ភ្នំពេញ៖ នាព្រឹកថ្ងៃទី ២៣ តុលានេះកម្លាំងនគរបាលនៃស្នងការរាជធានីភ្នំពេញបាននាំខ្លួនស្ត្រីជនជាតិចិនម្នាក់ដែលបានហែក រូបព្រះឆាយាល័ក្ខណ៍ព្រះមហាវីរក្សត្រ នៅក្នុងរោងចក្រនោះត្រូវបានបញ្ជូនមកសាលាដំបូងរាជធានីភ្នំពេញដើម្បីធ្វើការសាកសួរបន្ត។
ស្ត្រីជនជាតិចិននោះគឺជាអ្នកគ្រប់គ្រងរោងចក្រកាត់ដេរឈ្មោះ TOP WORLD ស្ថិតនៅសង្កាត់ក្បាលកោះ ខណ្ឌមានជ័យ បានហែករូបព្រះឆាយាល័ក្ខណ៍ព្រះមហាវីរក្សត្រ សម្តេច ព្រះនរោត្តមសីហនុ កាលពីព្រឹកថ្ងៃទី២២ តុលា ឆ្នាំ២០១២ នៅក្នុងរោងចក្រ ខាងលើនេះដែល កម្មការិនីម្នាក់បានយករូបឆាយាល័ក្ខណ៍សម្តេចឳមកមើលនោះ។
មន្ត្រីនគរបាលបានបញ្ជាក់ឱ្យដឹងថា ស្ត្រីជនជាតិចិនរូបនេះនឹងត្រូវប្រឈមមុខនឹងការចោទប្រកាន់ពីបទ រំលោភលើរដ្ឋធម្មនុញ្ញ និងច្បាប់ព្រហ្មទណ្ឌនៃព្រះរាជាណាចក្រកម្ពុជា ដែលបានចែញថា អង្គអតីតព្រះមហាក្សត្រមិនអាចរំលោភបំពានបានឡើយ។
មន្ត្រីនគរបាលដដែលបានបញ្ជាក់បន្ថែមថា ស្ត្រីជនជាតិចិនរូបនេះ បានដណ្តើមយករូបព្រះឆាយាល័ក្ខណ៍ព្រះមហាវីរក្សត្រពីកម្មករនៅក្នុងរោងចក្រ ខណៈកម្មករកំពុងតែមើលនោះ យកមកហែកចោល ព្រមទាំងជាន់ឈ្លីលើដីថែមទៀតផង។ ភ្លាមៗនោះ ក្រុមកម្មករបានផ្ទុះកំហឹងតវ៉ាយ៉ាងខ្លាំងក្លា ចំពោះស្ត្រីជនជាតិចិនរូបនេះដែលបានមើលងាយ អង្គព្រះមហាក្សត្រខ្មែរ ខណៈដែល ប្រជាជនទូទាំងប្រទេសកំពុងតែកាន់ទុក្ខ គោរពចំពោះព្រះបរមសពព្រះមហាវីរក្សត្រ។ ក្រុមកម្មករបានឱ្យស្ត្រីជនជាតិចិនរូបនេះ សុំទោសចំពោះទង្វើប្រមាថ មើលងាយលើអង្គព្រះមហាវីរក្សត្រព្រមទាំងឱ្យសមត្ថកិច្ចចាត់ការទៅតាមផ្លូវច្បាប់៕
No comments:
Post a Comment
yes