅតាមធម្មនុញ្ញអង្គការសហប្រជាជាតិតាមរយៈកងកម្លាំង រក្សាសន្តិភាព។ កងកម្លាំងកម្ពុជាជាង ១០០០ នាក់«ដែលពាក់មួកខៀវ»បាននិងកំពុងបម្រើនៅក្នុងបេសកកម្ម រក្សាសន្តិភាពរបស់អង្គការសហប្រជាជាតិ។ ទ្រព្យសម្បត្តិដ៏មានតម្លៃបំផុតរបស់កម្ពុជាគឺប្រជាជនរបស់ខ្លួន។ សេដ្ឋកិច្ចនឹងបន្តរីកលូតលាស់ ហើយប្រទេសនេះនឹងឈានដល់ស្ថានភាព«ប្រាក់ចំណូលមធ្យម»នាពេលខាងមុខឆាប់ៗ។ វាជាប្រជាជនកម្ពុជាខ្លួនឯង ដែលកំពុងធ្វើឲ្យស្ថានភាពនោះកើតឡើង ដូច្នេះការវិនិយោគនៅក្នុងវិស័យ«ធនធានមនុស្ស»គឺជាអាទិភាពមួយ ក្នុងចំណោមអាទិភាពចម្បងៗផ្សេងទៀត។
ឧបសគ្គមួយ ក្នុងចំណោមឧបសគ្គដល់ប្រជាជនកម្ពុជា ដែលនៅតែមានគឺបញ្ហាកង្វះអាហារូបត្ថម្ភ។ ការសិក្សាវាស់ស្ទង់ស្តីពីប្រជាសាស្រ្ត និងសុខាភិបាល បានបង្ហាញថា ២៨ ភាគរយ ក្នុងចំណោមក្មេងៗកម្ពុជា គឺមានទម្ងន់ស្រាល មិនទាន់គ្រប់គ្រាន់នឹងទម្ងន់របស់ខ្លួន។ កង្វះអាហារូបត្ថម្ភ សម្រាប់មាតា និងកុមារ អាចជាឧបសគ្គ ដល់ការអភិវឌ្ឍផ្នែករាងកាយ និងស្មារតី ហើយនេះនឹងធ្វើឲ្យប៉ះពាល់ដល់ការអភិវឌ្ឍ«ធនធានមនុស្ស»ដែល ជំរុញដល់សេដ្ឋកិច្ចរបស់ប្រទេស។
យើង និងដៃគូរបស់យើង កំពុងយកចិត្តទុកដាក់យ៉ាងពិសេស ដើម្បីធ្វើឲ្យប្រជាជនកម្ពុជា មានរាងកាយ និងសុខភាពមាំមួនជាងមុន ដែលជាមូលដ្ឋានគ្រឹះ សម្រាប់ភាពរីកចម្រើនជាបន្តរបស់កម្ពុជា។
ប្រទេសកម្ពុជា ធ្លាប់ជាប្រទេសមានអរិយធម៌ដ៏អស្ចារ្យមួយ កាលពីសម័យបុរាណ ប៉ុន្តែបច្ចុប្បន្ននេះ ប្រជាជនរបស់ខ្លួន នៅវ័យក្មេងច្រើន។ យោងតាមជំរឿនក្នុងឆ្នាំ២០០៨ មួយភាគបីនៃប្រជាជនកម្ពុជាគឺមានអាយុចន្លោះពី១៥ទៅ២៩ឆ្នាំ។ ប្រជាជនវ័យក្មេងទាំងនេះនឹងជាកម្លាំងជំរុញមួយ ហើយពួកគេសមនឹងទទួលបានជីវិតមួយដែលមានគុណភាព។ ពួកគេនឹងជាអ្នកដែលកំណត់អនាគតរបស់ប្រទេស។ ប្រជាជនវ័យក្មេងទាំងនេះ គឺជាកម្លាំងសម្រាប់កិច្ចខិតខំប្រឹងប្រែងធ្វើឲ្យមានការ សម្រេចសមិទ្ធផលរបស់កម្ពុជា។ ការចូលរួមច្រើនជាងមុន របស់ស្រ្តី នៅក្នុងអាជីវកម្ម និងវិស័យសាធារណៈ គឺមានលក្ខណៈសំខាន់ស្មើគ្នា។ សមភាព និងការផ្តល់អំណាចដល់ស្រ្តី នឹងជួយយើងនិងដៃគូរបស់យើង។ ជាងនេះទៀត បញ្ហាប្រើហិង្សាលើស្រ្តី ត្រូវតែដោះស្រាយ។
