ក្រុមសមត្ថកិច្ចចម្រុះមួយក្រុមនៅខេត្តមណ្ឌលគិរី រងការចោទប្រកាន់ថា បានប្រព្រឹត្តអំពើពុករលួយ ជំរិតទារប្រាក់ពីប្រជាពលរដ្ឋអ្នកចូលព្រៃកាប់ឈើ ជាថ្នូរនឹងការដោះលែងរទេះក្របីដឹកឈើខុសច្បាប់ចំនួន ៤០រទេះ។ ក៏ប៉ុន្តែមន្ត្រីជំនាញព្រៃឈើអះអាងថា មិនបានដឹងពីការបង្ក្រាបការដឹកជញ្ជូនឈើខុសច្បាប់នោះទេ។
ប្រធានភូមិបាក់ខ្វែវ ឃុំរលួស ស្រុកសំបូរ ខេត្តក្រចេះ លោក នាង យីម នៅថ្ងៃអាទិត្យ ទី២៥ ខែវិច្ឆិកា ឆ្នាំ២០១២ មានប្រសាសន៍ឲ្យដឹងថា ក្រុមសមត្ថកិច្ចចម្រុះមួយក្រុម មានទាហាន ប៉ូលិស កងរាជអាវុធហត្ថស្រុកកោះញ៉ែក និងសមត្ថកិច្ចខេត្តមណ្ឌលគិរី បានប្រព្រឹត្តអំពើពុករលួយ ជំរិតទារប្រាក់ពីប្រជាពលរដ្ឋអស់ចំនួន ៣២លានរៀល។
លោក នាង យីម បញ្ជាក់ថា ប្រជាពលរដ្ឋរស់នៅក្នុងភូមិបាក់ខ្វែវ ៤២នាក់ ត្រូវមន្ត្រីយោធាខេត្តមណ្ឌលគិរី ឈ្មោះ វុធ បោកបញ្ឆោតឲ្យចូលព្រៃកាប់ឈើប្រណិតចេញពីព្រៃ ក្នុងតំបន់ស្រុកកោះញ៉ែក ខេត្តមណ្ឌលគិរី ជាប់ព្រំប្រទល់ឃុំរលួស ស្រុកសំបូរ ខេត្តក្រចេះ និងតម្រូវឲ្យប្រជាពលរដ្ឋម្ចាស់រទេះគោមួយគ្រឿង បង់ប្រាក់ ៣០ម៉ឺនរៀល ដើម្បីរត់ការជាមួយសមត្ថកិច្ចដទៃទៀត ទើបគេអនុញ្ញាតឲ្យចូលព្រៃកាប់ឈើ។
លោកបន្តថា នៅពេលប្រជាពលរដ្ឋបង់ប្រាក់ទៅឲ្យមន្ត្រីយោធានោះរួច ប្រជាពលរដ្ឋក៏បានចូលព្រៃកាប់ឈើ ក៏ប៉ុន្តែពេលដឹកជញ្ជូនឈើចេញពីព្រៃ កាលពីថ្ងៃទី២១ ខែវិច្ឆិកា ស្រាប់តែមានសមត្ថកិច្ចមួយក្រុមទៀតបានស្ទាក់បាញ់ជាច្រើនគ្រាប់ នៅចំណុចចុងព្រែកអូរគ្រៀង ធ្វើឲ្យគោពីរនឹមរត់ចោលរទេះចូលព្រៃបាត់ និងចាប់ឈើ ៤២រទេះ ម៉ាស៊ីនកាត់ឈើ ១០គ្រឿង និងរទេះគោ ៤២រទេះ យកទៅទុកនៅក្នុងព្រៃមួយចម្ងាយ ២០គីឡូម៉ែត្រ ពីស្រុកកោះញ៉ែក ហើយជំរិតទារប្រាក់ម្ចាស់រទេះគោម្នាក់ៗ ៨០ម៉ឺនរៀលបន្ថែមទៀត ទើបប្រគល់រទេះមកប្រជាពលរដ្ឋទាំង ៤០នាក់យកត្រឡប់មកភូមិវិញ។
