កឹម សុខា ៖ ស្មារតីនៃកិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ គឺមានបីចំណុចធំៗ ដែលប្រជាពលរដ្ឋខ្មែរមិនត្រូវបំភ្លេចឡើយ

លោក កឹម សុខា អនុប្រធានគណបក្ស សង្គ្រោះជាតិ 

ទៅថ្ងៃខាងមុខ

ប្រទេសកម្ពុជាប្រសិនបើដឹកនាំដោយអ្នកប្រជាធិបតេយ្យ និងមានភាពរីកចំរើនជឿនលឿនលើ​គ្រប់វិស័យជាក់ជាមិនខាន ព្រោះអ្នកប្រជាធិបតេយ្យ គឺយល់ពីអ្វីដែលធ្វើឲ្យប្រទេសជាតិរីកចំ រើន និងប្រជាពលរដ្ឋរស់នៅក្នុងជីវភាពសមរម្យ មិនដូចជាអ្នកកាន់អំណាចដែលដឹកនាំប្រ​ទេសតាមរបៀបផ្តាប់ការឡើយ គឺពួកគេគិតគូរពីផលប្រយោជន៏របស់ខ្លួន និងបក្ខពួគជាមុន មុននិងគិតគួរពីប្រទេសជាតិ និងប្រជាពលរដ្ឋ ដែលទាំងអស់នេះហើយ គឺធ្វើឲ្យប្រទេសជាតិ គ្មានការរីកចំរើននោះទេ ចំណែកឯប្រជាពលរដ្ឋវិញ គឺរឹតតែបន្តរស់នៅក្រោមបន្ទាត់នៃភាព ក្រីក្រកាន់តែខ្លាំងឡើងៗ ។

ការដឹកនាំប្រទេសតាមបែបផ្តាច់ការ និងធ្វើឲ្យមានអំពើពុករលួយ ការិយាធិបតេយ្យ និងធ្វើឲ្យ បុគ្គលនោះ ក្លាយទៅជាអ្នកដែលមានមហិឆ្ឆិតាចង់គ្រប់គ្រងប្រទេសជាតិ តែបុគ្គលរបស់គេ ម្នាក់​ឯងគត់ និងសម្រេចកិច្ចការងារអ្វីតែនៅលើខ្លួនគេតែម្នាក់ ក៏ដូចជាការក្តោបក្តាប់អំណាច ទាំងមូលនៅក្នុងដៃរបស់ខ្លួនតែម្នាក់ផងដែរ ដែលមិនយូរប៉ុន្មានប្រទេសនោះពិតជារលាយ សាបសូន្យជាក់ជាមិនខាន ហើយប្រជាពលរដ្ឋនិងរស់នៅក្នុងសេចក្តីវេទនាជាពន់ពេក ។

យ៉ាងណាម៉ិញបើយើងក្រលែកមកមើលប្រទេសកម្ពុជារបស់យើង អ្នកដឹកនាំប្រទេសសព្វថ្ងៃ បាននិងកំពុងតែកាន់យករបៀបដឹកនាំតាមបែបផ្តាច់ការ ដែលធ្វើឲ្យប្រទេសជាតិរបស់យើង ដើរទៅដល់រណ្តៅនៃមាត់ជ្រោះមរណៈហើយផងដែរ ក្នុងនោះអ្នកកាន់អំណាចបាននិង​កំពុង​តែខំប្រឹងបិតផ្លូវប្រធានគណបក្សប្រឆាំង មិនឲ្យវិលត្រឡប់មកចូលរួមក្នុងការបោះឆ្នោតនៅ​ឆ្នាំ២០១៣ខាងមុខ ។ ដែលទាំងអស់នេះ គឺគេមិនបានដង្ហែរតាមព្រះរាជតម្រិះរបស់អង្គម្តេចឪ ក្នុងការដែលព្រះអង្គ ចង់ឲ្យខ្មែររួបរួមគ្នាជាធ្លុងមួយ ដើម្បីកសាងប្រទេសកម្ពុជាឲ្យមានឈ្មោះ​បោះ​សម្លេង នៅលើឆាកអន្តរជាតិ និងថែរក្សាទឹកដីឲ្យបានគង់វង្ស ស្របតាមស្មារតីនៃ​កិច្ច​ព្រម​ព្រៀងសន្តិភាពទីក្រុងប៉ារីសនោះ ។

