ក្រុមអ្នកភូមិ និងមន្ត្រីមូលដ្ឋាន បានចោទចៅសង្កាត់និម្មិត ថាបានលក់បឹងធម្មជាតិដោយខុសច្បាប់ទៅឲ្យឈ្មួញនេសាទត្រីផ្ដាច់មុខ។ បឹងនោះមានឈ្មោះបឹងតាពេជ្រ ស្ថិតនៅភូមិថ្មសិន សង្កាត់និម្មិត ក្រុងប៉ោយប៉ែត ខេត្តបន្ទាយមានជ័យ។
ប្រជាពលរដ្ឋជាច្រើនគ្រួសារ បានទាមទារយកបឹងធម្មជាតិមួយមកដាក់ជាសម្បត្តិសាធារណៈវិញ។ បឹងនោះត្រូវចៅសង្កាត់និម្មិត ចុះហត្ថលេខាលក់ទៅឲ្យឈ្មួញធ្វើអាជីវកម្មនេសាទត្រីផ្ដាច់មុខ ដោយពុំអនុញ្ញាតឲ្យក្រុមអ្នកភូមិប្រើប្រាស់ទឹក និងនេសាទត្រីជាលក្ខណៈគ្រួសារនៅក្នុងបឹងបាននោះឡើយ។
អ្នកភូមិឈ្មោះ គឹម ញ៉ាញ បានថ្លែងនៅថ្ងៃទី៥ ខែវិច្ឆិកា ថា បឹងធម្មជាតិនោះបច្ចុប្បន្នគ្រប់គ្រងដោយឈ្មួញ ហើយក្រុមអ្នកភូមិមិនអាចទៅប្រកបរបរនេសាទត្រីជាលក្ខណៈគ្រួសារបានទេ៖«បឹងតាពេជ្រ ពីដើមជាបឹងដូនតារបស់ប្រជាពលរដ្ឋ សម្រាប់រកស៊ី។ ឥឡូវបុគ្គលយកទៅលក់ឲ្យឈ្មួញ។ ប្រជាពលរដ្ឋចុះរកអត់បានទេ វាដេញបីបួនថ្ងៃហើយ។ ប្រជាពលរដ្ឋសំណូមពរចង់បានឲ្យបឹងហ្នឹងដាក់ជាសម្បត្តិសាធារណៈ សម្រាប់ទុកទឹកប្រើប្រាស់នៅក្នុងភូមិ ទាក់ទងនេសាទត្រីចុះរកអត់បាន។ តែចុះ គេចាប់ផ្ដើមនាំបក្ខពួកគេមក។ ព្រឹកមិញគេជេរ ពួកអាបីបួនក្បាលហ្នឹង វាមានសិទ្ធិអីវា»។
ចៅសង្កាត់និម្មិត លោក ប៉ាល សេដ្ឋា បានបំភ្លឺថា នៅក្នុងសង្កាត់និម្មិត មានបឹងធម្មជាតិច្រើន ប៉ុន្តែលោកបានសម្រេចលក់បឹងតាពេជ្រ ជាបឹងសហគមន៍នោះ ដើម្បីយកថវិកាកសាងផ្លូវ និងទីស្នាក់ការនៅក្នុងភូមិថ្មសិន។ លោកចោទថា ប្រតិកម្មតវ៉ានេះ គឺបង្កឡើងដោយក្រុមមន្ត្រីមកពីគណបក្សប្រឆាំង។
លោក ម៉ក់ ដារិទ្ធិ ជំទប់ទី១ សង្កាត់និម្មិត បានថ្លែងនៅថ្ងៃទី៥ ខែវិច្ឆិកា ថា លោក ប៉ាល សេដ្ឋា ជាចៅសង្កាត់និម្មិត កាលពីថ្ងៃទី១ ខែវិច្ឆិកា ឆ្នាំ២០១២ បានសម្រេចលក់បឹងធម្មជាតិមួយកន្លែងនៅក្នុងភូមិថ្មសិន ទៅឲ្យឈ្មោះ ពិត ធា៖ «ចៅសង្កាត់ហ្នឹង