ភ្នំពេញ: រថយន្តដឹកដីមួយគ្រឿងបានបើកបុករថយន្តដឹកកម្មកររោងចក្រមួយគ្រឿងពេញចំទំហឹងបណ្ដាលឲ្យរថយន្តដឹកកម្មករ កម្មការិនី រោងចក្រ កាត់ដេរ ជាង៥០នាក់ រងរបួសធ្ងន់ស្រាល ហើយអ្នកបើកបររថយន្តដឹកកម្មករ បានស្លាប់បាត់បង់ជីវិត ក្រោយពេលបញ្ជូនទៅកាន់មន្ទីរពេទ្យ។
លោកវរៈសេនីយ៍ត្រីមុំ សុវត្ថិ អធិការប៉ូលិសខណ្ឌដង្កោបានឲ្យដឹងថាគ្រោះថ្នាក់ដ៏រន្ធត់ នេះកើតឡើងកាលពីព្រឹកម៉ោង ៦និង៣០នាទីព្រឹក ថ្ងៃទី១៣ ខែកុម្ភៈ ឆ្នាំ២០១៣ នៅតាមបណ្ដោយផ្លូវជាតិលេខ៣ ត្រង់ចំណុចភូមិទឹកថ្លា សង្កាត់ក្រាំងពង្រ ខណ្ឌដង្កោ។
លោកអធិការបានបន្តថាគ្រោះថ្នាក់ចរាចរខាងលើនេះកើតឡើងរវាងរថយន្តដឹកដីមួយគ្រឿងម៉ាកហ៊ីណូ ពណ៌ស ពាក់ស្លាកលេខ ក.៥៧៣៩ ភព.៣ និង រថយន្តហ៊ីយាន់ដាយ ពណ៌ខៀវ ពាក់ស្លាកលេខភ្នំពេញ 3B-6790 ដឹកកម្មករ កម្មការិនី នៅលើកំណាត់ ផ្លូវជាតិ លេខ៣។ ចំណែកអ្នកបើកបរ រថយន្តដឹកដី រត់គេចខ្លួនបាត់ ក្រោយពេលបង្កហេតុ។ សមត្ថកិច្ចកំពុងសហការគ្នា តាមចាប់ខ្លួន យកមកផ្តន្ទាទោស តាមច្បាប់។
លោកមុំ សុវត្ថិ បានបញ្ជាក់ទៀតថា នៅមុនពេលកើតហេតុ រថយន្តដឹកកម្មករកម្មការិនី បានធ្វើដំណើរតាមបណ្តោយផ្លូវជាតិលេខ៣ ពីត្បូងទៅជើងបើកចូលមកភ្នំពេញដឹកកម្មករ មកធ្វើការលុះមកដល់ចំណុច កើតហេតុ ស្រាប់តែមានរថយន្តដឹកដី មួយគ្រឿង បើកបរពីទិសភ្នំពេញ ពីជើងទៅត្បូងវិញ ក្នុងទិសដៅបញ្ច្រាស់ទិសគ្នា ហើយក៏បានចូលមកចំណែកផ្លូវ របស់រថយន្តដឹកកម្មករ ប្រមាណ២០ម៉ែត្រ ក៏បានរេចង្កូតទៅបុក រថយន្តដឹកកម្មករ ពេញទំហឹងតែម្ដង បណ្តាលឲ្យក្រុមកម្មករ កម្មការិនី ដែលជិះលើរថយន្តកូរ៉េបានរងរបួសធ្ងន់និងស្រាលជាង៥០នាក់ក្នុងនោះមានបាក់ដៃ បាក់ជើង ហើយអ្នកបើករថយន្តដឹកកម្មករ គៀបជាប់នៅក្នុងកាប៊ីនត្រូវបានបញ្ជូនទៅកាន់មន្ទីរពេទ្យ។
លោកអធិការបន្តទៀតថាក្រោយពេលដឹកទៅមន្ទីរពេទ្យអ្នកបើករថយន្តដឹកកម្មករបានស្លាប់បាត់បង់ជីវិតពេលបញ្ជូនដល់មន្ទីរពេទ្យដោយសារតែរបួសធ្ងន់ធ្ងរពេក ឯកម្មករ កម្មការិនីប្រមាណជាង៥០នាក់ មានអ្នកខ្លះរបួសធ្ងន់ ត្រូវជួយសង្គ្រោះ។ អ្នកបើកបរ ដែលស្លាប់នោះ ឈ្មោះ ប៉ាត រតនា ភេទប្រុសអាយុ២៣ឆ្នាំមិនទាន់ស្គាល់ស្រុកកំណើត នៅឡើយទេ រហូតដល់រសៀលថ្ងៃដដែលនេះ។
កម្មករកម្មការនីក្រោយពេលកើតហេតុរបួសធ្ងន់២០នាក់ និងរបួសស្រាល៣០នាក់ បានបញ្ជូនទៅជួយសង្គ្រោះ នៅមន្ទីរពេទ្យភ្លាមៗដែរ តែមកដល់ល្ងាចនេះបានចេញពីពេទ្យខ្លះហើយនៅសល់តែ៣៧នាក់៕
No comments:
Post a Comment
yes