៩-កុម្ភៈ-២០១០: អ្នកភូមិរស់នៅតាមដងទន្លេសេសានក្នុងខេត្តស្ទឹងត្រែង
ប្រើប្រាស់ទឹកទន្លេសម្រាប់ជីវភាពប្រចាំថ្ងៃ
រាជរដ្ឋាភិបាលបានអនុម័តជាផ្លូវការនូវគម្រោងសាងសង់ស្ថានីយទំនប់វារីអគ្គិសនីសេសានក្រោម២ នៅខេត្តស្ទឹងត្រែង បន្ទាប់ពីសិក្សាផលប៉ះពាល់ច្រើនលើកតាំងពីឆ្នាំ២០០៤ មក។
ចំណែកប្រជាពលរដ្ឋអ្នករងផលប៉ះពាល់ពីគម្រោងសាងសង់ទំនប់ អះអាងថា ប្រជាពលរដ្ឋមិនទាន់បានទទួលព័ត៌មានជាក់លាក់ស្ដីពីដំណោះស្រាយផលប៉ះពាល់ប្រជាពលរដ្ឋនៅឡើយ។
ប្រជាពលរដ្ឋរស់នៅតំបន់រងផលប៉ះពាល់ពីគម្រោងសាងសង់ទំនប់វារីអគ្គិសនីសេសានក្រោម២ សម្ដែងការព្រួយបារម្ភពីការផ្លាស់ប្ដូរទីលំនៅ និងសំណងផលប៉ះពាល់ដីធ្លី ផ្ទះសម្បែង ផលដំណាំពួកគាត់ ប្រសិនទំនប់វារីអគ្គិសនីចាប់ផ្ដើមកសាង។
តំណាងប្រជាពលរដ្ឋឃុំស្រែគរ លោក សៀក មេគង្គ និងជាមេឃុំស្រែគរ មានប្រសាសន៍បញ្ជាក់ថា ប្រជាពលរដ្ឋនៅក្នុងឃុំនេះ នឹងត្រូវជម្លៀសចេញ បន្ទាប់ពីទំនប់ត្រូវកសាងដោយសារតែមូលដ្ឋាននេះ គឺជាផ្ទៃអាងស្តុកទឹកនៃទំនប់វារីអគ្គិសនី។
លោកបន្តថា រហូតមកទល់ពេលនេះ ប្រជាពលរដ្ឋបានតវ៉ាជាច្រើនលើក មិនចង់ចាកចេញពីភូមិរបស់ពួកគាត់ទេ ពីព្រោះអាជ្ញាធរពាក់ព័ន្ធមិនបានឆ្លើយតបទៅនឹងសំណងផលប៉ះពាល់ និងការជម្លៀសទៅទីតាំងថ្មី ដែលប្រជាពលរដ្ឋអះអាងថា មិនមានលក្ខណៈអំណោយផលអាចប្រជាពលរដ្ឋទៅរស់នៅទីនោះបាន៖ «ទៅនៅត្រើយម្ខាង ដូចគ្មានកោះត្រើយអ៊ីចឹង ដូចឲ្យស្លាប់។ ផ្លូវអាស៊ាន វាស្រួល អនុវិទ្យាល័យក៏មាន ផ្សារក៏មាន អ៊ីចឹងអនាគតកូនចៅជំនាន់ក្រោយ ធនធានមនុស្សវាអាចរីកចម្រើន»។
យោងតាមសេចក្តីប្រកាសព័ត៌មានស្ដីពីកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី២ ខែវិច្ឆិកា កន្លងទៅ បានឲ្យដឹងថា គម្រោងវិនិយោគអភិវឌ្ឍន៍វារីអគ្គិសនីសេសានក្រោម២ នេះ មានអនុភាពផលិតថាមពលអគ្គិសនីកម្រិត ៤០០មេហ្គាវ៉ាត់ ឋិតក្នុងស្រុកសេសាន ខេត្តស្ទឹងត្រែង។ គម្រោងនេះត្រូវអនុវត្តដោយក្រុមហ៊ុនហាយដ្រូ ផៅវើ ឡូវើ សេសានធូ (HYDRO POWER LOWER SESAN 2) ដែលជាក្រុមហ៊ុនចម្រុះរវាងក្រុមហ៊ុនក្នុងស្រុកជាមួយក្រុមហ៊ុនមកពីប្រទេសវៀតណាម និងក្រុមហ៊ុនអគ្គិសនីដ៏ធំមកពីប្រទេសចិន ក្នុងគម្រោងទឹកប្រាក់ជាង ៧៨១លានដុល្លារ។