លោក កឹម សុខា ប្រធានគណបក្ស សិទ្ធិមនុស្ស និងជាអនុប្រធានគណបក្ស សង្គ្រោះជាតិ ទៅ ថ្ងៃអនាគតខាងមុខ លោកបានមានប្រសាសន៏ឲ្យដឹងថា ថ្ងៃទី២៣ ខែតុលា ឆ្នាំ១៩៩១ គឺជាថ្ងៃ​ដែលផ្តល់នូវការណ៏វិវឌ្ឍន៏មួយថ្មីជូនដល់ប្រទេសកម្ពុជា និងជាថ្ងៃប្រវត្តិសាស្រ្តដែលយើងជា ជាតិខ្មែរមិនត្រូវបំភ្លេចឡើយ ។ លោកបន្តថា កិច្ចព្រមព្រៀងសន្តិភាពទីក្រុងប៉ារីស ដែលខ្មែរ យើងគ្រប់គ្នាតែងតែយកមករំលឹកនេះ ហើយបើតាមការយល់ឃើញរបស់លោកស្មារតីនេះគឺ​មានបីចំណុចធំៗក្នុងនោះរួមមាន ការផ្សះផ្សារជាតិ និងបង្រួបបង្រួមជាតិ ដែលជាតិរបស់យើង បែកបាក់យ៉ាងខ្លាំង ដោយសារតែមហិច្ឆិតារបស់បរទេស  មួយទៀតស្មារតីនៃកិច្ចព្រមព្រៀងទី ក្រុងប៉ារីស គឺអំពីឯករាជ្យភាព អធិបតេយ្យភាព បូរណភាពទឹកដីខ្មែរ និងស្មារតីមួយទៀតនោះ គឺការកសាងកម្ពុជាឡើងវិញ ឲ្យទៅតាមរបបប្រជាធិបតេយ្យសេរីពហុបក្ស និងធ្វើឲ្យប្រជាពល រដ្ឋខ្មែរមានជីវភាពប្រសើរឡើង ដែលទាំងអស់នេះគឺជាស្មារតីធំៗនៃទីក្រុងប៉ារីស ដែលខ្មែរ ទាំង​អស់គ្នាគួរចងចាំ ។ ដូច្នេះគុណសម្បត្តិនៃវីរបុរសខ្មែរ ដែលផ្តើមឲ្យមាន និងចេញកិច្ច​ព្រម​ព្រៀងទីក្រុងប៉ារីសនេះ គឺមានព្រះករុណា ព្រះបាទសម្តេច ព្រះនរោត្តម សីហនុ ជាព្រះបិតា​នៃ​ការផ្សះផ្សារជាតិ បង្រួបបង្រួមជាតិ និងទ្រង់ជាមគ្គុទេសន៏ដែលយើងទាំងអស់គ្នាបានលើក​នូវ​គុណសម្បត្តិរបស់ព្រះអង្គ នៅពេលដែលព្រះអង្គសោយទីវង្គតទៅនេះ គឺទៅទូទាំងប្រ​ទេស ទាំង​គ្រប់គណបក្សនយោបាយ និងគ្រប់ភាគីនយោបាយទាំងអស់ ក៏ប៉ុន្តែសម្រាប់​ទស្សនៈ​របស់​លោក គឺអ្វីទាំងអស់នេះគឺមិនទាន់គ្រប់គ្រាន់នោះទេ បើយើងគ្រាន់តែសរសើរព្រះអង្គ​នោះ គឺសំខាន់យើងយកស្មារតីគំរូល្អរបស់ព្រះអង្គ មកអនុវត្តន៏ដែលទ្រង់ធ្វើទៅទទួល​បាន​នូវ​ភាពជោគជ័យនោះ ទាំងអស់នេះហើយបានយើងគោរពពិតប្រាកដទៅលើស្មារតី របស់​ព្រះ​អង្គពិតប្រាកដ ។

លោក កឹម សុខា បន្តទៀតថា បើយើងគ្រាន់តែនាំគ្នាសរសើរ ផ្សព្វផ្សាយ ហើយចប់ពីហ្នឹងទៅ

ធ្វើអ្វីផ្ទុយពីស្មារតីនៃកិច្ចព្រមព្រៀងទីក្រុងប៉ារីស គឺមានន័យថា យើងប្រមាថទៅលើស្មារតីនោះ ដែលព្រះករុណា ព្រះបាទ នរោត្តម សីហនុ ព្រះអង្គបានខិតខំយ៉ាងយកចិត្តទុកដាក់បំ​ផុតអស់​ពីព្រះកាយពលរបស់ទ្រង់ ។ លោកបន្តថា អញ្ចឹងចំណុចទាំងអស់ដែលយើងត្រូវបន្តនេះ យើង​ត្រូវរកដំណោះស្រាយ ជាជាងការបង្ករបញ្ហាតទៅទៀត ដែលទស្សនរបស់លោកពេលវេលា​ល្មមដល់ហើយ ក្នុងរយពេល២១ឆ្នាំនេះ ដែលបានបញ្ចប់សង្គ្រាមទៅហើយនោះ ខ្មែរ​នៅតែ​ឈ្លួសគ្នាដដែល ។

