កំពង់ចាម៖ សាលមហោស្រពព្រះសីហមុនី ដែលគ្រប់គ្រងដោយក្រសួងវប្បធម៌ និងវិចិត្រសិល្បៈ ដែលជាសាលសម្រាប់បើកអង្គប្រជុំធំៗ និងជាកន្លែងបញ្ជាំងខ្សែភាពយន្តជាតិ និងអន្តរជាតិ សម្រាប់ប្រជាពលរដ្ឋមើលកែកំសាន្ដ បច្ចុប្បន្ននេះត្រូវបានក្រុមហ៊ុន វិញ ហួរ ធ្វើការវិនិយោគជាមួយក្រសួងវប្បធម៌ និងវិចិត្រសិល្បៈ និងត្រូវបានក្រុមហ៊ុនជួលបន្តឲ្យទៅឈ្មោះ យ៉េន សារិទ្ធ ហៅធូ មានទីលំនៅ សង្កាត់កំពង់ចាម ក្រុងកំពង់ចាម។
អ្វីដែលជាបញ្ហាត្រូវបានប្រជាពលរដ្ឋរិះគន់នោះ គឺអ្នកជួលបន្តកំពុងតែសាងសង់តូប លើចិញ្ចើមថ្នល់ជុំវិញបរិវេណមហោស្រព ដើម្បីជួលឲ្យអាជីវករលក់ដូរ ដែលធ្វើឲ្យបាត់បង់សោភ័ណ្ឌភាព ទីក្រុងស្អាតរបស់ខេត្តកំពង់ចាម និងបង្កឲ្យមានភាពកកស្ទះជាញឹកញាប់នៅពេលព្រឹក។ ចំណុចដែលសំខាន់មួយទៀតនោះ គឺនៅគៀនមហោស្រពផ្នែកខាងត្បូងទល់នឹងរបងក្រសួងអប់រំ ផ្នែកខាងក្រោយ ត្រូវបានលោក យ៉េន សារិទ្ធ ហៅធូ ជួលឲ្យអាជីវករលក់សាំងចំនួន ២ កន្លែងជាប់គ្នា ដោយមានកានប្រេងសាំង និងប្រេងម៉ាស៊ូត រាប់សិបកាន កំពុងធ្វើអាជីវកម្ម ដោយមិនបានគិតពីសន្តិសុខសណ្ដាប់ធ្នាប់ នៅក្នុងទីក្រុងឡើយ គឺគិតតែផលប្រយោជន៍ផ្ទាល់ខ្លួនតែប៉ុណ្ណោះ។
ចំពោះភាពអនាធិបតេយ្យនៅជុំវិញសាលមហោស្រព ព្រះសីហមុនី ខេត្តកំពង់ចាម នេះ លោក ធុច ថាត អភិបាលក្រុងកំពង់ចាម បានផ្ដល់ព័ត៌មានតាមរយៈទូរស័ព្ទថា លោកពុំបានដឹងរឿងអ្វីទេ ព្រោះជារឿងរបស់ក្រសួង វប្បធម៌ និងវិចិត្រសិល្បៈ ជាមួយនិងក្រុមហ៊ុនវិនិយោគ។ ចំណែកឯលោក ស៊ី ចំរើន ប្រធានមន្ទីរវប្បធម៌ និងវិចិត្រសិល្បៈ ខេត្តកំពង់ចាម ពុំអាចទំនាក់ទំនងបានទេ ពីព្រោះទូរស័ព្ទរបស់លោកចុចចូលតែពុំមានអ្នកលើក៕
No comments:
Post a Comment
yes