តុលាការខេត្តកំពង់ឆ្នាំង នៅល្ងាចថ្ងៃទី៨ វិច្ឆិកា បានសម្រេចដាក់ពន្ធនាគារសមាជិកក្រុមប្រឹក្សាស្រុករលាប្អៀរ គឺលោក ជា ឈឿន តាមបណ្ដឹងរបស់លោក សុខ ប៊ុន ជាប្រជាពលរដ្ឋរស់នៅរាជធានីភ្នំពេញ ដែលបានប្ដឹងចោទប្រកាន់ពីបទឆបោក និងក្លែងបន្លំលិខិតសាធារណៈ។
តំណាងស្ថាប័នអយ្យការអមសាលាដំបូងខេត្តកំពង់ឆ្នាំង បានប្រាប់វិទ្យុអាស៊ីសេរី ក្នុងលក្ខខណ្ឌមិនឲ្យប្រើប្រាស់សំឡេង លោកថាក្នុងនាមជាតំណាងឲ្យស្ថាប័នអយ្យការ លោកបានសម្រេចចោទប្រកាន់លោក ជា ឈឿង ពីបទឆបោក និងក្លែងបន្លំលិខិតសាធារណៈ។ តំណាងស្ថាប័នអយ្យការអមសាលាដំបូងខេត្តកំពង់ឆ្នាំង រូបនេះបន្តថា ដើមបណ្ដឹង គឺលោក សុខ ប៊ុន មានឯកសារគ្រប់គ្រាន់ក្នុងការចោទប្រកាន់ ដែលបង្ហាញថា លោកបានប្រគល់ប្រាក់ចំនួន ២៥ម៉ឺនដុល្លារសហរដ្ឋអាមេរិក ទៅឲ្យចុងចោទ គឺលោក ជា ឈឿង ជាសមាជិកក្រុមប្រឹក្សាស្រុករលាប្អៀរ កាលពីថ្ងៃទី៩ ខែមេសា ឆ្នាំ២០១២។ ឯលោក ជា ឈឿង ត្រូវប្រគល់ដីចំនួន ១.៣០០ហិកតារមកឲ្យលោក សុខ ប៊ុន។ តែលោក ជា ឈឿង ពុំមានដីប្រគល់ឲ្យលោក សុខ ប៊ុន តាមការសន្យានោះទេ។
យ៉ាងនេះក្ដី មេឃុំស្វាយជ្រំ គឺលោក យី ភួន មានប្រសាសន៍ថា លោក ជា ឈឿង ពុំមានបំណងឆបោកតាមពាក្យបណ្ដឹងរបស់ដើមចោទនោះទេ។ តាមពិត គឺលោកគ្រាន់តែរកដីពុំទាន់គ្រប់ចំនួនតាមកិច្ចសន្យាប៉ុណ្ណោះ៖ «តាមដែលខ្ញុំក្ដាប់បាននោះ គឺដីមិនថាអត់នោះទេ។ ប៉ុន្តែ ដោយការទិញដូររបស់គាត់មានការឆក់ល្វែង។ ទិញអត់ទាន់ឲ្យគេ ដល់តែលើសកិច្ចសន្យាទៅ។ គាត់ទិញបានជិត ៣០០ហិកតារដែរ តែដល់ទឹកឡើងទៅ គាត់ធ្វើការវាស់វែងអត់ទាន់។ មួយផ្នែក គឺលើសកិច្ចសន្យា ហើយមួយផ្នែកទៀត គឺមិនទាន់គ្រប់ចំនួនឲ្យគេៗក៏ប្ដឹងគាត់ទៅ»។
ប្រភពពីអាជ្ញាធរមានសមត្ថកិច្ចដែលសុំមិនបញ្ចេញឈ្មោះម្នាក់ បានឲ្យដឹងថា អតីតសមាជិកក្រុមប្រឹក្សាស្រុករលាប្អៀរ បច្ចុប្បន្នជាជនជាប់សង្ស័យឈ្មោះ ជា ឈឿង ទិញបានដីចំនួន ៣៥០ហិកតារដែរ នៅក្នុងឃុំស្វាយជ្រំ តែចំនួននេះមិនគ្រប់តាមការសន្យា។ ប្រភពដដែលបានឲ្យដឹងទៀតថា ដីមួយភាគធំដែលលោក ជា ឈឿង អះអាងថា បានទិញនោះមានផលប៉ះពាល់ជាមួយប្រជាពលរដ្ឋ និងមួយចំនួនទៀត ជាដីស្ថិតក្នុងតំបន់ព្រៃលិចទឹក ដែលជាដីសាធារណៈរបស់រដ្ឋ ស្ថិតក្នុងភូមិចំនួន ៥ គឺ ភូមិទួលទ្រា ភូមិឆ្នង់កំបុត ភូមិស្វាយជ្រំ ភូមិសីឡាង និងភូមិឧទុម្ពរ។
ប្រធានក្រុមប្រឹក្សាស្រុករលាប្អៀរ គឺលោក ពេជ្រ សម្បត្តិ មានប្រសាសន៍ថា លោកពុំបានដឹងពីបញ្ហាការចាប់លោក ជា ឈឿង ដាក់ពន្ធនាគារនោះទេ។ លោកថា បញ្ហានេះជារឿងឯកជនពុំមានពាក់ព័ន្ធអ្វីជាមួយការងារជាសមាជិកក្រុមប្រឹក្សាស្រុករបស់លោក ជា ឈឿង នោះទេ៖ «ខ្ញុំអត់បានដឹងទេ កិច្ចការនេះ ហេតុនេះខ្ញុំមិនអាចធ្វើអត្ថាធិប្បាយអ្វីជូននោះទេ ស្រេចតែលើនីតិវិធីរបស់តុលាការទេ។ បាទ! អត់មានទេ នេះជាការងារឯកជនរបស់គាត់ ហេតុនេះស្រេចតែលើនីតិវិធីរបស់តុលាការ»។
ដូចគ្នានេះដែរ អភិបាលរងខេត្តកំពង់ឆ្នាំង លោក ចេង ញ៉ាន់ មានប្រសាសន៍ថា នេះជារឿងបុគ្គល ពុំមានពាក់ព័ន្ធនឹងស្ថាប័ននោះទេ។
មន្ត្រីសម្របសម្រួលសមាគមអាដហុក ការពារសិទ្ធិមនុស្សខេត្តកំពង់ឆ្នាំង គឺលោក សំ ច័ន្ទគា សាទរចំពោះចំណាត់ការរបស់ស្ថាប័នតុលាការ។ យ៉ាងនេះក្ដី លោកចង់ឲ្យរាជរដ្ឋាភិបាលពិចារណាក្នុងការរឹតបន្តឹងក្រមសីលធម៌នៃមន្ត្រីរាជការ និងពិនិត្យឡើងវិញលើច្បាប់ស្ដីពីសហលក្ខន្តិកៈមន្ត្រីរាជការ ដើម្បីធ្វើយ៉ាងណាឲ្យមន្ត្រីរាជការក្លាយជាគំរូសម្រាប់ប្រជាពលរដ្ឋនោះទើបប្រសើរ៕
No comments:
Post a Comment
yes