តំណាងជនជាតិដើមភាគតិចព្នង កួយ និង សួយ ធ្វើសន្និសីទកាសែត
នារាជធានីភ្នំពេញ នៅថ្ងៃទី១១ ខែធ្នូ ឆ្នាំ២០១២
តំណាងជនជាតិដើមភាគតិចជាច្រើនក្រុម បើកសន្និសីទកាសែតដ៏កម្រមួយនៅទីក្រុងភ្នំពេញ ដើម្បីបង្ហាញឲ្យដឹងអំពីវប្បធម៌ និងប្រពៃណីរស់នៅរបស់ខ្លួននៅភាគឦសានកម្ពុជា ជៀសវាងការយល់ច្រឡំ ឬមិនយល់ចំពោះប្រពៃណីរបស់ជនជាតិដើមភាគតិចកន្លងមក។
ជនជាតិដើមភាគតិចទាំងនោះ មានដូចជា ព្នង សួយ កួយ និង ចារ៉ាយ ជាដើម។
តំណាងជនជាតិដើមភាគតិចនៅថ្ងៃទី១១ ខែធ្នូ បានប្រកាសសុំឲ្យប្រជាពលរដ្ឋខ្មែរ អ្នកនយោបាយ និងមហាជននានា បញ្ឈប់ការរើសអើង ឬប្រមាថមើលងាយចំពោះជនជាតិដើមភាគតិចនៅកម្ពុជា ដោយសារតែការប្រមាថនោះបានធ្វើឲ្យជនជាតិដើមភាគតិច និងព្រលឹងដូនតាទទួលនូវការឈឺចាប់ និងមិនសប្បាយចិត្តឡើយ។
ជនជាតិដើមភាគតិចជាច្រើននាក់មកពីខេត្តរតនគិរី ខេត្តព្រះវិហារ ខេត្តកំពង់ស្ពឺ ខេត្តស្ទឹងត្រែង និងខេត្តមណ្ឌលគិរី បានមកជួបជុំគ្នានៅទីក្រុងភ្នំពេញ ដើម្បីបង្ហាញឲ្យដឹងអំពីវប្បធម៌ និងប្រពៃណីរបស់ជនជាតិដើមភាគតិចនៅកម្ពុជា។
ការបង្ហាញនេះ គឺធ្វើឡើងក្រោយពីតំណាងរាស្ត្រគណបក្សប្រជាជនកម្ពុជា លោក ឈាង វុន បានមានប្រសាសន៍កាលពីថ្ងៃទី១៤ ខែវិច្ឆិកា កន្លងទៅនេះ ប្រៀបប្រដូចប្រធានគណបក្សសិទ្ធិមនុស្ស លោក កឹម សុខា និងតំណាងគណបក្ស សម រង្ស៊ី លោក សុន ឆ័យ ទៅនឹងជនជាតិដើមភាគតិចព្នង ថាជាមនុស្សព្រៃផ្សៃ។ ក្រោយមកលោក ឈាង វុន បានសុំទោសជនជាតិដើមភាគតិចព្នងនៅក្នុងសភាជាតិ កាលពីថ្ងៃទី៦ ខែធ្នូ កន្លងទៅនេះ។
តំណាងជនជាតិដើមភាគតិចព្នង ឈ្មោះ បែល បឹល មកពីខេត្តមណ្ឌលគិរី បាននិយាយនៅក្នុងសន្និសីទកាសែតថា ជនជាតិដើមភាគតិចត្រូវការផ្សះផ្សារបួសផ្លូវចិត្តតាមបែបប្រពៃណីនៅពេលឆាប់ៗនេះ៖ «ធ្វើនោះប៉ះពាល់យ៉ាងជ្រៅដែរ។ មូលហេតុអីប៉ះពាល់យ៉ាងជ្រៅ វាយតម្លៃថា ព្នងកាចសាហាវ មិនកាចសាហាវស្អី បញ្ហានេះគាត់តំណាងរាស្ត្រហើយ»។