អាជ្ញាធរខេត្តស្ទឹងត្រែង បានឲ្យដឹងថា គម្រោងសាងសង់ទំនប់វារីអគ្គិសនីសេសាន២ នឹងអាចចាប់ផ្ដើមនៅឆ្នាំ២០១៣ ខាងមុខនេះ។
យ៉ាងនេះក្តី ប្រធានសមាគមអភិរក្សបរិស្ថាន លោក ទេព ប៊ុណ្ណារិទ្ធ កត់សម្គាល់ថា ក្រុមអាជ្ញាធរពាក់ព័ន្ធ និងក្រុមហ៊ុន គួរតែធ្វើការផ្សព្វផ្សាយឲ្យបានទូលំទូលាយស្ដីពីដំណោះស្រាយផលប៉ះពាល់ជូនប្រជាពលរដ្ឋបានដឹង មុនការសាងសង់ទំនប់ បើមិនដូច្នេះទេ បាតុភាពមិនល្អនឹងកើតមានដោយសារប្រជាពលរដ្ឋមិនបានទទួលព័ត៌មានជាក់លាក់ស្ដីពីបញ្ហានេះ៖ «យើងទាមទារឲ្យមានការពិភាក្សាជជែកគ្នា ដើម្បីរកដំណោះស្រាយមួយថា តើគាត់អាចរើទៅទីនោះ ឬមួយមានការចរចាទិញថ្មីឲ្យគាត់»។
ទាក់ទិនការព្រួយបារម្ភរបស់ប្រជាពលរដ្ឋនេះ អភិបាលខេត្តស្ទឹងត្រែង លោក ឡូយ សូផាត មានប្រសាសន៍បញ្ជាក់ថា រាជរដ្ឋាភិបាល និងក្រសួងពាក់ព័ន្ធ បានសិក្សាហ្មត់ចត់ និងមានគម្រោងដោះស្រាយផលប៉ះពាល់ប្រជាពលរដ្ឋត្រឹមត្រូវ ពីព្រោះគោលនយោបាយរបស់រាជរដ្ឋាភិបាលធ្វើយ៉ាងណាឲ្យការតាំងទីលំនៅថ្មីរបស់ប្រជាពលរដ្ឋមានលក្ខណៈប្រសើរជាងទីតាំងចាស់ រួមទាំងកសាងហេដ្ឋារចនាសម្ព័ន្ធ ផ្លូវ សាលារៀន និងប្រព័ន្ធធារាសាស្ត្រ សម្រាប់បម្រើវិស័យកសិកម្មជូនប្រជាពលរដ្ឋជាដើម។
លោក ឡូយ សូផាត៖ «ផ្ទៃដីដែលសម្ដេចលោកសម្រេចឲ្យថ្មីៗនេះ គឺមួយគ្រួសារត្រឹម ៥ហិកតារ គឺវាខ្ពស់ណាស់។ ដល់ពេលយើងទៅធ្វើ អញ្ជើញគាត់ទៅមើលដីហ្នឹងជាក់ស្ដែងទៀត មានភូមិ មានសហគមន៍ គាត់ទាំងអស់ទៅមើលថា តំបន់ហ្នឹងគាត់ទទួលយកហើយនៅ? បើគាត់ទទួលយកហើយ បានយើងកំណត់វាស់ចែកបង្ហាញប្លង់ទៅ គាត់ឃើញផ្ទះថ្មវាល្អជាងអ៊ីចឹង។ គាត់អាចបត់បែនបាន គាត់ចង់ធ្វើពីឈើក៏បាន គាត់ចង់យកលុយទៅសង់ខ្លួនគាត់ក៏បាន។ ដីកន្លែងណាដែលគាត់ឃើញថាល្អជាង គាត់សុំលុយទាំងអស់យកទៅធ្វើ យើងនៅតែផ្តល់ជូនគាត់»។
រាជរដ្ឋាភិបាលរំពឹងថា ការអភិវឌ្ឍស្ថានីយវារីអគ្គិសនីសេសានក្រោម២ នឹងទទួលបានចំណូលពន្ធសរុបជាមធ្យមប្រមាណ ២៩.៥៩លានដុល្លារអាមេរិក ក្នុង ១ឆ្នាំ ដោយមិនគិតដល់ពន្ធដទៃទៀតនៃការចែកចាយថាមពលអគ្គិសនីលក់បន្តឲ្យអ្នកប្រើប្រាស់៕
No comments:
Post a Comment
yes