អ្នកភូមិ ឃួន ស៊ីថា ឲ្យដឹងកាលពីម្សិលមិញថា
អ្នកភូមិគ្រោងធ្វើដំណើរទៅស្នើសុំឲ្យលោកនាយករដ្ឋមន្ត្រីជួយ
លើករណីដែលក្រុមហ៊ុនលោកជៀម ផែន ថៅកែស្រាបៀរលីអូ
បានប្រើគ្រឿងចក្រឈូសឆាយផ្ទះរបស់ពលរដ្ឋ
ធ្វើឲ្យពលរដ្ឋគ្មានផ្ទះសម្បែងជ្រក ។ អ្នកស្រីនិយាយថា ៖« ខ្ញុំជជែកគ្នានឹងឡើងទៅសប្តាហ៍នេះ ទៅស្នើសុំឲ្យសម្តេច
ជួយរកយុត្តិធម៌ឲ្យកូនចៅសម្តេចផង»។
ការចរចា របស់អាជ្ញាធរ កាលពីថ្ងៃទី៨ មីនាកន្លងមក
ដើម្បីសម្របសម្រួល ផ្តល់គោលនយោបាយ របស់លោក ជៀម ផែន ដល់ក្រុមអ្នកភូមិ
នៅតែមិនបានជោគជ័យ ដោយអ្នកភូមិបដិសេធសំណងជាដី ២០ គុណ ៣០ ម៉ែត្រ
និងផ្ទះ ៥ គុណ ៦ ម៉ែត្រ និងថវិកាមួយចំនួន
ដោយសារអ្នកភូមិសម្រេចធ្វើការតទល់តាមផ្លូវច្បាប់។ អ្នកស្រី ស៊ីថា
ថ្លែងថា៖ «យើងមិនយកគោលការណ៍ជៀម ផែនទេ
យើងចង់យកដីភូមិ៣០ហិកតានិងចម្ការ ៣៥២ ហិកតា
ដែលគេឈូសឆាយព្រមទាំងឲ្យសងជំងឺចិត្តដែលគេបំផ្លាញផ្ទះនិង
ដំណាំរបស់យើង»។
ផ្ទះប្រជាពលរដ្ឋ ២១ គ្រួសារ នៅឃុំកែវផុស
ស្រុកស្ទឹងហាវ ត្រូវបានឈូសកម្ទេច កាលពីថ្ងៃទី៥ មីនា
ដោយកម្លាំងសមត្ថកិច្ចជាង ១០០ នាក់ មកចុះអនុវត្តសាលក្រមសាលាដំបូងខេត្ត
ចេញកាលពីខែមេសា ឆ្នាំ២០១២ ដែលកាត់ក្តីឲ្យលោក ជៀម ផែន
ប្រធានក្រុមហ៊ុនស្រាបៀរលីអូ ឈ្នះក្តី។ ការអនុវត្តសាលក្រមដោយធ្វើការឈូសកម្ទេចផ្ទះនេះ
ត្រូវបានពលរដ្ឋរងគ្រោះហៅថា ជាសកម្មភាពខុសច្បាប់ ខណៈដែលពួកគាត់
បានដាក់ពាក្យប្តឹងឧទ្ធរណ៍ ហើយសាលាឧទ្ធរណ៍
មិនទាន់ធ្វើការជំនុំជម្រះនៅឡើយ។
លោក ប៊ុន ណារិទ្ធ អ្នកសម្របសម្រួលអង្គការលីកាដូខេត្តព្រះសីហនុ
បានឲ្យដឹងថា ក្រុមអ្នកភូមិ ក៏បានទៅរកអង្គការរបស់លោក
ឲ្យជួយផ្តល់មេធាវីដល់ពួកគាត់ផងដែរ
ដើម្បីដាក់បណ្តឹងទៅតាមផ្លូវច្បាប់។ ចំពោះករណីឈូសឆាយ
និងការស្វះស្វែងប្តឹងផ្តល់ ទាមទារសំណងរបស់ពលរដ្ឋ លោក ប៊ុន ណារិទ្ធ បានថ្លែងថា៖
«ក្រសួងយុតិ្តធម៌ គួរតែធ្វើការសិក្សានូវករណីនេះ
គឺពិនិត្យនូវសាលក្រមបណ្តោះអាសន្នរបស់សាលាដំបូង»។
លោក នង ឌីណារ៉ា មេឃុំកែវផុស បានថ្លែងថា បញ្ហានេះ
បានចូលទៅដល់តុលាការហើយ លោកគ្មានសមត្ថភាពដោះស្រាយទេ៕
No comments:
Post a Comment
yes