លោក នាង យីម៖ «អត់មានដោះស្រាយនៅប៊ុយរ៉ូ (ការិយាល័យ) ទេ នៅនឹងព្រៃតែម្តង បង់តែលុយគេឲ្យចេញទៅ កាលណាមានលុយបង់ ៨០ម៉ឺន បង់គេឲ្យចេញមក។ បើអត់មានបង់ អត់ឲ្យចេញទេ ឲ្យនៅហ្នឹង។ គេថា ទាហានខេត្តទេ ប៉ុន្តែគេចុះបេសកកម្មដែរ ប៉េអឹមគេថា ខេត្តដែរ បើប៉ូលិសៗកោះញ៉ែក ឈ្មោះ អាវែង។ ឈើគេដាក់នៅព្រៃ មិនទាន់ដល់ស្រុកទេ កន្លែងជិតផ្លូវក្រុមហ៊ុនទេ មិនទាន់ដល់ស្រុកកោះញ៉ែក ១៧គីឡូទៀតបានដល់ស្រុកកោះញ៉ែក»។
ប្រជាពលរដ្ឋភូមិបាក់ខ្វែវ ចំនួនបីនាក់មានឈ្មោះ មៀង ពី នាង រ៉ៃ និង ឆឹម យី បានឲ្យដឹងថា ក្រុមសមត្ថកិច្ចដែលស្ទាក់បាញ់ និងជំរិតទារប្រាក់ពួកគាត់មានគ្នា ៧នាក់ មានកាំភ្លើងគ្រប់ដៃ និងប្រើប្រាស់រថយន្តបីគ្រឿង ក៏ប៉ុន្តែពួកគាត់ស្គាល់ឈ្មោះតែពីរនាក់ គឺឈ្មោះ ផាត ជាមន្ត្រីកងរាជអាវុធហត្ថខេត្ត និងឈ្មោះ វែង ជាទាហានស្រុកកោះញ៉ែក។
អភិបាលស្រុកកោះញ៉ែក លោក មើល សឿន បដិសេធថា លោកមិនបានចេញបទបញ្ជាណាមួយឲ្យក្រុមសមត្ថកិច្ចស្រុកចុះចាប់រទេះដឹកឈើប្រជាពលរដ្ឋនោះទេ ហើយក៏មិនឃើញមានក្រុមសមត្ថកិច្ចប្រដាប់អាវុធស្រុករាយការណ៍ពីករណីនេះដែរ។
លោកសន្និដ្ឋានថា ទំនងជាក្រុមសមត្ថកិច្ចដទៃក្រៅពីសមត្ថកិច្ចស្រុកកោះញ៉ែកវិញទេ៖ «អត់ដឹងផង គេអត់រាយការណ៍មកយើងផង។ បាទ! មិនមែនជាកម្លាំងរបស់ខ្ញុំទេ អត់មានការបញ្ជាពីស្រុកទេ ស្រុកអត់ដឹងផង»។
ដូចគ្នានេះដែរ នាយខណ្ឌរដ្ឋបាលព្រៃឈើខេត្តមណ្ឌលគិរី លោក កែប តក់ មានប្រសាសន៍ឲ្យដឹងថា មិនមានមន្ត្រីសមត្ថកិច្ចណារាយការណ៍ ឬផ្ដល់វត្ថុតាងឈើ និងម៉ាស៊ីនកាត់ឈើដែលគេរាយការណ៍ថា បានរឹបអូសពីប្រជាពលរដ្ឋនោះទេ។ លោកបន្តថា នឹងស្រាវជ្រាវរឿងនេះ៖ «អត់ដឹងផង ខាងក្រុមណា បែបខាងទាហាន ចាំមើលខ្ញុំឆែកឲ្យ»។
យ៉ាងនេះក្ដី ប្រធានភូមិបាក់ខ្វែវ លោក នាង យីម ឲ្យដឹងថា កន្លងទៅនេះប្រជាពលរដ្ឋនៅភូមិបាក់ខ្វែវ តែងតែចូលព្រៃកាប់ឈើប្រណិតពីស្រុកកោះញ៉ែក ដឹកជញ្ជូនតាមរទេះគោមកឃុំរលួស នាំចេញទៅលក់ទៅខេត្តក្រចេះ និងបានបង់ប្រាក់ឲ្យពួកសមត្ថកិច្ច មានប៉ូលិស អាវុធហត្ថ យោធា និងមន្ត្រីព្រៃឈើនៅតំបន់នោះ។ លោកបញ្ជាក់ថា រទេះគោមួយគ្រឿងរបស់ប្រជាពលរដ្ឋ អាចដឹកជញ្ជូនឈើចេញបានពី ៣ ទៅ ៥ផ្លាន៕
No comments:
Post a Comment
yes