កោះកុង៖ សេចក្តីរាយការណ៍មួយមកពីខេត្តកោះកុង បានឲ្យដឹងថា ក្នុងមួយយប់ៗមានទូក និងរថយន្តដឹកជញ្ជូនប្រេងគេចពន្ធរាប់ម៉ឺនប៊ីដុង ចេញពីសមុទ្រក្រៅ មកចែកចាយក្នុងទីរួមខេត្តកោះកុងយ៉ាងគគ្រឹកគគ្រេង។ សេចក្តីរាយការណ៍ខាងលើបានបន្តទៀតថា ឈ្មួញដ៏ធំរកស៊ីខុសច្បាប់នេះមានឈ្មោះ យឹម ផេង ហៅ(រស្មី) ជាប៉ូលីសពាក់ស័ក្ខិ៤ មានតួនាទីជានាយរងផ្នែកកណ្តាលយុត្តិធម៌ខេត្តកោះកុង។
យោងតាមប្រភពខាងលើបានបន្តឲ្យដឹងទៀតថា លោកស័ក្ខិ៤ យឹម ផេង (ហៅ រស្មី) បានធ្វើស្ថានីយលក់ប្រេងនៅតាមដងផ្លូវលេខ៤៨ ដែលយកឈ្មោះ "តេលា" មកធ្វើជាខែល តែតាមពិតនោះ ស្ថានីយ៍នេះគ្រាន់តែធ្វើសម្រាប់ស្តុកប្រេងគេចពន្ធតែប៉ុណ្ណោះ។
មន្ត្រីប៉ូលីសម្នាក់សូមមិនបញ្ចេញឈ្មោះបានខ្សឹបប្រាប់ថា លោក យឹម ផេង ក៏ជាមេឈ្មួញដឹកអីវ៉ាន់ចាប់ហ៊ួយ មកពីប្រទេសថៃយកមកចែកចាយនៅខេត្តកោះកុងទៀតផងដែរ។ អ្វីដែលមេឈ្មួញខាងលើនេះធ្វើពុំមាននរណាម្នាក់ហ៊ានរារាំងទេ ដោយសារតែមានការបើកដៃពីសំណាក់គយចល័តនៅលើផ្ទៃសមុទ្រឈ្មោះ ឱម ស៊ីនួន និងឈ្មោះ ម៉ៅ ទ័រ ព្រមទាំងគយនៅមាត់ច្រកបាក់ខ្លងឈ្មោះ សៅ រួមនិងសមត្ថកិច្ចមួយចំនួនទៀតផង។
ចំណែកសមត្ថកិច្ចមួយចំនួន សូមសំណូមពរទៅដល់អគ្គស្នងការនគរបាលជាតិ មេត្តាត្រួតពិនិត្យឈ្មោះ យឹម ផេង (ហៅ រស្មី) ដែលមានតួនាទីជាប៉ូលីសមករកស៊ីខុសច្បាប់រូបនេះផងទាន។ រីឯលោក ប៉ែន ស៊ីម៉ន មេគយស្រុកខ្មែរ ក៏ជួយមើលកូនចៅនៅច្រកបាក់ខ្លង និងគយចល័តឈ្មោះ ឱម ស៊ីនួន ផង កុំបណ្តែតបណ្តោយឲ្យធ្វើអំពើពុករលួយច្រើនពេក គួររកចំណូលចូលរដ្ឋខ្លះផង៕
No comments:
Post a Comment
yes