សង្គមស៊ីវិលមួយចំនួន នៅថ្ងៃចន្ទនេះ
ជំរុញឲ្យរាជរដ្ឋាភិបាលកម្ពុជា
ដាក់បញ្ចូលបេក្ខភាពស្ត្រីឲ្យបានច្រើន
ក្នុងការចូលរួមក្នុងវិស័យនយោបាយ ខណៈការបោះឆ្នោតជាតិឆ្នាំ២០១៣
ខិតជិតចូលមកដល់។
ការជំរុញនេះ
ធ្វើឡើងក្នុងសិក្ខាសាលាស្តីពីការចូលរួមរបស់ស្ត្រី
ក្នុងវិស័យនយោបាយនៅថ្នាក់ជាតិ ដែលធ្វើឡើងនៅរាជធានីភ្នំពេញ
ព្រឹកថ្ងៃទី០៤ ខែមិនានេះ។
នាយិកាប្រតិបត្តិអង្គការចំរើនស្ត្រី លោកស្រី ប៉ុក
ណណ្តា មានប្រសាសន៍ថា បើទោះបីចំនួនស្ត្រីថ្នាក់ដឹកនាំ កើនឡើងពិតមែន
ប៉ុន្តែចំនួននេះ ពុំទាន់សមាមាត្រទៅនឹងចំនួនពលរដ្ឋជាស្ត្រី
ដែលមាន ៥២% នៅឡើយទេ។ អ្នកស្រីបន្តថា
ដើម្បីឲ្យស្ត្រីចូលរួមក្នុងវិស័យនយោបាយបានច្រើន មានតែគណបក្សនយោបាយ
ដែលអាចសម្រេចឲ្យស្ត្រីចូលរួមបាន ៖
"ខ្ញុំមានសំណូមពរដល់គណបក្សនយោបាយផងដែរ
ដោយសារការបោះឆ្នោតនៅក្នុងប្រទេសកម្ពុជាយើង
យើងទាំងអស់គ្នាទៅបោះឆ្នោតជ្រើសរើសគណបក្សនយោបាយ
ដូច្នេះការសម្រេចចិត្តពិតប្រាកដរបស់ថ្នាក់ដឹកនាំគណបក្សនយោបាយ
ក្នុងការលើកកម្ពស់វិស័យយេនឌ័រ ក្នុងការផ្តល់ឱកាសឲ្យស្ត្រីបានចូលរួម
ពិតជាធ្វើឲ្យវត្តមានរបស់ស្ត្រីហ្នឹងកើនឡើង"។
នាយកស្តីទីប្រចាំប្រទេសកម្ពុជា
អង្គការអុកស្វាម(Oxfarm) លោកស្រី Marina van
Dixhoorn ថ្លែងតាមរយៈអ្នកបកប្រែថា ការចូលរួមរបស់ស្ត្រី
ក្នុងវិស័យនយោបាយបាន នៅមានកម្រិតនៅឡើយ ដោយក្នុងនោះមានតែស្ត្រី១៤%
ដែលជាតំណាងក្នុងអាសនៈរាជរដ្ឋាភិបាលនៅលើពិភពលោក។
លោកស្រីបន្តថា
បច្ចុប្បន្នស្រី្តនៅមិនទាន់ទទួលសិទ្ធិពេញលេញនៅឡើយទេ
និងជួបប្រទះបញ្ហាប្រឈមជាច្រើននៅកន្លែងធ្វើការ ៖
"សិក្ខាសាលានេះ នឹងជាការជំរុញបន្តថែមទៀតទៅដល់ឲ្យមានស្ត្រី
មកធ្វើការចូលរួមឲ្យបានច្រើនក្នុងឆាកនយោបាយ
ហើយក៏ជាការជំរុញលើកទឹកចិត្តមួយផងដែរ ឲ្យមានសំឡេងស្ត្រីភាគច្រើន
ជាតំណាងនៅក្នុងការអភិវឌ្ឍន៍របស់ប្រទេសកម្ពុជា
តាមរយៈការពង្រឹងអំណាចផ្នែកសេដ្ឋកិច្ចនេះផងដែរ ពង្រឹងឲ្យមានការកសាងសមត្ថភាពដល់ស្ត្រី
ហើយគេមិនមែនគ្រាន់តែជាអ្នកជួយបង្កើនផ្នែកជីវភាព
ឬក្រុមគ្រួសារប៉ុណ្ណោះទេ
ប៉ុន្តែជួយគាំទ្រឲ្យមានកម្រិតស្តង់ដារស់នៅប្រកបដោយភាពសមរម្យ
តាំងពីថ្នាក់មូលដ្ឋាន និងសហគមន៍របស់ពួកគេ"។
របាយការណ៍របស់អង្គការយេនឌ័រ
និងអភិវឌ្ឍដើម្បីកម្ពុជា បង្ហាញថា ស្ត្រីដែលបានជាប់ឆ្នោតបម្រើការក្នុងក្រុមប្រឹក្សាឃុំសង្កាត់អាណត្តិទី៣មាន១៨ភាគរយ
ហើយសមាជិកសភាបច្ចុប្បន្ន មានតែ២២ភាគរយនោះទេ៕
No comments:
Post a Comment
yes