ប្រជាសហគមន៍ព្រៃឡង់បួងសួងសុំឲ្យ អារក្សព្រៃ ជួយរក្សាព្រៃឡង់ កាលពីដើមឆ្នាំមុន
កំពង់ធំៈ បណ្តាញសហគមន៍ព្រៃឡង់មកពីខេត្តកំពង់ធំជាង៣០០នាក់ ត្រូវបានកងកម្លាំងប៉ូលិសស្រុក ធ្វើការទប់ស្កាត់ក្នុងរយៈខ្លី នៅខណៈជួបជុំគ្នា ដើរហែក្បួនចេញពីខាងក្រុមហ៊ុនវៀតណាម CRCK ឆ្ពោះមកសាលាស្រុកសណ្តាន់ ដើម្បីដាក់ពាក្យបណ្តឹងស្នើសុំការអន្តរាគមន៍ជួយទប់ស្កាត់បទល្មើស ព្រៃឈើ ផ្អាកសកម្មភាពបំផ្លាញព្រៃឈើរបស់ក្រុមហ៊ុន និងការឈូសឆាយទន្ទ្រានប៉ះដីចម្ការរបស់ពលរដ្ឋ។
លោកហឿន សុភាព តំណាងបណ្តាញសហគមន៍ព្រៃឡង់ មកពីខេត្តកំពង់ធំ បានថ្លែងឲ្យដឹងថា ពលរដ្ឋបណ្តាញសហគមន៍ព្រៃឡង់នៅក្នុងខេត្តកំពង់ធំជាង៣០០នាក់ បានមកជួបជុំគ្នាដើរហែក្បួនចេញពីក្រុមហ៊ុន CRCK ដើម្បី ដាក់ពាក្យបណ្តឹងនៅសាលាស្រុកសណ្តាន់ដោយសុំអន្តរាគមន៍ពី អាជ្ញាធរស្រុកឲ្យផ្អាកសកម្មភាពឈូសបំផ្លាញព្រៃឈើរបស់ក្រុមហ៊ុន តែត្រូវបានប៉ូលិសធ្វើការហាមឃាត់មិនឲ្យទៅមុខដោយយកលេសឆែក រកប័ណ្ណបើកបរនិងពន្ធម៉ូតូ។ លោកបានឲ្យដឹងទៀតថា៖ «ពួកយើងនៅជាប់គាំងប្រមាណជា ៣០នាទី ដោយមិនចង់មានបញ្ហាពួកយើងក៏សម្រេចចិត្តចេញតាមផ្លូវផ្សេងទៀត។ គ្មានហេតុផលណាមកចែកចរាចរណ៍នៅកណ្តាលព្រៃនោះទេ»។
លោក បានឲ្យដឹងទៀតថា ពលរដ្ឋជាង៣០០នាក់បានមកជួបជុំ គ្នានៅខាងមុខសាលាស្រុកតែលោកអភិបាលស្រុកអនុញ្ញាតឲ្យតែតំណាង ១០ នាក់ប៉ុណ្ណោះចូលជួបក្រៅពីនោះគាត់ឲ្យនៅរង់ចាំខាងក្រៅ។ លោកបានឲ្យដឹងទៀតថា៖ «លោកអភិបាលបានសន្យាថា នឹងចុះទៅមើលក្រុមហ៊ុននៅថ្ងៃទី១៥ ខែកុម្ភៈ ខាងមុខនេះបន្ទាប់មកគាត់ដើរចេញពីកន្លែងប្រជុំដោយគ្មានប្រាប់ ពលរដ្ឋឲ្យបានដឹង»។
លោកសឹត សេង តំណាងពលរដ្ឋម្នាក់ទៀត អ្វីដែលពលរដ្ឋបានមកជួបជុំគ្នានៅសាលាស្រុកគឺពុំបានទទួលលទ្ធផល អ្វីទាំងអស់ អាជ្ញាធរគ្រាន់តែឆ្លើយឲ្យផុតពីមាត់តែប៉ុណ្ណោះ ដូច្នេះបន្ទាប់ពីចេញ ពីសាលាស្រុកពលរដ្ឋទាំងអស់បាននាំគ្នាមកអុជធូបដាក់បណ្តាសា នៅរោងអ្នកតា កណ្តាលព្រៃឡង់។ លោកឲ្យដឹងទៀតថា៖«យើងដាក់ បណ្តាសាសូមឲ្យអ្នកតាដាក់បណ្តាសាលោកអភិបាលស្រុកប្រសិនបើមិន ចុះមកពិនិត្យនៅក្នុងក្រុមហ៊ុន ដូចដែលគាត់បានសន្យា»។
