ពលរដ្ឋម៉ាឡេស៊ីជាង១០០០នាក់ តវ៉ានឹងគម្រោងប្រេង
ក្រុង គូឡាឡុំពួ: ពលរដ្ឋរាប់ពាន់នាក់ បានជួបជុំគ្នានៅភាគខាងត្បូងម៉ាឡេស៊ីកាលពីថ្ងៃអាទិត្យប្រឆាំង នឹងមជ្ឈមណ្ឌលប្រេងដែលគាំទ្រដោយរដ្ឋាភិបាលដែលមានតម្លៃ៥៦ពាន់ លានដុល្លារដែលពួកគេនិយាយថា នឹងបង្ខំឲ្យពលរដ្ឋរាប់ពាន់នាក់ចេញពីលំនៅដ្ឋាន និងបំផ្លាញសហគមន៍នេសាទ។
ក្រុម អ្នកបរិស្ថានមកពីទូទាំងប្រទេស បានជួបជុំគ្នានៅក្នុងទីប្រជុំជនផេនហ្គេរ៉ាងនៅឆ្នេរសមុទ្រដ៏ ស្ងប់ស្ងាត់ ជាទីដែលគម្រោងនាំមុខដោយក្រុមហ៊ុនប្រេងដ៏ធំរបស់រដ្ឋឈ្មោះ ប៉េត្រូណាស និងចូលរួមដោយក្រុមហ៊ុនឯកជនផងគ្រោងនឹងបញ្ចប់នៅត្រឹមឆ្នាំ២០១៦ ។
សម្ព័ន្ធនៃអង្គការក្រៅរដ្ឋាភិបាលក្នុងតំបន់បាននិយាយថា គម្រោង Pengerang Integrated Petroleum Complex ក្នុងទឹកប្រាក់ចំនួន៥៦ពាន់លានដុល្លារគឺជាសួនឧស្សាហកម្មមួយ សម្រាប់ឧស្សាហកម្មប្រេង នឹងប៉ះពាល់ដល់ជីវភាពរស់នៅរបស់ក្រុមអ្នកស្រុក និងអ្នកនេសាទក្នុងតំបន់មួយ ដែលល្បីថាមានបង្កងសមុទ្រច្រើន។
កាលពីថ្ងៃអាទិត្យ ក្រុមអ្នកតវ៉ាភាគច្រើនបានស្លៀកពាក់ពណ៌បៃតង បានឮក្រុមមេដឹកនាំប្រឆាំងសន្យាថានឹងលុបគម្រោងនេះ បើសិនពួកគេឡើងកាន់អំណាចពីការបោះឆ្នោតជាតិដែលត្រូវធ្វើនៅពាក់ កណ្ដាលឆ្នាំក្រោយ។
ក្រុមអ្នករៀបចំការតវ៉ាបាននិយាយថា បាតុករ៨ពាន់នាក់បានចូលរួម ទោះបីរបាយការណ៍ជាច្រើន បានប៉ាន់ស្មានថា ហ្វូងមនុស្សពិតតិចជាងពាក់កណ្ដាលនៃតួលេខនោះក៏ដោយ។
អ្នកស្រីអានីស អាហ្វីដា ម៉ូដ អាស្លី ដែលកំពុងដឹក នាំក្រុមប្រឆាំងធ្វើការតវ៉ា បាននិយាយថា៖«យើងចង់បានការអភិវឌ្ឍ ប៉ុន្តែមិនមែនគាបសង្កត់ពលរដ្ឋនោះទេ។ រដ្ឋាភិបាល ត្រូវផ្ដល់ឲ្យសាធារណជននូវសិទ្ធិក្នុងការសម្រេចពីទីកន្លែងនៃ គម្រោងនេះ»៕
No comments:
Post a Comment
yes