កងកិត្តិយស ត្រៀមរួចជាស្រេចកាលពីថ្ងៃម្សិលមិញ ក្នុងការថ្វាយព្រះរាជវន្ទនកិច្ចបាញ់
កាំភ្លើងធំ ១០១ណាត់ សម្រាប់ព្រះរាជពិធីដង្ហែព្រះបរមសពព្រឹកនេះ
ភ្នំពេញៈ តំបន់ទេសចរណ៍នៅក្នុងព្រះបរមរាជវាំងកាលពីថ្ងៃម្សិលមិញ ត្រូវបានដាក់បម្រាមហាមភ្ញៀវទេសចរជាតិនិងអន្តរជាតិមិនអនុញ្ញាត ចូលទស្សនាក្នុងរយៈពេល៧ថ្ងៃក្រោយពីរដ្ឋាភិបាលប្រកាសកាន់ ព្រះបរមរណទុក្ខចំពោះព្រះបរមសពសម្ដេចឪជាលើកទីពីរ ដែលចាប់ផ្ដើមពីថ្ងៃសុក្រទី១ ខែកុម្ភៈដល់ថ្ងៃទី៧ ខែកុម្ភៈ ឆ្នាំ២០១៣។
សេចក្តីប្រកាសនេះត្រូវបានធ្វើឡើងតាមរយៈការសរសេរអក្សរ នៅលើក្តារឆ្នួនដាក់នៅមាត់ច្រកចូលព្រះវិហារព្រះកែវមរកត ឬព្រះបរមរាជវាំង ក្នុងរាជធានីភ្នំពេញដែលមានជាភាសាខ្មែរនិងភាសាអង់គ្លេស។
មន្ត្រី នគរបាលយាមព្រះបរមរាជវាំងបាននិយាយក្នុងលក្ខខណ្ឌសុំមិន បញ្ចេញឈ្មោះបានឲ្យដឹងថា ព្រះបរមរាជវាំងចង់រក្សាបរិយាកាសស្ងប់ស្ងាត់ នៅក្នុងអំឡុងពេលចូលរួមកាន់ព្រះបរមមរណទុក្ខលើកទីពីរដើម្បី សម្ដែងការគោរព ជាលើកចុងក្រោយចំពោះសម្ដេចព្រះមហាវីរក្សត្រ។
ជា រៀងរាល់ថ្ងៃ អ្នកទេសចរជាតិ និងអន្តរជាតិ បានចេញចូលទស្សនាព្រះបរមរាជវាំង តាមច្រកខាងត្បូង ដោយមានក្រុមហ៊ុនទេសចរណ៍រៀបចំដំណើរកម្សាន្ត សម្រាប់អ្នកទេសចរបរទេសចម្រុះជាតិសាសន៍។
ទន្ទឹមនឹងការបិទ តំបន់ទេសចរណ៍នេះ មន្ទីរកសិកម្មរាជធានីភ្នំពេញ បានធ្វើការហាមឃាត់យានយន្តគ្រប់ប្រភេទមិនឲ្យដឹកសត្វមាន់ ទា ចាប់ពីរង្វង់មូលចោមចៅ ដែលស្ថិតនៅលើមហាវិថីសហព័ន្ធរុស្ស៊ី ព្រះនរោត្ដម ព្រះសីហនុ និងមហាវិថីព្រះស៊ីសុវត្ថិ។
លោក ស៊ាង បូរិន ប្រធានមន្ទីរកសិកម្មរាជធានីភ្នំពេញ បានឲ្យដឹងពីថ្ងៃព្រហស្បតិ៍ថា ក្រុមមន្ត្រីរបស់លោកនៅខណ្ឌទាំង៩ ចាប់ផ្ដើមចុះពិនិត្យមើលគ្រប់ផ្លូវធំៗទាំងអស់ ក្រែងលោមានអ្នកលក់មាន់ ទា ដឹកឆ្លងកាត់ផ្លូវដែលបានហាមឃាត់ទាំងនេះ។ លោកបានថ្លែងថា ៖ «អ្នកលក់សត្វរស់នឹងអនុញ្ញាតឲ្យបន្តដឹកសត្វ មាន់ ទា ពួកគាត់ឡើងវិញនៅក្រោយថ្ងៃទី ៦កុម្ភៈ»។
