១០-ធ្នូ-២០១២៖ គំនរឈើសុក្រំ ផ្ចឹក ត្បែង ទំហំមុខ៥០ឡើងទៅ ប្រមាណ ៦០ដើម
ត្រូវក្រុមហ៊ុន៧២ បានប្រមូល និងដឹកចេញភ្លាមៗតាមច្រកប៉ុស្តិ៍អូរថ្មី ទៅប្រទេសវៀតណាម
តុលាការខេត្តក្រចេះ បានសម្រេចឃុំខ្លួនអ្នកសារព័ត៌មានទសវត្សថ្មីជាបណ្ដោះអាសន្ននៅពន្ធនាគារខេត្ត ដើម្បីបើកការស៊ើបអង្កេតជុំវិញបទចោទប្រកាន់អ្នកសារព័ត៌មានជំរិតទារប្រាក់អ្នកដឹកជញ្ជូនឈើខុសច្បាប់។
ក្រុមមន្ត្រីអង្គការ និងសមាគមអ្នកសារព័ត៌មានមួយចំនួនចាត់ទុកករណីឃាត់ខ្លួនអ្នកសារព័ត៌មាននេះជារឿងមិនប្រក្រតី។
សមាគមការពារសិទ្ធិមនុស្សចំនួនពីរ គ្រោងចុះអង្កេតករណីតុលាការខេត្តក្រចេះ សម្រេចឃុំខ្លួនអ្នកសារព័ត៌មានក្នុងបទចោទប្រកាន់ជំរិតទារប្រាក់អ្នកដឹកជញ្ជូនឈើខុសច្បាប់។ ចំណែកសមាគមអ្នកសារព័ត៌មានខ្មែរប្រជាធិបតេយ្យ គ្រោងចេញសេចក្តីថ្លែងការណ៍ទាក់ទិនករណីចាប់ខ្លួនអ្នកសារព័ត៌មាននេះដូចគ្នា។
មន្ត្រីស៊ើបអង្កេតជាន់ខ្ពស់នៃអង្គការលីកាដូ (LICADO) លោក អំ សំអាត មានប្រសាសន៍បញ្ជាក់ថា នៅថ្ងៃអង្គារ ទី១១ ខែធ្នូ ឆ្នាំ២០១២ លោកនឹងចេញដំណើរទៅកាន់ខេត្តក្រចេះ ដើម្បីស្រាវជ្រាវពីករណីចាប់ខ្លួនអ្នកសារព័ត៌មាន រួមជាមួយមន្ត្រីស៊ើបអង្កេតសមាគមការពារសិទ្ធិមនុស្សអាដហុក (ADHOC) ។
លោកបន្តថា ការស្រាវជ្រាវនេះដើម្បីរកឲ្យឃើញពីហេតុផលពិតប្រាកដជុំវិញការចោទប្រកាន់ និងចាប់ខ្លួនអ្នកសារព័ត៌មាន បន្ទាប់ពីមន្ត្រីអង្គការសង្គមស៊ីវិល និងអ្នកសារព័ត៌មាននៅមូលដ្ឋានបានអះអាងថា ជាការចាប់ខ្លួនអ្នកសារព័ត៌មានធ្វើឡើងដោយអយុត្តិធម៌៖ «ឥឡូវ យើងអត់ទាន់បានទទួលព័ត៌មានឲ្យវាច្បាស់លាស់ ទាល់តែយើងទៅអង្កេតមើលសិនជាបឋម ប្រហែលជាល្ងាចហ្នឹងត្រូវចេញទៅតើ។ បាទចាំមើលទៅដល់ជាក់ស្ដែង យើងជួបជាមួយអាជ្ញាធរអ៊ីចឹងដែរឬ»។
អ្នកយកព័ត៌មានកាសែតទសវត្សថ្មី និងជាសមាជិកសមាគមអ្នកសារព័ត៌មានខ្មែរប្រជាធិបតេយ្យ លោក តាំង ទ្រី ត្រូវសមត្ថកិច្ចប៉ូលិសស្រុកស្នួល ខេត្តក្រចេះ ឃាត់ខ្លួនកាលពីថ្ងៃសុក្រ ទី៧ ខែធ្នូ នៅក្នុងពេលដែលលោកបានចុះយកព័ត៌មានពីសកម្មភាពដឹកជញ្ជូនឈើខុសច្បាប់នៅចំណុចស្រែរនាម ភូមិសំពោច ឃុំខ្សឹម ស្រុកស្នួល ខេត្តក្រចេះ។