អនុប្រធានគណបក្ស សង្គ្រោះជាតិ ថ្ងៃអនាគតលោក កឹម សុខា បានមានប្រសាសន៏បន្តទៀត ថា ក៏ប៉ុន្តែនៅពេលបច្ចុប្បន្ននេះ គឺគេបានធ្វើឲ្យខ្មែរឈឺផ្សារអត់ឈប់ឈរនៅឡើយទេ បើទោះ បីជាមានកិច្ចព្រមព្រៀងទីក្រុងប៉ាសីសទៅហើយក៏ដោយ ។ ដូច្នេះការផ្សះផ្សារជាតិ មិនមែន ឈរទៅលើភាគីម្ខាងថា ចង់ធ្វើអ្វីតាមតែចិត្តរបស់ខ្លួនឯងនោះទេ ក្នុងនោះដើម្បីផ្សះផ្សារជាតិ បានត្រូវតែគ្រប់ពីភាគីនយោបាយទាំងអស់អង្គុយជាមួយគ្នា ជជែកគ្នា និងដោះស្រាយបញ្ហា ជាតិជាមួយគ្នា ។

លោក កឹម សុខា បានបន្តថា មេដឹកនាំប្រទេសនាពេលបច្ចុប្បន្ននេះ គឺទទួលបានជ័យជំនះជា ជ័យជំនះដែលបណ្តោះអាសន្នទេ ពីព្រោះដោយសារតែគេមិនទាន់បានឲ្យភាគីទាំងអស់អាច អង្គុយនិយាយជាមួយគ្នាបាន ។ ក្នុងនោះលោក កឹម សុខា ក៏បានធ្វើការអំពាវនាវឲ្យគ្រប់ភាគី នយោបាយទាំងអស់ គ្រប់គណបក្សទាំងអស់ គឺអ្នកឈ្នះបញ្ចប់ធ្វើឲ្យអ្នកចាញ់ឈឺផ្សារត្រូវតែ បញ្ឈប់ ហើយអ្នកចាញ់ក៏បញ្ឈប់នូវការដែលរើសអើង ឬក៏មានការប្រកាន់ថា អ្នកឈ្នះត្រូវ​តែ​ជាខ្មាំង និងជាសត្រូវ ហើយអ្នកឈ្នះក៏មិនត្រូវទុកអ្នកចាញ់ជាសត្រូវរបស់ខ្លួនផងដែរ ។

លោក កឹម សុខា បន្តថា អញ្ចឹងនយោបាយខ្មែរតែមួយរួបរួមខ្មែរ គឺមិនយកខ្មែរណាជាសត្រូវ នេះជាគោលនយោបាយរបស់គណបក្ស សង្គ្រោះជាតិ ។ ដោយលោកបានថ្លែងទៀតថា រូប លោក និងលោក សម រង្ស៊ី ទើបតែជួបគ្នាថ្មីៗនៅប្រទេសអូស្ត្រាលី និងញ៉ូស៊ែឡែន គឺយើង​បានបញ្ជាក់ហើយថា នយោបាយរបស់យើងទៅមុខ គឺនយោបាយមិនយកខ្មែរណាជាសត្រូវ មិនមានការគុំគួនសងសឹកខ្មែរ ហើយកម្លាំងខ្មែរទាំងអស់ត្រូវតែមានឯកភាពជាតិ ក្នុងការដោះ ស្រាយបញ្ហាជាតិ ។ ដូច្នេះបើយើងមានបញ្ហាមួយហ្នឹង យើងអាចដោះស្រាយបាន ឯកភាព​ជាតិបាន បញ្ចប់ការឈឺផ្សារបាន ហើយយើងផ្សះផ្សារជាតិបាន និងបញ្ហាស្មារតីកិច្ចព្រមព្រៀង ទីក្រុងប៉ារីស រួមជាមួយនិងអធិបតេយ្យភាព បូរណភាពទឹកដី ក៏យើងអាចដោះបានផងដែរ ក៏ ដូចជាបញ្ហាកសាងប្រទេសជាតិក៏ដោះបាន ។ លោក កឹម សុខា​បន្តទៀតថា តែប្រសិនបើ ដោះ​បញ្ហាផ្សះផ្សារជាតិ បង្រួមបង្រួមជាតិ ឯកភាពជាតិមិនបានទេ ទឹកដីក៏ដោះមិនបាន កសាង​ប្រទេសឲ្យមានប្រជាធិបតេយ្យ ឲ្យប្រជារាស្រ្តមានជីវភាពធូធារក៏ដោះមិនបានជាដាច់ ខាត ដែលទាំងអស់នេះគឺជាទស្សនយល់ឃើញរបស់លោក ។

ជាការពិតណាស់ ប្រទេសជាតិអាចរីកចំរើនទៅបាន គឺអាស្រ័យលើការបង្រួបបង្រួមជាតិ ផ្សះ ផ្សារជាតិ និងឯកភាព បូរភាពទឹកដី និងមិនយកខ្មែរគ្នាឯងធ្វើជាសត្រូវ ដែលទាំងអស់នេះគឺជា គោលជំហ៊រ និងជាគោនយោបាយរបស់គណបក្ស សង្គ្រោះជាតិ ឥតងាករេនោះ ៕