ពលរដ្ឋនៅសង្កាត់ព្រែកប្រា ខណ្ឌមានជ័យ ពិនិត្យបញ្ជីឈ្មោះបោះឆ្នោត
កាលពីថ្ងៃទី៣ ខែមិថុនា ឆ្នាំ២០១២
អង្គការបីបានធ្វើសវនកម្មនៃដំណើរការចុះឈ្មោះបោះឆ្នោតឆ្នាំ២០១២ ហើយបានរកឃើញថា មានភាពមិនប្រក្រតីច្រើន បើប្រៀបធៀបនឹងឆ្នាំ២០០៨ ក្នុងនោះមានការលុបឈ្មោះអ្នកបោះឆ្នោតមិនត្រឹមត្រូវ ឬនៅក្នុងបញ្ជីនោះមានឈ្មោះអ្នកបោះឆ្នោត តែបែរអ្នកភូមិស្រុកនោះមិនស្គាល់មុខទៅវិញ។ ក្រៅពីនេះមានបញ្ហាមិនប្រក្រតីជាច្រើនទៀត ដែលនាំឲ្យប៉ះពាល់ដល់លទ្ធផលនៃការបោះឆ្នោតជាតិពេលខាងមុខ។
ស្ថាប័នបី គឺវិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ (NDI) និងគណៈកម្មការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា (NICFEC) និងមជ្ឈមណ្ឌលសម្រាប់ការសិក្សាស្រាវជ្រាវជាន់ខ្ពស់ (CAS) កាលពីថ្ងៃទី២២ មីនា បានចេញរបាយការណ៍សវនកម្មមួយ បង្ហាញពីភាពអវិជ្ជមានជាច្រើននៃដំណើរការចុះឈ្មោះបោះឆ្នោត ដែលរៀបចំឡើងដោយគណៈកម្មាធិការជាតិរៀបចំការបោះឆ្នោត (គ.ជ.ប) កន្លងមក។
ឆ្លើយតបភ្លាមៗនោះដែរ គ.ជ.ប បានសុំឲ្យតំណាងស្ថាប័នទាំងនោះផ្ញើរបាយការណ៍នោះទៅ គ.ជ.ប ក៏ប៉ុន្តែតំណាងស្ថាប័នទាំងបីបដិសេធ។
លោក ទេព នីថា អគ្គលេខានៃគណៈកម្មាធិការជាតិរៀបចំការបោះឆ្នោត បានសម្ដែងការសោកស្ដាយនៅថ្ងៃទី២៣ មីនា ថា បើសិនជាតំណាងស្ថាប័នទាំងបីផ្ញើរបាយការណ៍នោះតាមសំណូមពរកន្លងមក គ.ជ.ប នឹងធ្វើការសិក្សាផ្ទៀងផ្ទាត់ឡើងវិញ តែទន្ទឹមពេលនេះលោកបញ្ជាក់ថា មានស្ថាប័នមួយចំនួនទៀតបានធ្វើសវនកម្មអំពីដំណើរការចុះឈ្មោះបោះឆ្នោតដូចគ្នានេះ ហើយបានបង្ហាញលទ្ធផលខុសគ្នា ដែល គ.ជ.ប ពិបាកនឹងជឿថាមួយណាត្រឹមត្រូវ។
វិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ និងគណៈកម្មការអព្យាក្រឹត និងយុត្តិធម៌ដើម្បីបោះឆ្នោតដោយសេរីនិងត្រឹមត្រូវនៅកម្ពុជា និងមជ្ឈមណ្ឌលសម្រាប់ការសិក្សាស្រាវជ្រាវជាន់ខ្ពស់ កាលពីថ្ងៃទី២២ មីនា បានចេញរបាយការណ៍សវនកម្មមួយ បង្ហាញពីភាពអវិជ្ជមានជាច្រើននៃដំណើរការចុះឈ្មោះបោះឆ្នោតដែលរៀបចំឡើងដោយគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប កន្លងមក។
