នៅក្រោយពេលព្រះករុណាព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ទ្រង់យាងចូលទិវង្គត មហាជនជាច្រើនបានមានចំណាប់អារម្មណ៍ខ្លាំងទៅលើបញ្ហាអនាគតរបស់រាជានិយម និងការបង្រួបបង្រួមជាតិ។
ប្រជាពលរដ្ឋនាំគ្នាទិញរូបព្រះឆាយាល័ក្ខណ៍ព្រះមហាវីរក្សត្រ នរោត្ដម សីហនុ នៅខាងមុខព្រះបរមរាជវាំង កាលពីថ្ងៃទី២២ ខែតុលា ឆ្នាំ២០១២។
ប៉ុន្តែអ្នកនយោបាយ និងអ្នកវិភាគបញ្ហាសង្គមបានមើលឃើញថា ថ្វីត្បិតតែរាជានិយមនៅកម្ពុជា ចេះតែមានវិបត្តិជាបន្តបន្ទាប់ ប៉ុន្តែសង្គមខ្មែរនៅតែត្រូវការរបបរាជានិយម ជាពិសេសស្ថាប័នរាជបល្ល័ង្កនៅតែជាស៊ីម៉ងត៍ផ្សារភ្ជាប់ និងជាបង្គោល ដើម្បីទាញរឹតខ្មែរគ្រប់និន្នាការទាំងអស់ឲ្យចេះអង្គុយធ្វើការជាមួយគ្នា ដោយឈរលើឆន្ទៈរួម គឺត្រូវគិតពីប្រយោជន៍ជាតិជាធំ។
អ្នកនយោបាយជើងចាស់មួយចំនួននៅតែមានសុទិដ្ឋិនិយមចំពោះរបបរាជានិយម ព្រមទាំងមានជំនឿថា ប្រជាប្រិយភាពនៃរបបនេះនឹងមិនព្រមចុះឡើយ បើទោះបីជាអវត្តមានសម្ដេចព្រះ នរោត្តម សីហនុ ក៏ដោយចុះ។
អតីតឧបនាយករដ្ឋមន្ត្រី និងជារដ្ឋមន្ត្រីក្រសួងអភិវឌ្ឍន៍ជនបទ គឺព្រឹទ្ធាចារ្យ លឺ ឡាយស្រេង។ លោកមានប្រសាសន៍ថា ទឹកចិត្តប្រជារាស្ត្រខ្មែរនៅតែមានសន្តានចិត្តស្រលាញ់រាជានិយម ចង់ឲ្យប្រទេសខ្លួននៅតែមានស្ថាប័នរាជបល្ល័ង្ក ព្រះមហាក្សត្រជានិច្ច។
លោកបន្តថា ជាងនេះទៅទៀត បក្សនយោបាយនានាក៏ត្រូវការអង្គព្រះមហាក្សត្រជាអ្នកផ្សះផ្សានៅពេលមានវិបត្តិម្តងៗ។
បើទោះបីជាមានការអះអាងបែបនេះក្តី ក៏មានប្រជាពលរដ្ឋមួយចំនួននៅតែមានក្តីបារម្ភចំពោះវាសនាអនាគតរបស់រាជានិយម ហើយថា ការបាត់បង់ព្រះមហាវីរក្សត្រនៅពេលនេះ ហាក់បីដូចជាបាត់បង្គោល ឬតួអង្គមួយយ៉ាងសំខាន់ក្នុងការបង្រួមបង្រួមជាតិ ផ្សះផ្សាជាតិ ឬរក្សាឲ្យមានឯកភាពជាតិខ្មែររឹងមាំយូរអង្វែងទៅមុខទៀតនោះ។
ទោះយ៉ាងណា របបរាជានិយមត្រូវបានគាំទ្រដោយច្បាប់កំពូលរបស់ជាតិទៅហើយ។ រដ្ឋធម្មនុញ្ញនៃព្រះរាជាណាចក្រកម្ពុជា ឆ្នាំ១៩៩៣ បានចែងថា ប្រទេសកម្ពុជា ជាព្រះរាជាណាចក្រដែលព្រះមហាក្សត្រ ប្រតិបត្តិតាមរដ្ឋធម្មនុញ្ញ និងតាមលទ្ធិប្រជាធិបតេយ្យសេរីពហុបក្ស។
អតីតរដ្ឋមន្ត្រីក្រសួងកិច្ចការនារី បច្ចុប្បន្នជាមន្ត្រីជាន់ខ្ពស់នៃគណបក្សសិទ្ធិមនុស្ស លោក គៀត សុគន្ធ។ លោកមានប្រសាសន៍ចាប់អារម្មណ៍ដែរថា រាជានិយមមានសារសំខាន់ណាស់សម្រាប់កម្ពុជា ទាំងពេលបច្ចុប្បន្ន និងពេលអនាគត ពីព្រោះលោកយល់ថា ទៅអនាគតបើគេអាចរក្សារាជានិយមបាន បានន័យថា កម្ពុជាអាចរក្សាអត្តសញ្ញាណជាតិខ្លួនបានល្អ។