គាត់ធ្វើខុសច្បាប់ ខុសនឹងច្បាប់គ្រប់គ្រងរដ្ឋបាលឃុំសង្កាត់ ពីព្រោះក្រុមប្រឹក្សាបានអនុម័តការពារទុកឲ្យប្រជាពលរដ្ឋរកស៊ី ហើយហេតុអីបានជាគាត់ហ៊ានចុះហត្ថលេខាទៅលក់បឹងឲ្យទៅឈ្មួញហ្នឹង។ យកលេសសមាគម ផ្គើននឹងប្រសាសន៍របស់សម្ដេច ហ៊ុន សែន ព្រោះ សម្ដេច ហ៊ុន សែន គាត់ប្រកាសបឹងបួរអូរឲ្យប្រជាពលរដ្ឋរកទៅ កុំឲ្យតែលក្ខណៈឆក់បូមបាច»។
កាលពីថ្ងៃទី២៧ ខែសីហា ឆ្នាំ២០១២ សមាជិកក្រុមប្រឹក្សាសង្កាត់និម្មិត បានបើកកិច្ចប្រជុំមួយ។ នៅក្នុងជំនួបនោះ ពួកគេបានស្នើសុំយកបឹងធម្មជាតិ នៅក្នុងសង្កាត់និម្មិត ទាំងអស់ មកទុកជាសម្បត្តិរួម ដើម្បីឲ្យប្រជាពលរដ្ឋនៅក្នុងមូលដ្ឋានអាចប្រកបរបរនេសាទជាលក្ខណៈគ្រួសារចិញ្ចឹមជីវិតប្រចាំថ្ងៃ។
ទាក់ទិនករណីនេះ មន្ត្រីនៃសមាគមអាដហុក (Adhoc) ប្រចាំខេត្តបន្ទាយមានជ័យ លោក ស៊ុំ ច័ន្ទគា ថ្លែងថា ចៅសង្កាត់និម្មិត កំពុងអនុវត្តផ្ទុយពីស្មារតីច្បាប់។ បឹងបួរធម្មជាតិទាំងអស់ ជាសម្បត្តិរបស់រដ្ឋ ដូច្នេះគេមិនអាចយកទៅលក់ដូរឲ្យបុគ្គលឯកជនបានទេ។ រដ្ឋជាអ្នកទទួលខុសត្រូវលើបឹងធម្មជាតិទាំងនោះ ចំណែកប្រជាពលរដ្ឋជាអ្នកអាស្រ័យផលជាសមូហភាព៖«មន្ត្រីដែលជាភ្នាក់ងាររបស់រដ្ឋ គួរធ្វើយ៉ាងណាដើម្បីការពារផលប្រយោជន៍របស់រដ្ឋ ឲ្យប្រជាពលរដ្ឋរបស់ខ្លួនបានអាស្រ័យផលទៅលើបឹងធម្មជាតិទាំងអស់នោះ ដោយមិនប្រកាន់វណ្ណៈ និងការរើសអើង។ នេះជាក្រឹត្យក្រមមួយដែលយើងជាមន្ត្រីភ្នាក់ងាររបស់រដ្ឋ គឺការគ្រប់គ្រងជួយការពារផលប្រយោជន៍សាធារណៈរបស់រដ្ឋ ជូនប្រជាពលរដ្ឋយើង»។
លោក ស៊ុំ ច័ន្ទគា គិតថា សង្កាត់និម្មិត ទំនងមិនទាន់ធ្លាក់ខ្លួនក្រីក្ររហូតទៅយកបឹងសាធារណៈលក់ ដើម្បីបានលុយធ្វើទីស្នាក់ការភូមិនោះទេ។ ការកសាងទីស្នាក់ការភូមិ ពួកគេត្រូវលើកគម្រោងជាក់លាក់មួយទៅថ្នាក់ជាតិ ដើម្បីបានថវិកាយកទៅអភិវឌ្ឍនៅក្នុងមូលដ្ឋាន៕
No comments:
Post a Comment
yes