ក្រុមប្រជាពលរដ្ឋរស់នៅក្នុងឃុំចំនួនពីរ ក្នុងស្រុកភ្នំស្រួច ខេត្តកំពង់ស្ពឺ ជាង ៣០០គ្រួសារ បានប្រតិកម្មចំពោះក្រុមហ៊ុនមួយឈ្មោះ សុវណ្ណ និវត្តន៍ ថាបានប្រើគ្រឿងចក្រឈូសបំផ្លាញផ្ទះ និងដំណាំរបស់ពួកគាត់។ ប៉ុន្តែក្រុមហ៊ុនបានចោទវិញថា អ្នកភូមិធ្វើស្រែចម្ការរំលោភលើដីដែលក្រុមហ៊ុនមានអាជ្ញាប័ណ្ណត្រឹមត្រូវ។
ចំណែកអ្នកភូមិ បានឲ្យដឹងថា អ្នកវាស់ដីដែលអះអាងជាក្រុមនិស្សិតរបស់លោកនាយករដ្ឋមន្ត្រី ហ៊ុន សែន បានចុះមកវាស់វែងដីទំនាស់ចំនួន ៣ថ្ងៃជាប់គ្នាជាមួយភាគីក្រុមហ៊ុន តែពុំមានអាជ្ញាធរ និងមន្ត្រីស្ថាប័នពាក់ព័ន្ធចូលរួមឡើយ បញ្ហានេះបានធ្វើឲ្យពួកគាត់មានក្ដីបារម្ភខ្លាចមានការក្លែងបន្លំ។
តំណាងពលរដ្ឋក្នុងឃុំតាំងសំរោង និងឃុំក្រាំងដីវាយ ស្រុកភ្នំស្រួច នៅថ្ងៃទី៣០ មីនា បានប្រតិកម្មចំពោះក្រុមហ៊ុន សុវណ្ណ និវត្តន៍ ថាបានធ្វើសកម្មភាពដុតផ្ទះរបស់អ្នកភូមិ និងឈូសបំផ្លាញដំណាំរបស់ពួកគាត់ ដោយដាក់កម្លាំងទាហានយាមល្បាតប្រដាប់ដោយអាវុធ មិនឲ្យអ្នកភូមិចូលទៅជិតឡើយ។
ពលរដ្ឋរស់នៅភូមិខ្នងក្រាំង ឃុំតាំងសំរោង លោក ថោង សុវណ្ណ បានថ្លែងថា ប្រជាពលរដ្ឋកំពុងមានការងឿងឆ្ងល់យ៉ាងខ្លាំងចំពោះសកម្មភាពរបស់ក្រុមហ៊ុន។ លោកថា កាលពីថ្ងៃទី២៧ ដល់ថ្ងៃទី២៩ មានមនុស្សពីរបីនាក់ និងមន្ត្រីក្រុមហ៊ុន សុវណ្ណ និវត្តន៍ ដែលមានប្រធានក្រុមហ៊ុនឈ្មោះ លោក ស្លាត សាណាន បានមកចុះវាស់វែងដីធ្លីដែលកំពុងមានទំនាស់ អះអាងថា ជាក្រុមនិស្សិតរបស់លោកនាយករដ្ឋមន្ត្រី ហ៊ុន សែន ប៉ុន្តែពលរដ្ឋមានការសង្ស័យ ដោយសារពុំមានអាជ្ញាធរមូលដ្ឋាន និងមន្ត្រីជំនាញចូលរួមនោះទេ ហើយក្រុមនិស្សិតនោះបានធ្វើសកម្មភាពតាមតែបញ្ជារបស់ក្រុមហ៊ុន ដែលប្រជាពលរដ្ឋយល់ថាខុសប្រក្រតីពីក្រុមនិស្សិតដែលចុះធ្វើការនៅតំបន់ផ្សេងៗ។