លោក បន្តថា ពលរដ្ឋនាំគ្នាធ្វើការបែរបន់តាមជំនឿរបស់ពួកគេប្រមាណជាមួយ ម៉ោង ទើបត្រឡប់មកភូមិរាងៗខ្លួនវិញ។ ពលរដ្ឋនឹងតាមមើលជំហានរបស់អាជ្ញាធរស្រុកថាតើគាត់ហ៊ានធ្វើដូច ដែលបានសន្យាដែរឬទេពីព្រោះគាត់ធ្វើមិនដឹងមិនឮយូរមកហើយ។
កាល ពីថ្ងៃទី១១ ខែកុម្ភៈតំណាងពលរដ្ឋបានយកលិខិតជូនដំណឹងទៅដាក់ជូន អាជ្ញាធរដើម្បីផ្តល់ដំណឹងទៅអាជ្ញាធរឲ្យបានដឹង ជាមុនដើម្បីចៀសវាងការភ្ញាក់ផ្អើល។ បណ្តាញសហគមន៍ព្រៃឡង់ មកពីខេត្តចំនួនបួន ក៏បានឡើងមកធ្វើសន្និសីទសារព័ត៌មាននៅទីក្រុងភ្នំពេញ នៅថ្ងៃទី២២ ខែមករា ឆ្នាំ២០១៣ ដោយបានអំពាវនាវជំរុញឲ្យរាជរដ្ឋាភិបាល អនុម័តលើសេចក្តីព្រាងអនុក្រឹត្យ ស្តីពីការបង្កើតតំបន់ព្រៃការពារ និងអភិរក្សជីវចម្រុះនៅ «ព្រៃឡង់» ឲ្យបានឆាប់ ដើម្បីទប់ស្កាត់បទល្មើសទាន់ពេលវេលា និងអំពាវនាវឲ្យរដ្ឋាភិបាលសហការ ក្នុងការការពារព្រៃឡង់រួមគ្នា។
ជា ការឆ្លើយតបវិញ លោក សឹម វណ្ណា អភិបាលស្រុកសណ្តាន់ បានថ្លែងឲ្យដឹងថា ពិតជាមានជនអនាធិបតេយ្យឈូសឆាយដីខុសច្បាប់មែន ហើយសមត្ថកិច្ចបានកំពុងតាមចាប់ខ្លួន។ លោកបានឲ្យដឹងទៀតថា៖ «ចំពោះការឈូសឆាយដីរបស់ក្រុមហ៊ុន KRCK ខ្ញុំ នឹងឲ្យសមត្ថកិច្ចចុះទៅត្រួតពិនិត្យជាថ្មី ព្រោះនោះជាដីសម្បទានសេដ្ឋកិច្ច តែប្រសិនបើសកម្មភាពរបស់ក្រុមហ៊ុន ពិតជាល្មើសលើដីពលរដ្ឋ និងដីព្រៃសហគមន៍នោះ ខ្ញុំនឹងចាត់ការលើបញ្ហានេះតាមផ្លូវច្បាប់»។
យោងតាម របាយការណ៍របស់សមាគមនអាដហុកបានឲ្យដឹងថា យ៉ាងហោចណាស់ក៏មានក្រុមហ៊ុនចំនួន៣៣ បានទទួលដីសម្បទានសេដ្ឋកិច្ចពីរដ្ឋាភិបាលដើម្បីធ្វើការ វិនិយោគនៅក្នុងតំបន់ព្រៃឡង់ដែលមានផ្ទៃដីសរុបចំនួន ១ ០៤៥ ៨៥៧ ហិកតា។
របាយការណ៍របស់ក្រសួងកសិកម្ម រុក្ខាប្រមាញ់និងនេសាទឲ្យដឹងថា ក្រុមហ៊ុន ចម្ការកៅស៊ូ CRCK របស់ប្រទេសវៀតណាមបានទទួលដីសម្បទានសេដ្ឋកិច្ចពីរដ្ឋាភិបាល នៅក្នុងខែ ឧសភា ឆ្នាំ ២០១០ លើផ្ទៃដី ៦១៥៥ ហិកតា នៅក្នុងស្រុកសណ្តាន់ ខេត្តកំពង់ធំ ដើម្បីអភិវឌ្ឍន៍លើដំណាំកៅស៊ូ ក្នុងរយៈពេល ៧០ឆ្នាំ។ ក្រុមហ៊ុន CRCK មិនអាចទំនាក់ទំនងដើម្បីធ្វើការអត្ថាធិប្បាយបានទេ៕
No comments:
Post a Comment
yes