ប្រធានក្រុមយុវជននៃគណបក្ស សម រង្ស៊ី លោក សួង សុភ័ណ្ឌ ផ្ដល់បទសម្ភាសន៍
ដល់អ្នកកាសែតនៅខាងមុខតុលាការក្រុងភ្នំពេញ កាលពីថ្ងៃទី៣០ ខែវិច្ឆិកា ឆ្នាំ២០១២
សកម្មជនគណបក្ស សម រង្ស៊ី បានយកពាក្យបណ្ដឹងប្ដឹងលោកនាយករដ្ឋមន្ត្រី ហ៊ុន សែន ពីបទឃាតកម្មគិតទុកជាមុនលើករណីជាន់គ្នាស្លាប់នៅលើស្ពានកោះពេជ្រ នៅថ្ងៃបញ្ចប់នៃព្រះរាជពិធីបុណ្យអុំទូក កាលពីថ្ងៃទី២២ ខែវិច្ឆិកា ឆ្នាំ២០១០ ទៅដាក់នៅសាលាដំបូងរាជធានីភ្នំពេញ។
ប៉ុន្តែការដាក់ពាក្យប្ដឹងនេះ ត្រូវបានអ្នកនាំពាក្យរដ្ឋាភិបាល អះអាងថា មិនមែនជាការដាក់ពាក្យប្ដឹងទេ តែគឺជាការវាយប្រហារលើប្រមុខដឹកនាំរដ្ឋាភិបាល។
ក្រឡាបញ្ជីនៃសាលាដំបូងរាជធានីភ្នំពេញ នៅថ្ងៃទី៣០ ខែវិច្ឆិកា ឆ្នាំ២០១២ បានទទួលពាក្យបណ្ដឹងរបស់សកម្មជនគណបក្ស សម រង្ស៊ី ដែលបានប្ដឹងចោទលោកនាយករដ្ឋមន្ត្រី ហ៊ុន សែន ពីបទឃាតកម្មគិតទុកជាមុន ពាក់ព័ន្ធករណីជាន់គ្នាស្លាប់ និងរបួសនៅលើស្ពានកោះពេជ្រ។
ប្រធានក្រុមយុវជននៃគណបក្ស សម រង្ស៊ី លោក សួង សុភ័ណ្ឌ បានថ្លែងនៅខាងមុខតុលាការក្រុងភ្នំពេញថា លោកប្ដឹងលោកនាយករដ្ឋមន្ត្រី ហ៊ុន សែន ចំពោះការមិនទទួលខុសត្រូវលើព្រឹត្តិការណ៍ជាន់គ្នានៅលើស្ពានពេជ្រ ដែលបណ្ដាលឲ្យមនុស្ស ជាពិសេសយុវជនជាច្រើនរយនាក់បានស្លាប់។
លោក សួង សុភ័ណ្ឌ៖ «សម្រាប់ភស្តុតាង ទីមួយ យើងមានខ្សែវីដេអូ យើងមានរូបថត ហើយលើសពីនេះទៅទៀត ខ្ញុំរង់ចាំរយៈពេល ២ឆ្នាំហើយ រង់ចាំឲ្យលោក ហ៊ុន សែន ចាត់វិធានការ ប៉ុន្តែផ្ទុយទៅវិញ លោកបានចាត់វិធានការរៀបចំគណៈកម្មាធិការបែបឡមៗ រៀបចំគណៈកម្មាធិការគ្នាឯង ហើយស៊ើបអង្កេត។ លើសពីនេះទៅទៀត លោកនាយករដ្ឋមន្ត្រី ហ៊ុន សែន បានជំទាស់រាល់ការសំណូមពររបស់អង្គការជាតិ និងអន្តរជាតិ ក្នុងការស៊ើបអង្កេតលើករណីកោះពេជ្រនេះ»។
ឆ្លើយតបបញ្ហានេះ អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានហៅការប្ដឹងលោកនាយករដ្ឋមន្ត្រី ហ៊ុន សែន ថាជាការវាយប្រហាររដ្ឋាភិបាល ហើយប្ដឹងដើម្បីទាញការចាប់អារម្មណ៍ពីបណ្ដាញផ្សព្វផ្សាយព័ត៌មាន៖ «ផលប្រយោជន៍ដែលត្រូវបានផ្ដល់តាមច្បាប់ ខ្ញុំមិនចង់និយាយទេអាហ្នឹង ជាការងាររបស់តុលាការ ក៏ប៉ុន្តែគ្រាន់តែភាសាដែលគេនិយាយចោទថា ការធ្វើឃាតកម្មគិតទុកជាមុន នោះជាការវាយប្រហារ មិនមែនជាការប្ដឹងផ្ដល់ទេ បានសេចក្ដីថា ខ្លួនឯងយល់ឃើញអ៊ីចឹងទៅ ហើយតែដាក់សម្ពាធឲ្យតុលាការនិយាយតាមខ្លួនឯង»។
កាលពីរាត្រីថ្ងៃបង្ហើយនៃពិធីបុណ្យអុំទូក ថ្ងៃទី២២ វិច្ឆិកា ឆ្នាំ២០១០ បន្ទាប់ពីពិធីបណ្ដែតប្រទីប ពិធីបាញ់កាំជ្រួចនៅម៉ោងប្រហែល ៩យប់ ក្នុងពេលតែមួយសន្ទុះប៉ុណ្ណោះ សោកនាដកម្មលើស្ពានកោះពេជ្រ បានកើតឡើងដោយសារមនុស្សផ្អើលជាន់គ្នាបណ្ដាលឲ្យមានមនុស្សស្លាប់ ៣៥៣នាក់ និងរបួស ៣៩៣នាក់។