ទាក់ទងបញ្ហានេះ មេឃុំតាំងសំរោង លោក គង់ សឿន មានប្រសាសន៍ថា ក្រុមនិស្សិតមិនអាចសម្រេចកិច្ចការបានទេ ដោយសារតែរវាងពលរដ្ឋ និងភាគីក្រុមហ៊ុន នៅមានភាពប្រទាញប្រទង់មិនទាន់រកចំណុចរួមនៅឡើយ។ លោកបញ្ជាក់ថា ក្រុមនិស្សិតដែលចុះវាស់វែងនោះ គឺជានិស្សិតប្រចាំនៅឃុំក្រាំងដីវាយ ប៉ុន្តែលោកមិនបានស្គាល់អត្តសញ្ញាណ ឬក្រុមទីប៉ុន្មាននោះឡើយ។
វិទ្យុអាស៊ីសេរី មិនអាចទាក់ទងប្រធានក្រុមហ៊ុន សុវណ្ណ និវត្តន៍ លោក ស្លាត សាណាន ដើម្បីបំភ្លឺចំពោះការអះអាងរបស់អ្នកភូមិបានទេ។ ឯមន្ត្រីមន្ទីររៀបចំដែនដី ខេត្តកំពង់ស្ពឺ ក៏មិនអាចស្វែងរក ដើម្បីបញ្ជាក់ជុំវិញការងឿងឆ្ងល់ពលរដ្ឋ ចំពោះក្រុមនិស្សិតស្ម័គ្រចិត្តនេះបានដែរ។
ប៉ុន្តែ អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក បេងហុង សុជាតិខេមរ៉ូ បានពន្យល់ថា តាមនីតិវិធីបទបញ្ជាលេខ០១ នោះ ការចុះវាស់វែងដី គឺត្រូវតែមានអាជ្ញាធរដែនដីជាម្ចាស់ផ្ទះចូលរួម។
ពលរដ្ឋ បានឲ្យដឹងថា អ្នកភូមិសរុបជាង ៣០០គ្រួសារ នៅក្នុងឃុំតាំងសំរោង និងឃុំក្រាំងដីវាយ ក្នុងស្រុកភ្នំស្រួច ខេត្តកំពង់ស្ពឺ បានបង្កបង្កើនផលតាំងពីឆ្នាំ១៩៩៥ បន្តបន្ទាប់រហូតដល់ឆ្នាំ២០០៦ លើដីចំណុចភូមិកោះកោង និងភូមិត្រពាំងកណ្ដោល ជាប់ព្រំប្រទល់ឃុំក្រាំងដីវាយ សរុបជាង ១ពាន់ហិកតារ។ នៅឆ្នាំ២០០៨ ក្រុមហ៊ុនស្លាត សាណាន ដែលគ្រប់គ្រងដោយលោក ស្លាត សាណាន បានមកឈូសឆាយប្រើអំពើហិង្សាលើប្រជាពលរដ្ឋ ដោយអះអាងថា ជាដីរបស់ក្រុមហ៊ុន បន្ទាប់មកក្រុមហ៊ុននេះបានដូរឈ្មោះ សុវណ្ណ និវត្តន៍ វិញ ប៉ុន្តែគ្រប់គ្រងដោយលោក ស្លាត សាណាន ដដែល។
ករណីនេះ អ្នកភូមិបានដាក់ពាក្យប្ដឹងទៅអាជ្ញាធរភូមិ ឃុំ ស្រុក ខេត្ត ក្រសួងកសិកម្ម ក្រសួងបរិស្ថាន និងក្រសួងយុត្តិធម៌ ដើម្បីស្វែងរកដំណោះស្រាយ ហើយកន្លងមក ប្រធានរដ្ឋសភា លោក ហេង សំរិន ធ្លាប់បានចេញលិខិតអន្តរាគមន៍មួយទៅក្រុមហ៊ុន ឲ្យផ្អាកសកម្មភាពរង់ចាំការដោះស្រាយ ប៉ុន្តែពុំមានលទ្ធផលឡើយរហូតមកដល់ពេលនេះ៕
No comments:
Post a Comment
yes