ទាក់ទងនឹងប្រជាប្រិយភាពរាជានិយមទៅថ្ងៃមុខយ៉ាងណានោះ លោកបញ្ជាក់ថា គឺអាស្រ័យលើប្រជាពលរដ្ឋខ្មែរគ្រប់គ្នាមានសាមគ្គីភាព មានឯកភាពជាតិនៅជុំវិញព្រះរាជារបស់ខ្លួនបច្ចុប្បន្ន។លោកបន្តថា កន្លងមកអតីតព្រះមហាក្សត្រ សម្ដេចព្រះ នរោត្តម សីហនុ ព្រះអង្គបានទុកស្នាព្រះហស្ត និងបទពិសោធន៍ជាច្រើនដែលបង្ហាញពីភាពរុងរឿងនៃរបបរាជានិយម ដែលមានការឯកភាពជាតិ មានសាមគ្គីភាពក្នុងការអភិវឌ្ឍន៍ប្រទេសឲ្យបានរីកចំរើន។
លោកបង្ហាញទៀតថា នៅក្នុងរជ្ជកាលសម្ដេចព្រះ នរោត្តម សីហនុ ទ្រង់ចេះធ្វើឲ្យប្រទេសកម្ពុជា ក្លាយជាគុជនៅអាស៊ី ដែលបង្ហាញឲ្យឃើញពីតម្លៃរបស់ខ្មែរនៅលើឆាកអន្តរជាតិ។
លោក គៀត សុគន្ធ ក៏បានប្រៀបធៀបមកសង្គមគ្រួសារតូចដែរថា នៅពេលដែលមេគ្រួសារមានឪពុកម្ដាយជាដើមបាត់បង់ទៅ ជាធម្មតាកូនចៅតែងតែមានការបែកបាក់គ្នា ឬលែងមានភាពជិតស្និទ្ធនឹងគ្នាជាដើម។ ប៉ុន្តែសម្រាប់សង្គមជាតិនៅពេលនេះ មានភាពខុសគ្នាពីសង្គមគ្រួសាររបស់ពលរដ្ឋ។
សម្រាប់អ្នកស្រាវជ្រាវលើការអភិវឌ្ឍសង្គម លោក កែម ឡី លោកឆ្លុះបញ្ចាំងឃើញដែរថា អនាគតរាជានិយមនឹងមិនមានការប្រែប្រួលខ្លាំងនោះទេ។ ទន្ទឹមគ្នានេះ អ្នកនយោបាយសព្វថ្ងៃនៅតែពឹងផ្អែកច្រើនលើស្ថាប័នព្រះមហាក្សត្រ។
លោកបន្តថា ដើម្បីរក្សាស្ថិរភាព និងដើម្បីគ្រប់ភាគីអាចពឹងពាក់លើស្ថាប័នព្រះមហាក្សត្របាន គេគួរតែពង្រឹងសសរស្ដម្ភទាំង ៥ ជុំវិញព្រះរាជបល្ល័ង្ក។
ទីប្រឹក្សាអមព្រះរាជខុទ្ទកាល័យព្រះមហាក្សត្រ បានឲ្យដឹងនៅថ្ងៃទី១៦ តុលា ថា ព្រះករុណាព្រះបាទសម្ដេចព្រះ នរោត្តម សីហនុ ព្រះមហាវីរក្សត្រនៃព្រះរាជាណាចក្រកម្ពុជា នៅមុនព្រះអង្គសោយទិវង្គត ព្រះអង្គមានព្រះរាជឱង្កាណែនាំដល់ព្រះរាជវង្សានុវង្សឲ្យធ្វើអំពើល្អនៅក្នុងសង្គម និងផ្ដល់ភាពយុត្តិធម៌ដល់ប្រជារាស្ត្រខ្មែរទូទៅ។
អតីតលេខាផ្ទាល់ព្រះមហាវីរក្សត្រ និងជាទីប្រឹក្សាអមព្រះរាជខុទ្ទកាល័យ ព្រះមហាក្សត្រ ព្រះអង្គម្ចាស់ ស៊ីសុវត្ថិ ធម្មិកោ មានព្រះរាជបន្ទូលថា នៅពេលព្រះរាជវង្សានុវង្សទៅថ្វាយបង្គំគាល់អតីតព្រះមហាក្សត្រ សម្ដេចព្រះ នរោត្តម សីហនុ កាលពីទ្រង់នៅមានព្រះជន្ម ព្រះអង្គតែងតែលើកអំពីគោលបំណងសំខាន់របស់ព្រះអង្គឲ្យមានការបង្រួបបង្រួមជាតិ។
របបរាជានិយមនៅកម្ពុជា តែងតែមានការវាយប្រហារជាច្រើនជំនាន់មកហើយ ដូចជានៅក្នុងរបបសាធារណរដ្ឋខ្មែររបស់លោកសេនាប្រមុខ លន់ នល់ របបកម្ពុជាប្រជាធិបតេយ្យរបស់ខ្មែរក្រហម និងរបបសាធារណរដ្ឋប្រជាមានិតកម្ពុជាជាដើម។ ប៉ុន្តែរាជានិយមនៅតែរក្សាជំហរ និងកិត្តិនាមបានរហូតមកដល់ពេលសព្វថ្ងៃនេះ ហើយការគោរពព្រះរាជានៅតែដក់ជាប់ក្នុងបេះដូងប្រជាពលរដ្ឋខ្មែរ៕
No comments:
Post a Comment
yes