ជំហានទីមួយ គឺការនិយាយអំពីបញ្ហា ហើយកម្មវិធីមួយ ដែលពាក់ព័ន្ធនឹងស្ថាប័នចំនួនបួន របស់អង្គការសហប្រជាជាតិ គឺការរកឃើញថា ការអប់រំតាមរយៈមិត្តអប់រំមិត្ត គឺជាវិធីមួយ ក្នុងការផ្លាស់ប្តូរបេះដូង និងចិត្តរបស់ប្រជាជន។ ប្រជាជនខ្លះ ស្ថិតនៅក្នុងក្រុមប្រជាជនងាយរងគ្រោះ ជាងក្រុមប្រជាជនផ្សេងទៀត ហើយជាធម្មតា ត្រូវការការជួយជាពិសេស។ ឧទាហរណ៍ កន្លែងល្អបំផុត សម្រាប់ការព្យាបាលការញៀនថ្នាំញៀន គឺសហគមន៍ផ្ទាល់ ជាជាងមជ្ឈមណ្ឌលព្យាបាលការញៀនថ្នាំ។
ប្រជាជនក្រីក្របំផុត ត្រូវការសំណាញ់សុវត្ថិភាពសង្គម ដែលជាវិធីមួយធ្វើឲ្យប្រជាជនកម្ពុជា អាចជួយគ្នាទៅវិញទៅមក។
ជាមួយនឹងជំនួយពីអង្គការសហប្រជាជាតិ រដ្ឋាភិបាលកម្ពុជា កំពុងបោះជំហានសំខាន់ៗ ស្តីពីការការពារប្រជាជនដែលងាយរងគ្រោះបំផុត។ កម្ពុជាកំពុងមានការផ្លាស់ប្តូរយ៉ាងលឿន។ គ្រោះទឹកជំនន់យ៉ាងធ្ងន់ធ្ងរកាលពីឆ្នាំមុន បានបង្ហាញជាថ្មីម្តងទៀតថា សូម្បីតែអាកាសធាតុក៏កំពុងមានការប្រែប្រួល ហើយអង្គការសហប្រជាជាតិរួមដៃគ្នាជាមួយនឹងកម្ពុជា ខណៈដែលបញ្ហាប្រឈមនេះមានលក្ខណៈវិវត្តន៍។ ទោះបីយ៉ាងណាក៏ដោយ ចាប់តាំងពីឆ្នាំ ២០០០ មក មានភាពរីកចម្រើនយ៉ាងច្រើន។ ពិភពលោក កំពុងសម្លឹងមើលអ្វីដែលនឹងកើតមាន នៅពេលខាងមុខ។ បញ្ហាលំបាក និងការងារជាច្រើនកំពុងបន្តមាន។
ប៉ុន្តែទោះបី យ៉ាងណាក្តី វាគឺអំពីកុមារ ដូចនឹងកុមារ សុខ ជា ដែរ។ សម្រាប់ សុខ ជា និងគ្រួសាររបស់គេ ការកសាងប្រទេសកម្ពុជាគឺកិច្ចខិតខំប្រឹងប្រែងជាក្រុម ខណៈដែលធម្មនុញ្ញរបស់យើងតែងតែរំឭកយើង ឯអង្គការសហប្រជាជាតិនៅទីនេះកំពុងដើរតួនាទីរបស់ខ្លួន។ យើងធ្វើការងាររួមគ្នា៕
No comments:
Post a Comment
yes