ពលរដ្ឋនៅភូមិត្រាំប៉ោង ឃុំប្រឡាយ អ្នកស្រី ណយ សារិទ្ធិ ប្រាប់នៅថ្ងៃសុក្រថា ដីស្រែ និងដីចម្ការចំនួន៣៣៤ហិកតា ដែលអាជ្ញាធរភូមិ ឃុំ ចែកឲ្យកាលពីឆ្នាំ២០០២ ត្រូវទាហានកងពលលេខ៨ រំលោភយក ហើយបង្ខំឲ្យពួកគេផ្ដិតមេដៃប្រគល់ដីទាំងនោះ ឲ្យកងទ័ព យកទៅធ្វើផ្ទះ ដាំដំណាំ និងធ្វើស្រែ ដោយសន្យាដោះដូរដីកន្លែងផ្សេងឲ្យវិញ។ អ្នកស្រីបន្ដថា ពលរដ្ឋមួយចំនួនព្រមដោះដូរ និងមួយចំនួនទៀតមិនព្រម ប៉ុន្ដែពួកគេមិនទាន់ទទួលដីដែលសន្យាផ្ដល់ឲ្យនៅឡើយទេ។ អ្នកស្រីថា បច្ចុប្បន្ន ទាហានបន្តយកគ្រឿងចក្រ មកឈូសឆាយដីនោះជារៀងរាល់ថ្ងៃ។
ពលរដ្ឋផ្សេងទៀត ឲ្យដឹងស្រដៀងគ្នាថា កងយោធាបានសន្យាដោះស្រាយដីឲ្យពួកគាត់ ក្នុងមួយគ្រួសារ១ហិកតាទៅប្រាំហិកតា ប៉ុន្ដែមកពេលនេះ ពុំទាន់បានទទួលនោះទេ។
មិនអាចទាក់ទងមេបញ្ជាការកងពលលេខ៨ លោកឧត្ដមសេនី យឹម ពឹម ដើម្បីបំភ្លឺពាក់ព័ន្ធករណីនេះនៅឡើយទេ ដោយប្រជាពលរដ្ឋមិនស្គាល់លេខទូរស័ព្ទ។
ប៉ុន្ដែមេបញ្ជាការវរៈសេនាតូចលេខ៨២ នៃកងពលលេខ៨ លោក ចាន់ សុខុន ដែលពលរដ្ឋអះអាងថាជាអ្នកទទួលលើដីនេះ មានប្រសាសន៍ថា បញ្ហានេះ លោកនាយករដ្ឋមន្ដ្រី ហ៊ុន សែន បានចុះហត្ថលេខា ឲ្យអាជ្ញាធរដោះស្រាយជូនពលរដ្ឋរួចរាល់ហើយ។
អ្នកសម្របសម្រួលសមាគមការពារសិទ្ធិមនុស្ស អាដហុក ប្រចាំខេត្ដព្រះវិហារ លោក សី្រ ណារ៉េន មានប្រសាសន៍ថា លោកបានទទួលពាក្យបណ្ដឹងលើដីដែលមានបញ្ហានេះ ពីពលរដ្ឋតាមទូរស័ព្ទ ហើយលោកនឹងទៅស៊ើបនៅពេលក្រោយ៕
No comments:
Post a Comment
yes