របាយការណ៍សវនកម្មរកឃើញថា មានបញ្ហាមិនប្រក្រតីចម្បងមួយចំនួនទាក់ទងគុណភាពនៃដំណើរការចុះឈ្មោះបោះឆ្នោតលើកនេះ ដូចជាការចុះឈ្មោះមិនសូវមានភាពទូលាយ និងមិនពេញលេញ។ ក្រៅពីនេះ សវនកម្មនោះបានរកឃើញថា ឈ្មោះចំនួន ៩,៤ភាគរយ ត្រូវបានគេលុបដោយមិនត្រឹមត្រូវចេញពីបញ្ជីឈ្មោះបោះឆ្នោតឆ្នាំ២០០៨ ដែលពួកគេទាំងនោះទំនងនឹងមិនអាចបោះឆ្នោតនៅឆ្នាំ២០១៣ នេះបាន។ ក្រៅពីនេះ ក៏មានឈ្មោះក្នុងបញ្ជីបោះឆ្នោតតែមិនមានអ្នកស្គាល់មុខ។របាយការណ៍សវនកម្មនោះបានរកឃើញថា ថ្ងៃខែឆ្នាំកំណើតអ្នកបោះឆ្នោតនៅលើអត្តសញ្ញាណប័ណ្ណ និងលើបញ្ជីឈ្មោះបោះឆ្នោតត្រូវគ្នាប្រហែល ៦៣ភាគរយ បើប្រៀបធៀបបញ្ជីបោះឆ្នាំ២០០៨ កន្លងទៅ។
លោកស្រី ឡូរ៉ា ថនថុន នាយិកាប្រចាំប្រទេសកម្ពុជានៃវិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិមានប្រសាសន៍នៅថ្ងៃទី២២ មីនា ថា ការធ្វើសវនកម្មនេះ បានប្រព្រឹត្តទៅដោយប្រុងប្រយ័ត្ន និងស៊ីជម្រៅ ដែលលោកស្រីអះអាងថា ជារបាយការណ៍មួយគួរទុកចិត្តជាទីបំផុត៖ «ដំបូងបង្អស់យើងដៅចំណាំមូលដ្ឋានទាំងនោះ បន្ទាប់មកយើងមានសេវាទៅជជែកជាមួយសហគមន៍ទាំងនោះ។ បើសិនជាយើងរកមិនឃើញទេ យើងក៏ចាត់កម្លាំងម្ដងទៀតឲ្យចុះស្រាវជ្រាវយ៉ាងស៊ីជម្រៅ យើងមិនត្រឹមតែឆែកជាមួយមេភូមិទេ ថែមទាំងជាមួយព្រះចៅអធិការវត្ត អ្នកជិតខាង តំណាងសហគមន៍ ស្វែងរកអ្នកដែលជិតដិតអ្នកនោះ។ យើងប្រើប្រាស់អស់ធនធានដែលយន្តការស្រាវជ្រាវដែលយើងមាន ហើយយើងជឿជាក់យ៉ាងមុតមាំលើទិន្នន័យរបស់យើង»។
លោកស្រីបន្តថា៖ «ចំពោះមនុស្សមានឈ្មោះបោះឆ្នោត តែយើងមិនឃើញឈ្មោះនៅក្នុងបញ្ជីបោះឆ្នោត នៅលើបញ្ជី យើងអាចឆែករកតាមវិធីជាច្រើន យើងព្យាយាមវិភាគនៃការសរសេរឈ្មោះ យើងឆែកតាមស្ថានីយបោះឆ្នោតដែលទាក់ទង យើងធ្វើការបានសុក្រឹត ត្រឹមត្រូវ ដែលយើងមិនធ្លាប់ធ្វើពីមុនៗមក។ ក្នុងករណីត្រួតពិនិត្យគុណភាព ឆែកទិន្នន័យហើយឆែកទៀត ដូច្នេះហើយទើបខ្ញុំជឿមួយរយភាគរយចំពោះលទ្ធផលនេះ»។
កាលពីដើមឆ្នាំនេះ គ.ជ.ប បានប្រកាសថា មានចំនួនប្រជាពលរដ្ឋសរុបប្រហែល ៩,៦លាននាក់បានចុះឈ្មោះបោះឆ្នោត។ បើប្រៀបធៀបការបោះឆ្នោតឆ្នាំ២០០៨ កន្លងទៅ ចំនួនអ្នកចុះឈ្មោះបោះឆ្នោតមានប្រហែល ៧,៧លាននាក់។
លោក ទេព នីថា បញ្ជាក់ថា ទោះយ៉ាងណាដំណើរការចុះឈ្មោះបោះឆ្នោតជាតិឆ្នាំ២០១២ នេះល្អប្រសើរជាងឆ្នាំ២០០៨។
តំណាងស្ថាប័នទាំងបីអះអាងថា មូលហេតុដែលមិនផ្ដល់ឯកសារមួយចំនួនដែល គ.ជ.ប បានស្នើសុំនោះ ដោយសារតែក្រុមអ្នកស្រាវជ្រាវនៃស្ថាប័នទាំងបីលាក់ប្រភព ដោយសារតែបញ្ហាសន្តិសុខរបស់ប្រភពដែលក្រុមអ្នកស្រាវជ្រាវបានសម្ភាសនៅពេលធ្វើសវនកម្មនេះ៕
No comments:
Post a Comment
yes