រីឯទង់ជាតិ នៅទូទាំងប្រទេសត្រូវបង្ហូតត្រឹម១ភាគបីនៃដង ចំណែកសកម្មភាពកម្សាន្តសប្បាយនានា រួមទាំងនៅតាមកញ្ចក់ទូរទស្សន៍ និងវិទ្យុជាដើម ត្រូវផ្អាកមួយរយៈសិន។
នៅឯវត្តបទុមវតីវិញ ក៏មានយុវជនប្រមាណជា៩០នាក់ មកពី២៤ ខេត្ត-ក្រុង មកចូលរួមពិធីកោរសក់បួសជានាគយុវជនដើម្បីកាន់ទុក្ខព្រះបរមរតន កោដ្ឋរយៈពេល៧ថ្ងៃ និងសម្តែងការដឹងគុណ ចំពោះព្រះបរមសពសម្តេចឪ ដែលបានកសាងប្រទេសឲ្យមានការរីកចម្រើននៅក្នុងយុគសម័យរបស់ព្រះ អង្គកាន់អំណាច។
សូមរំឭកថា ក្នុងព្រះរាជពិធីបុណ្យដង្ហែនិងថ្វាយព្រះភ្លើង ព្រះបរមសព ព្រះបរមរតនកោដ្ឋ សម្តេចព្រះនរោត្តម សីហនុ រាជរដ្ឋាភិបាលក៏បានអនុញ្ញាតឲ្យមន្ត្រីរាជការ និងកម្មកររោងចក្រកាត់ដេរឈប់សម្រាករយៈពេលពីរថ្ងៃនៅថ្ងៃទី១ និងថ្ងៃទី៤ ខែកុម្ភៈ នេះផងដែរ។
ចំណែកគ្រឹះស្ថានរដ្ឋ និងឯកជនរួមទាំងក្រុមហ៊ុននានា ដែលស្ថិតនៅអមសងខាងផ្លូវ ដែលត្រូវក្បួនដង្ហែព្រះបរមសពឆ្លងកាត់ ព្រមទាំងផ្សារធំថ្មី និងផ្សារកណ្តាល ក៏ត្រូវបិទទ្វាររយៈពេលមួយព្រឹកថ្ងៃទី១ ខែកុម្ភៈ ឆ្នាំ២០១៣ ដើម្បីកាត់បន្ថយការកកស្ទះចរាចរណ៍។
យោង តាមសារាចរណែនាំរបស់រាជ រដ្ឋាភិបាល ការបាញ់កាំភ្លើងធំ ១០៥ ម.ម នឹងត្រូវធ្វើឡើងផងដែរ ក្នុងឱកាសដង្ហែក្បួនព្រះបរមសពចេញពីព្រះបរមរាជវាំង ការតម្កល់ព្រះសពនៅលើវាលព្រះមេរុ និងក្នុងពិធីថ្វាយព្រះភ្លើងព្រះបរមសពសម្តេចឪ។ ការបាញ់កាំភ្លើងធំសាកល្បង ក៏ត្រូវបានធ្វើរួចហើយ ដែរ កាលពីថ្ងៃទី២៥ មករាកន្លងមក។
អគ្គស្នងការនគរបាលជាតិ ក៏បានសម្រេចដាក់ពង្រាយកងកម្លាំងសមត្ថកិច្ចចម្រុះ មាននគរបាលជាតិ កងរាជអាវុធហត្ថលើផ្ទៃប្រទេស និងយោធា សរុបចំនួនជាង ១ម៉ឺននាក់ នៅតាមគោលដៅសំខាន់ៗ ដើម្បីធានាសន្តិសុខ សុវត្ថិភាព និងសណ្ដាប់ធ្នាប់សាធារណៈ ចាប់ពីថ្ងៃទី១ ដល់ថ្ងៃទី៧ ខែកុម្ភៈ ឆ្នាំ២០១៣ ខាងមុខនេះ។
គួររំឭកថា អតីតព្រះមហាក្សត្រព្រះបរមរតនកោដ្ឋ ព្រះមហាវីរក្សត្រ ព្រះបាទ នរោត្តម សីហនុ បានសោយទិវង្គតនៅថ្ងៃទី១៥ ខែតុលា ២០១២ វេលាម៉ោង ១:២០ នាទីយប់ នៅទីក្រុងប៉េកាំង ប្រទេសចិនក្នុងជន្មាយុ៩០ព្រះវស្សាដោយព្រះជរាពាធ៕
No comments:
Post a Comment
yes