ក្រុមយុវវ័យបាននាំគ្នាទិញផ្កា សម្រាប់ជូនជាកាដូដល់អ្នកជាទីស្រឡាញ់
ភ្នំពេញៈ នគរបាលនឹងដើរល្បាតរកគូស្នេហ៍វ័យជំទង់តាមផ្ទះសំណាក់ ហើយសិស្សសាលាត្រូវបានជំរុញឲ្យស្រឡាញ់ភាពបរិសុទ្ធរបស់ខ្លួន ក្នុងសញ្ញាចុងក្រោយបង្ហាញថា ថ្ងៃបុណ្យនៃក្តីស្រឡាញ់នឹងជាថ្ងៃបុណ្យរស់រវើកម្តងទៀត។
លោក ជួន សុវណ្ណ ស្នងការរាជធានីភ្នំពេញបានថ្លែងកាលពីម្សិលមិញថា មន្រ្តីនគរបាលនឹងបង្កើនវត្តមានរបស់ខ្លួនថ្ងៃនេះដើម្បី«ពង្រឹង សណ្តាប់ធ្នាប់សាធារណៈ» ចំពោះការចាប់អារម្មណ៍កាន់តែខ្លាំងឡើងរបស់យុវវ័យនៅថ្ងៃបុណ្យ នៃក្តីស្រឡាញ់។
លោកបានបន្ថែមថា៖ «យើងនឹងដើរល្បាតតាមផ្លូវនិងផ្ទះសំណាក់។ អាជ្ញាធរមូលដ្ឋានពាក់ព័ន្ធ រាប់ទាំងនគរបាលតាមសង្កាត់ និងខណ្ឌនីមួយៗ នឹងបញ្ជូនមន្រ្តីរបស់ខ្លួនទៅឆែកផ្ទះសំណាក់ និងក្លិប»។ លោកបានបន្ថែមថា ភ្ញៀវត្រូវតែមានអាយុលើសពី១៨ ឆ្នាំ បើមិនដូច្នោះទេ ម្ចាស់ផ្ទះសំណាក់នឹងទទួលពិន័យ។
លោក ជា ជាតិ ប្រធានមន្ទីរអប់រំរាជធានីភ្នំពេញ បានថ្លែងថា លោកបានស្នើនគរបាលបង្ក្រាបអ្នកលក់ផ្កានៅក្រៅសាលារៀន ហើយជំរុញមាតាបិតាឲ្យធានាថា កូនរបស់ខ្លួនមិនមែនកំពុងធ្វើអំពើខុសឆ្គង។
លោកបានបញ្ជាក់ថា៖«យើងក៏បានប្រកាសដល់នាយកសាលាទាំងអស់នៅភ្នំពេញឲ្យប្រាប់គ្រូបង្រៀនអប់រំសិស្សរបស់ខ្លួនអំពីអត្ថន័យពិតប្រាកដនៃថ្ងៃបុណ្យក្តីស្រឡាញ់។ វាជាថ្ងៃដែលយើងបញ្ឈប់អំពើហិង្សា ជាពិសេស អំពើហិង្សាមកលើក្មេងស្រី និងស្រ្តី»។
ការសង្ស័យពីសកម្មភាពរបស់យុវវ័យនៅថ្ងៃទី១៤ ខែកុម្ភៈ ក្នុងរាជធានីភ្នំពេញមិនមែនរឿងថ្មីទេ។ កាលពីឆ្នាំមុន នគរបាលត្រូវបានដាក់ពង្រាយនៅតាមផ្ទះសំណាក់ ដើម្បីបង្ក្រាបសកម្មភាពដែលមនុស្សជាច្រើននាក់ជឿជាក់ថា មិនស្របតាមវប្បធម៌កម្ពុជា។
ក្រសួងអប់រំបានជំរុញសិស្ស ធំៗកុំឲ្យរួមភេទនៅថ្ងៃបុណ្យក្តីស្រឡាញ់នេះ។ សារបានជំរុញក្មេងស្រី និងស្រី្តវ័យក្មេងកុំឲ្យលះបង់ភាពបរិសុទ្ធរបស់ខ្លួន។
ក្នុងខណ្ឌឫស្សីកែវ យុវជនបានលួចចេញពីផ្ទះ ហើយដើរប្រញាប់ប្រញាល់កាត់ផ្សារ ការដ្ឋានសំណង់ និងវត្តដើម្បីទៅជួបសង្សារនៅផ្ទះសំណាក់មួយ ដែលមានលោក មានី អាយុ ៤២ ឆ្នាំ ជាអ្នកគ្រប់គ្រង។