ព្រឹត្តិការណ៍នេះ បានជំរុញឲ្យរដ្ឋាភិបាលបើកការស៊ើបអង្កេតមួយ ដោយបង្ហាញថា ការស្លាប់គរលើគ្នាជាពំនូកស្អិតទាញមិនចង់ចេញ បណ្ដាលមកពីការថប់ដង្ហើម ដោយសារតែហ្វូងមនុស្សដ៏ច្រើនផ្អើលជាន់គ្នា។
ទាក់ទងទៅនឹងព្រឹត្តិការណ៍នេះដែរ រដ្ឋាភិបាលបានផ្ដល់ប្រាក់ឧបត្ថម្ភជាង ១ម៉ឺនដុល្លារដល់ក្រុមគ្រួសារជនរងគ្រោះម្នាក់ៗ ដែលបានស្លាប់ក្នុងព្រឹត្តិការណ៍ជាន់គ្នានៅលើស្ពានកោះពេជ្រនោះ។ បន្ទាប់មក ក៏បានកម្ទេចស្ពានពេជ្រនោះចោល និងសង់ស្ពានភ្លោះជំនួសវិញ ដើម្បីបញ្ចៀសការកកស្ទះ កុំឲ្យមានករណីនេះទៀត។ មួយឆ្នាំក្រោយព្រឹត្តិការណ៍នេះ រដ្ឋាភិបាល សាលារាជធានីភ្នំពេញ បានចំណាយថវិកា ១២ម៉ឺនដុល្លារ ដើម្បីកសាងស្តូបមួយ នៅក្បែរស្ពាននោះវិញ ដើម្បីរំលឹកការចងចាំ និងឲ្យក្រុមគ្រួសារយកជាទីកន្លែងគោរពវិញ្ញាណក្ខន្ធដល់អ្នកស្លាប់នៅលើស្ពានកោះពេជ្រនោះ។
ទាក់ទងទៅនឹងបណ្ដឹងនេះ ប្រធានអង្គការក្រុមអ្នកច្បាប់ការពារសិទ្ធិកម្ពុជា លោកមេធាវី សុខ សំអឿន មានទស្សនៈថា បទចោទដែលប្ដឹងលោកនាយករដ្ឋមន្ត្រី ហ៊ុន សែន ពីបទឃាតកម្មគិតទុកជាមុននេះ ហាក់ជាការប្ដឹងបែបនយោបាយ ដែលមិនត្រឹមត្រូវ និងមិនឆ្លើយតបទៅនឹងផ្លូវច្បាប់នោះទេ៖ «បទល្មើសអ៊ីចឹង ដូចប្ដឹងបែបហ្នឹងវាអត់ត្រូវ វាមិនមែនជាឃាតកម្មគ្រោងទុកជាមុនទេ ចោទអ៊ីចឹងអត់ត្រូវទេ។ ព្រោះទាល់តែមានចេតនា គម្រោង ផែនការ វាមានភស្តុតាងអីស្ទាក់មនុស្សឲ្យចូលមកហ្នឹងអី វាអត់មាន បើថាទាមទារឲ្យទទួលខុសត្រូវអីអូខេ អីចឹងណា។ រកអ្នកទទួលខុសត្រូវវិញ ប៉ុន្តែវាមិនមែនជារឿងព្រហ្មទណ្ឌទេ»។
យុវជន សួង សុភ័ណ្ឌ ដែលចេញមុខប្ដឹងលោកនាយករដ្ឋមន្ត្រី ហ៊ុន សែន បានអះអាងថា គាត់មិនព្រួយបារម្ភ ឬភ័យខ្លាចចំពោះការប្ដឹងបកពីលោកនាយករដ្ឋមន្ត្រី ហ៊ុន សែន មកលើរូបគាត់វិញនោះទេ។
ទាក់ទងទៅនឹងបណ្ដឹងនេះ យុវជន សួង សុភ័ណ្ឌ ដដែលអះអាងថា ក្រៅពីលោក ហ៊ុន សែន លោកនឹងប្ដឹងចំពោះមន្ត្រីជាន់ខ្ពស់ដែលទទួលបន្ទុករៀបចំព្រះរាជពិធីបុណ្យអុំទូក កាលពីឆ្នាំ២០១០ ចំនួន ៣នាក់ថែមទៀត ក្នុងនោះរួមមាន លោក គង់ សំអុល រដ្ឋមន្ត្រីក្រសួងព្រះបរមរាជវាំង និងជាប្រធានគណៈកម្មការជាតិរៀបចំបុណ្យជាតិ អន្តរជាតិ លោក កែប ជុតិមា អភិបាលរាជធានីភ្នំពេញ និងអតីតស្នងការក្រុងភ្នំពេញ លោក ទូច ណារុថ។
នៅក្នុងអំឡុងខែធ្នូ ឆ្នាំ២០១២ យុវជនដដែលនឹងយកពាក្យប្ដឹងលោក ហ៊ុន សែន នេះទៅដាក់នៅតុលាការឧក្រិដ្ឋកម្មអន្តរជាតិ អាយស៊ីស៊ី (ICC) ដែលមានមូលដ្ឋាននៅប្រទេសហូឡង់ដ៍ (Holland)៕
No comments:
Post a Comment
yes