ពលរដ្ឋអាមេរិកមើលលទ្ធផលបោះឆ្នោតអាមេរិកតាមទូរទស្សន៍នៅ
META house ម្សិលមិញ
ភ្នំពេញៈ បើទោះបីជាវាមិនរីករាយខ្លាំងដូចទីក្រុង Chicago ឬស្រពាប់ស្រពោនដូចទីក្រុង Boston ក៏ដោយ ប៉ុន្តែអារម្មណ៍របស់ជនជាតិអាមេរិក និងជនបរទេស នៅរាជធានីភ្នំពេញមានលក្ខណៈស្វាហាប់ ខណៈពេលដែលសន្លឹកឆ្នោត បានរាប់ក្នុងការបោះឆ្នោតជ្រើសរើសប្រធានាធិបតីសហរដ្ឋអាមេរិក កាលពីម្សិលមិញ។
ខណៈពេលកំពុងកាន់តំណែងជាប្រធានាធិបតី លោក បារ៉ាក់ អូបាម៉ា ទីបំផុតបានទទួលជ័យជម្នះ ដោយសំឡេងច្រើនលើសលប់ ហើយការពិភាក្សាក្នុងប្រព័ន្ធផ្សព្វផ្សាយជាច្រើនម៉ោង មុនដល់សេចក្តីប្រកាសជ័យជម្នះ បានធ្វើឲ្យជនបរទេសរស់នៅក្នុងរាជធានីភ្នំពេញអន្ទះសា។
ភ្លាមៗបន្ទាប់ពី CNN បានផ្សាយពីជ័យជម្នះ របស់លោក អូបាម៉ា លោកស្រី Taryn Schwilling កវី និងបញ្ញវន្ត Fullbright នៅកម្ពុជា បានឲ្យដឹងថា៖ «វាជារឿងតក់ស្លត់ក្នុងចិត្ត»។
លោក ស្រី Schwilling មិនបានស្តាប់ពីការប្រកាសជ័យជម្នះរបស់លោក អូបាម៉ា ទេ ប៉ុន្តែលោកស្រី ដោយក្នុងដៃកាន់ស្រាបៀរនៅពិធី Democrats Abroad រៀបចំនៅ Meta House បានថ្លែងថា៖ «ខ្ញុំរីករាយ ... ដូច្នេះ វាជាស្រាបៀរសាទរ មិនមែនជាស្រាបៀរបំបាត់ទុក្ខនោះទេ»។
លោក ពេជ្រ សុភី អ្នកប្រឹក្សាពាណិជ្ជកម្ម ជាជនជាតិកម្ពុជា ដែលបានផ្លាស់ទៅនៅសហរដ្ឋអាមេរិកក្នុងឋានៈជាជនភៀសខ្លួន ហើយក្រោយមក ទទួលបានសញ្ជាតិអាមេរិក បានថ្លែងថា រូបលោកក៏បានបោះឆ្នោតឲ្យលោក អូបាម៉ាផងដែរ។ ដោយកត់សម្គាល់ ថា លោកប្រធានាធិបតីមិនចាត់ទុកបញ្ហាជាស ឬខ្មៅ លោកបានឲ្យដឹងតាមទូរស័ព្ទថា៖ «គាត់ល្អសម្រាប់ប្រទេស ហើយគាត់ល្អសម្រាប់ប្រទេសដទៃទៀតនៅលើពិភពលោក។ ខ្ញុំគិតថា លោក អូបាម៉ា ប្រើទស្សនវិស័យប្រផេះចំពោះពិភពលោក»។ ដោយលើកឡើងអំពីការទូត លោកបានបន្ថែមថា៖«វាជាវិធីមួលដៃ។ អ្នកត្រូវចាប់ដៃជាមុនសិន»។
នៅក្នុងពិធីដែលបានរៀបចំឡើង កាលពីព្រឹកម្សិលមិញ ស្ថានទូតសហរដ្ឋអាមេរិក បានរៀបចំការធ្វើត្រាប់ ការបោះឆ្នោត ដោយរង់ចាំលទ្ធផលពីអាមេរិក។
ពិធីករទទួលបានសំឡេងសើច ក្អាកក្អាយ ខណៈពេលដែលខ្លួនបង្ហាញបេក្ខជនពីរនាក់ ដែលម្នាក់ធ្វើជាលោក អូបាម៉ា និងម្នាក់ទៀតជាលោក រ៉ុមនី ហើយប្រកាសលទ្ធផលនៃការធ្វើត្រាប់ការបោះឆ្នោតនោះ លោក អូបាម៉ា ឈ្នះ ៨០ ភាគរយ។
បន្ទាប់មក អ្នកធ្វើជា «លោក អូបាម៉ា» បាននិយាយបែបកំប្លែង ខណៈពេលចាប់ដៃជាមួយនឹងលោក William Todd ឯកអគ្គរដ្ឋទូតសហរដ្ឋអាមេរិកថា៖«យើងនឹងពិភាក្សាពីតំណែងរបស់ លោក ពេលក្រោយ»។
បន្ទាប់មក បុគ្គលិកស្ថានទូត សកម្មជន និងភ្ញៀវ បានពិភាក្សាអំពីនយោបាយតាមបែបការទូត។