ផ្ទះសំណាក់គិតថ្លៃ៤ ដុល្លារអាមេរិកសម្រាប់រយៈពេល ៣ ម៉ោង និង១ ដុល្លារបន្ថែមទៀតសម្រាប់រយៈពេលមួយម៉ោងៗ។
ច្បាប់តម្រូវឲ្យលោក ម៉ានី ត្រូវធានាថា អតិថិជនរបស់ខ្លួនត្រូវមានអាយុយ៉ាងតិច១៨ ឆ្នាំ ដែលមានន័យថា លោកតែងតែឆែកអត្តសញ្ញាណប័ណ្ណ។ អតិថិជនវ័យក្មេងកម្រហ៊ានបង្ហាញខ្លួនដោយស្លៀកពាក់ឯកសណ្ឋានសិស្សណាស់។
ដូចថ្ងៃបុណ្យអន្តរជាតិដទៃទៀតដែរ អ្នកគ្រប់គ្រងរូបនេះរំពឹងថាអតិថិជននឹងចូលមកស្នាក់ជាបន្តបន្ទាប់នៅថ្ងៃនេះ ប៉ុន្តែរំពឹងថា អនីតិជននឹងទៅកន្លែងផ្សេងទៀត។
លោក តុង សុប្រាជ្ញ ដែលសិក្សាអំពីចលនាថ្ងៃបុណ្យក្តីស្រឡាញ់ក្នុងចំណោមយុវវ័យ វណ្ណៈមធ្យមនៅរាជធានីភ្នំពេញអាយុ១៥-២៤ ឆ្នាំ បានថ្លែងថា ការបង្ក្រាបរបស់នគរបាលគឺការរក្សាវប្បធម៌ ដូចការពង្រឹងអនុវត្តច្បាប់។
លោកឲ្យដឹងថា៖ «មនុស្សវ័យក្មេងកំពុងប្រែតាមគំនិតវប្បធម៌លោកខាងលិចអំពីផ្លូវភេទ»។
លោកថា ខណៈដែលក្មេងជំទង់ប្រយ័ត្នខ្លួនដោយយុវតីក្មេងៗជាញឹកញាប់ ផ្លាស់ប្តូរឯកសណ្ឋានសិស្សចេញនៅស្ថានីយសាំង មុនពេលជួបសង្សារដើម្បីរួមភេទ ប៉ុន្តែពួកគេមិនទទួលបានការអប់រំគ្រប់គ្រាន់អំពីផលវិបាកផ្នែកសុខភាពពីសកម្មភាពរបស់ខ្លួនឡើយ។ ជាសញ្ញាបង្ហាញពីយុទ្ធនាការលើកកម្ពស់ការយល់ដឹង អ្នកស្ម័គ្រចិត្តនៃមូលនិធិថែទាំសុខភាពអេដស៍កម្ពុជានឹងចែក ស្រោមអនាម័យប្រហែល៨០០០០ ស្រោមដោយឥតគិតថ្លៃ នៅជុំវិញរាជធានីភ្នំពេញថ្ងៃនេះ។
នៅឯកោះពេជ្រវិញ លោក បូរ៉ា សិស្សមហាវិទ្យាល័យ បានថ្លែងថា វាពិបាកសម្រាប់គូស្នេហ៍វ័យក្មេងចំណាយពេលតែពីរនាក់។
លោកបានបន្តថា៖ «ឪពុកម្តាយរបស់យើងមិនដឹងទេថានេះជាវិធី ទំនើប»។ លោកបានបន្តថា លោកគ្រោងនឹងទិញផ្កាជូនមិត្តស្រីថ្ងៃនេះ ជាសកម្មភាពដែលអាចធ្វើឲ្យគ្រួសាររបស់លោកខឹង។
លោកស្រី ភូង រីតា អាយុ ៣៥ ឆ្នាំ អ្នកលក់ផ្កាក្នុងទីក្រុងបានថ្លែងថា លោកស្រី បានស្តុកទុកផ្កាកុលាប ៥០០ទង សម្រាប់ថ្ងៃបុណ្យនៃក្តីស្រឡាញ់នេះ៕
No comments:
Post a Comment
yes