ព្រះរាជអាជ្ញាអមតុលាការខេត្តក្រចេះ លោកស្រី ចាត សូរស្មី មានប្រសាសន៍ឲ្យដឹងនៅថ្ងៃអង្គារ ទី១១ ខែធ្នូ ថា មន្ត្រីស្ថាប័នអយ្យការសម្រេចចោទប្រកាន់លោក តាំង ទ្រី ពីបទជំរិតទារប្រាក់ ពីព្រោះមានបណ្ដឹងពីអ្នកដឹកជញ្ជូនឈើដែលចោទថា លោក តាំង ទ្រី បានជំរិតទារប្រាក់ពីការដឹកជញ្ជូនឈើនេះ។ លោកស្រីបន្តថា បានបញ្ជូនសំណុំរឿងចោទប្រកាន់ទៅចៅក្រមស៊ើបសួរដើម្បីចាត់ការបន្ត៖ «មិនដូចស្អី ថាអ្នកប្ដឹងជាប់គុក អ្នកម្ចាស់ឈើរួចខ្លួនទេណា! ករណីអ្នកកាសែតហ្នឹង គឺយើងប្រគល់ខាងសមត្ថកិច្ចប៉ូលិសចាត់ការ ព្រោះវាទាក់ទងទៅនឹងកំហែងយក ហើយដោយសារបទល្មើសព្រៃឈើ គឺរថយន្តគាត់ដឹកជន្លង់ម្រេច អ៊ីចឹងរឿងនីតិវិធីយ៉ាងម៉េច គឺខាងព្រៃឈើចាត់ការ។ គ្រាន់ថា ជាសន្និធិ គ្រាន់តែពិន័យជាប្រាក់ យើងអត់អាចចាប់គាត់ដាក់គុកបានទេ»។
មន្ត្រីនៃអង្គការទប់ស្កាត់បទល្មើសព្រៃឈើ និងសត្វព្រៃ ខេត្តក្រចេះ លោក អិន សាវឿន ឲ្យដឹងថា ដែលនាំឲ្យកម្លាំងមានសមត្ថកិច្ចចាប់ខ្លួនអ្នកសារព័ត៌មានរូបនេះ គឺបណ្ដាលមកពីគាត់បានរាយការណ៍ពីការជួញដូរឈើខុសច្បាប់ ប៉ះចំអ្នកជួញដូរនោះគឺជាមនុស្សមានឥទ្ធិពលខ្លាំង តែងប្រព្រឹត្តបទល្មើសនៅតំបន់នោះ។
ប្រធានសមាគមអ្នកសារព័ត៌មានខ្មែរប្រជាធិបតេយ្យ លោក សុខ សុវណ្ណ មានប្រសាសន៍បញ្ជាក់ថា លោកកំពុងរៀបចំដាក់មេធាវីការពារក្តីឲ្យលោក តាំង ទ្រី។ លោកបន្តថា សមាគមលោកគ្រោងនឹងចេញសេចក្តីថ្លែងការណ៍អំពាវនាវជូនក្រសួងព័ត៌មានជួយអន្តរាគមន៍ជុំវិញការចាប់ខ្លួនអ្នកសារព័ត៌មាន ប្រសិនការស៊ើបអង្កេតរកឃើញថា ការចាប់ខ្លួននេះធ្វើឡើងមិនបានត្រឹមត្រូវ៖«នៅតែមិនយល់ថាហេតុអ្វីព្រះរាជអាជ្ញាទៅជាឃាត់ខ្លួនអ្នកកាសែតទៅវិញ ដែលជាអ្នកផ្តល់ព័ត៌មានជូនទៅខាងអាជ្ញាធរមានសមត្ថកិច្ចវិញហ្នឹង»។
តាមការគ្រោងទុក មន្ត្រីអង្គការសិទ្ធិមនុស្សទាំងពីរ នឹងស៊ើបអង្កេតផងដែរជុំវិញគ្រោះថ្នាក់ចរាចរណ៍មួយធ្វើឲ្យអ្នកយកព័ត៌មានវិទ្យុអាស៊ីសេរី ប្រចាំខេត្តក្រចេះ លោក វិជ័យ អានន្ទ រងរបួសធ្ងន់ធ្ងរកាលពីថ្ងៃទី១០ ខែធ្នូ នៅចំណុចផ្លូវជាតិលេខ៧ ចំណុចភូមិអូរព្រះ ឃុំអូរគ្រៀង ស្រុកសំបូរ ខេត្តក្រចេះ បន្ទាប់ពីលោកបានផ្សាយព័ត៌មានស្ដីពីករណីចាប់ខ្លួនអ្នកសារព័ត៌មាននេះ។ យ៉ាងនេះក្តី ប៉ូលិសខេត្តក្រចេះ បានធ្វើរបាយការណ៍សន្និដ្ឋានថា លោក វិជ័យ អានន្ទ រងគ្រោះថ្នាក់ដោយជិះម៉ូតូដួល៕
No comments:
Post a Comment
yes