ប្រធានក្រុមប្រឹក្សាភិបាលនៃសមាគមយុវជនជនជាតិដើមភាគតិចព្នង នៅខេត្តមណ្ឌលគិរី អ្នកស្រី យុ ម៉ាណេ អាយុ ៣៣ឆ្នាំ បានមានប្រសាសន៍ថា ការទាមទារឲ្យបញ្ឈប់ការរើសអើងលើជនជាតិដើមភាគតិចនេះ មិនមែនស្ថិតក្រោមការញុះញង់ ឬពាក់ព័ន្ធរឿងនយោបាយទេ៖ «ឯកឧត្ដមក៏បានធ្វើការសុំអធ្យាស្រ័យ ឬក៏សុំទោសដល់ពួកខ្ញុំជាសាធារណៈនៅក្នុងអង្គសភាកាលពីថ្ងៃទី៦ រួចហើយ។ ការសុំនេះក៏ដូចតាមអ្វីដែលខ្ញុំបានស្នើទៅគាត់ដែរ»។
ទាក់ទងនឹងបញ្ហានេះ មន្ត្រីកម្មវិធីនៃមជ្ឈមណ្ឌលអប់រំច្បាប់សំរាប់សហគមន៍ លោក គិត ទូ ដែលតាមដានករណីនេះ បានមានប្រសាសន៍ថា ការផ្សះផ្សា និងការឈប់រើសអើងគឺជាការចាំបាច់៖ «នាំមកឲ្យមានការទទួលស្គាល់គ្នា ឲ្យការរួមរស់នៅក្នុងសន្តិភាពជាមួយគ្នា រវាងជាតិពន្ធុទាំងអស់នៅព្រះរាជាណាចក្រកម្ពុជា»។
វិទ្យុអាស៊ីសេរីមិនអាចទាក់ទងលោក ឈាង វុន បានទេ នៅថ្ងៃទី១១ ខែធ្នូ ប៉ុន្តែលោក ឈាង វុន ធ្លាប់បានសន្យាថា នឹងធ្វើការសុំទោសតាមបែបប្រពៃណីជនជាតិដើមភាគតិចនៅភ្នំដោះក្រមុំ ខេត្តមណ្ឌលគិរី នៅពេលវេលាសមរម្យមួយ។
បទបង្ហាញរបស់តំណាងជនជាតិដើមភាគតិចបានឲ្យដឹងថា នៅប្រទេសកម្ពុជា មានជនជាតិដើមភាគតិចសរុបចំនួនជិត ២សែននាក់ (១៩៧.០០០) ចែកជា ២៤ក្រុម នៅខេត្តចំនួន ១៥។
មុខរបររបស់ជនជាតិដើមភាគតិចទាំងនោះ គឺពឹងផ្អែកលើព្រៃធម្មជាតិទាំងស្រុង ដូចជាបាញ់សត្វ ធ្វើស្រែចំការវិលជុំ ដាំល្ង ដាំសណ្ដែក និងចាប់ត្រីជាដើម។
តំណាងជនជាតិដើមភាគតិចបានបញ្ជាក់ថា ពាក្យសំដីប្រមាថមើលងាយកន្លងមកដែលមិនអាចទទួលយកបាននោះ មានដូចជា ពាក្យថា ព្រៃផ្សៃដូចព្នង ល្ងង់ខ្លៅដូចព្នង ព្នងស៊ីកូនឯង ព្នងប្រហោងដើមទ្រូង ព្នងដុះកន្ទុយ និងព្នងយកមនុស្សចាស់ដាក់លើដើមឈើ ហើយអង្រួនឲ្យជ្រុះដើម្បីគោះគងសប្បាយជាដើម។
តំណាងជនជាតិដើមភាគតិចព្នង ឈ្មោះ បែល បឹល បានបញ្ជាក់ថា ពាក្យសំដីទាំងនេះមិនពិតដូចប្រពៃណីរបស់ជនជាតិដើមភាគតិចនោះទេ។ ជនជាតិដើមភាគតិចក៏មានបេះដូង និងសេចក្ដីថ្លៃថ្នូរដែរ៕
No comments:
Post a Comment
yes