សវនាការសាលាក្តីខ្មែរក្រហម ពេលកន្លងមក
បុគ្គលិកជាតិផ្នែកបកប្រែភាសាប្រមាណជា៣០នាក់ នៅសាលាក្តីខ្មែរក្រហមពហិការធ្វើការ នៅថ្ងៃចន្ទនេះ ដើម្បីទាមទារប្រាក់ខែ ដែលនាំឲ្យសវនាការ ត្រូវផ្អាកបណ្តោះអាសន្ន។
បន្ទាប់ពីភាគីពាក់ព័ន្ធចូលរួមសវនាការ នៅព្រឹកថ្ងៃចន្ទទី០៤ខែមិនានេះ បុគ្គលិកជាតិ ផ្នែកបកប្រែភាសា បានប្រកាសជាចំហភ្លាមៗថា ក្រុមខ្លួនធ្វើពហិការមិនបកប្រែភាសាក្នុងអង្គសវនាការ ប្រសិនបើមិនទទួលបានប្រាក់ខែ ដែលមិនបានបើកចាប់ពីខែធ្នូ ឆ្នាំ២០១២ ។
ទាក់ទងនឹងការធ្វើពហិការនេះ អ្នកនាំពាក្យសាលាក្តីខ្មែរក្រហម លោកនេត្រ ភក្ត្រា មានប្រសាសន៍ថា ជាសិទ្ធិរបស់ក្រុមគាត់។ ជាមួយគ្នានេះ លោកជឿថានឹងមានបុគ្គលិកផ្នែកផ្សេងទៀត នឹងធ្វើពហិការផងដែរ ប្រសិនបើមិនមានដំណោះស្រាយ ។
ជាមួយគ្នានេះ លោកបណ្ឌិត ឡៅ ម៉ុងហៃ ដែលតាមដានដំណើរការរបស់សាលាក្តីកូនកាត់មួយនេះ យ៉ាងជាប់លាប់មានប្រសាសន៍ថា ប្រសិនបើនៅតែមានការធ្វើពហិការនេះបន្តទៀត អាចធ្វើឲ្យការកាត់ទោសមេដឹកនាំក្នុងរបបខ្មែរក្រហម កាន់តែអូសបន្លាយពេលទៅ ខណៈដែលមេដឹកនាំទាំងនោះ កាន់តែចាស់និងមានជំងឺជាប់នឹងខ្លួន។ លោកបន្តថា មិនត្រឹមតែ ធ្វើឲ្យពេលវេលាកាន់តែអូសបន្លាយប៉ុណ្ណោះទេ តុលាការមួយនេះអាចនឹងលែងដំណើរការទៀតផង ។
សាលាក្តីខ្មែរក្រហម ដំណើរការ ដោយមានការបកប្រែសម្រួលជាបីភាសា គឺភាសាខ្មែរ អង់គ្លេស និងបារាំង ។
គម្រោងរបស់សាលាក្តីខ្មែរក្រហម បង្ហាញថា ចាប់ពីថ្ងៃទី០៤ ដល់ថ្ងៃទី០៧ ខែមីនានេះ អង្គជំនុំជម្រះនឹងស្តាប់សក្ខីកម្មរបស់លោក Phillip Short ដែលជាអ្នកសរសេរសៀវភៅប្រវត្តិសាស្ត្រ ទាក់ទងនឹងរបបកម្ពុជាប្រជាធិបតេយ្យ ។
គួរបញ្ជាក់ថា កាលពីខែមករាកន្លងទៅ បុគ្គលិកផ្នែកជាតិនៃសាលាក្តីកូនកាត់មួយនេះ ធ្លាប់គំរាមផ្អាកការងារម្តងរួចមកហើយ ប្រសិនបើពួកគេមិនទទួលបានប្រាក់ខែចាប់ពីខែធ្នូឆ្នាំ២០១២ ៕
No comments:
Post a Comment
yes