លោក Sean McIntosh អ្នកនាំពាក្យស្ថានទូត បានថ្លែងថា៖ «ស្ថានទូតបានរៀបចំពិធីនេះរៀងរាល់ឆ្នាំ ដើម្បីបង្ហាញប្រទេសម្ចាស់ផ្ទះ អំពីលទិ្ធប្រជាធិបតេយ្យអាយុ ២៣០ ឆ្នាំរបស់អាមេរិក។ មិនត្រឹមតែកម្ពុជាទេ ប្រទេសប្រជាធិបតេយ្យកំពុងចាស់ទុំអាចរៀនសូត្រពីបទពិសោធនេះ»។
ប៉ុន្តែ នៅពេលសួរថា តើលោកបានបោះឆ្នោតឲ្យអ្នកណា លោក McIntosh បានបដិសេធមិនប្រាប់ទេ ដោយលោកថា លោកមិនបង្ហាញពីជម្រើសរបស់ខ្លួនឡើយ «បើទោះបីជាខ្ញុំមិនមែនជាអ្នកការទូតក៏ដោយ»។
អ្នកដទៃទៀត នៅស្ថានទូតផ្តល់ព័ត៌មានច្រើន។ លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា ដែលចូលរួមពិធីនេះ បានថ្លែងថា លោកគាំទ្រលោក អូបាម៉ា ដែលលោកថា ជា«មនុស្សស្មោះត្រង់ និងបើកចំហ»។ លោកបាននិយាយអំពីការបោះឆ្នោតអាមេរិកថា៖ «អ្នកបោះឆ្នោតមានការស្វិតស្វាញខ្លាំងក្លា ហើយនៅតែមានអរិយធម៌»។ លោកបានបន្តថា កម្ពុជាគួររៀនសូត្រតាមការបោះឆ្នោតដ៏ល្អនៅអាមេរិក។ «ការជជែក ឧទាហរណ៍ បេក្ខជនទាំងពីររិះគន់គ្នាទៅវិញទៅមក ពេលខ្លះ ខ្លាំងៗ ប៉ុន្តែ ចុងបញ្ចប់ ពួកគេអាចចាប់ដៃ ហើយពួកគេមិនធ្វើទុក្ខបុកម្នេញគ្នាទៅវិញទៅមកឡើយ»។
ផ្ទុយទៅ វិញ លោក ជឿង រ៉ាមិត្ត អ្នកចូលរួម បានថ្លែងថា លោកគាំទ្រលោក មីត រ៉ុមនី ដើម្បីការផ្លាស់ប្តូរពិតប្រាកដ។ សកម្មជនយុវជនអាយុ ២៧ ឆ្នាំនៃគណបក្ស សម រង្ស៊ី រូបនេះ បានថ្លែងថា៖ «គាត់ជាអ្នក ជំនួញអស្ចារ្យ ហើយគណបក្សរបស់គាត់តែងតែជួយប្រទេសដទៃទៀត ដែលធ្វើឲ្យប្រជាជនរបស់ខ្លួនមិនសប្បាយចិត្ត»។ «ពីប្រទេសខ្ញុំ ខ្ញុំមើលឃើញថា លោក អូបាម៉ា គ្រាន់តែនិយាយ មិនខិតខំដើម្បី... សេរីភាពបញ្ចេញមតិទេ»។
ខុសពីបរិយាកាសនៅស្ថានទូត នៅពិធី Democrats Abroad វិញបរិយាកាសមានភាពសប្បាយរីករាយ។
លោកស្រី Britt Farbo ប្រធានក្រុម បានថ្លែងថា ជោគជ័យលោក អូបាម៉ា បានផ្តល់សារៈសំខាន់មួយ ដល់ជនជាតិអាមេរិកនៅក្រៅប្រទេស គឺការទទួលស្គាល់។ លោកស្រីបានបន្តថា៖ «ការទទួលស្គាល់សហគមន៍ ជនជាតិអាមេរិក នៅក្រៅប្រទេស មានសារៈសំខាន់។ លោក អូបាម៉ា ធំលូតលាស់នៅក្រៅប្រទេស ម្តាយរបស់គាត់ ជាជនជាតិអាមេរិកនៅក្រៅប្រទេស។ ការទទួលស្គាល់មានន័យថា អ្នកមានឥទិ្ធពល»។
ប៉ុន្តែ អ្នកគាំទ្រ លោក រ៉ុមនី វិញ ហាក់ដូចជាមិនសូវបង្ហាញភាពលេចធ្លោ ដូចអ្នកគាំទ្រគណបក្សប្រជាធិបតេយ្យទេ កាលពីម្សិលមិញ ប៉ុន្តែ អ្នកគាំទ្រលោក រ៉ុមនី ម្នាក់នៅ Meta House បានថ្លែងថា លោកស្រីមិនខកចិត្តទាំងស្រុងចំពោះលទ្ធផលឡើយ។
អ្នកបោះឆ្នោតម្នាក់នេះ ដែលបានបដិសេធមិនបញ្ចេញឈ្មោះបន្តថា៖«ខ្ញុំគិតថាលោករ៉ុមនីមាន លក្ខណៈពិតនិយមក្នុងគោលនយោបាយ តែខ្ញុំមិនខកចិត្តចំពោះលទ្ធផលនេះទេ។ ប្រសិនបើអាមេរិកចង់ឲ្យលោក អូបាម៉ាឈ្នះនោះមិនថ្វីទេ»៕
No comments:
Post a Comment
yes