ជាការវិវត្តគួរឲ្យកត់សម្គាល់ពីសកម្មភាពសប្បុរសកាលពីសប្តាហ៍មុន ក្នុងនោះមានការផ្តល់ដីដល់ប្រជាជនដែលត្រូវបណ្តេញចេញក្នុង ខេត្តព្រះសីហនុ និងការបន្ថែមប្រាក់ ២ ដុល្លារអាមេរិកលើការដំឡើងប្រាក់ឈ្នួលអប្បបរមា លោកនាយករដ្ឋមន្រ្តីបានប្រើពិធីសម្ពោធស្ពាន បង្ហាញអំពីការដកថយ បើគ្មានបក្សប្រជាជនកម្ពុជា(CPP) កាន់អំណាចនោះ។
លោកនាយករដ្ឋ មន្រ្តី បានថ្លែងក្នុងសុន្ទរកថា ទៅកាន់អ្នកភូមិប្រហែល ១ម៉ឺននាក់នៅស្រុកកោះធំ ខេត្តកណ្តាលថា៖ «អ្នកមកហ៊ុន សែន ដើម្បីសុំជួយដោះស្រាយបញ្ហាទាក់ទងផ្សារ ស្ពាន ថ្នល់...។ ប៉ុន្តែ ពេលខែកក្កដាមកដល់អ្នកត្រូវជួយខ្ញុំ តែម្តងទេ។ ខ្ញុំសុំសន្លឹកឆ្នោតម្នាក់ៗមួយសំឡេងតែប៉ុណ្ណោះ»។
លោក ផៃ ស៊ីផាន អ្នកនាំពាក្យគណៈរដ្ឋមន្ត្រី បានឲ្យដឹងថា ការលើកឡើងរបស់លោកនាយករដ្ឋមន្រ្តីគ្មានអ្វីខុសពីធម្មតាទេ។
ចាប់អារម្មណ៍លើកាយវិការលោក ហ៊ុន សែន កាលពីសប្តាហ៍មុន លោក ឡៅ ម៉ុងហៃ អ្នកវិភាគឯករាជ្យថ្លែងថា៖«អ្នកនឹងគិតថាការទាក់ទាញរកសំឡេង គឺបន្ថយការមួម៉ៅនិងកំហឹង ដើម្បីបានការគាំទ្រពីអ្នកបោះឆ្នោត។ អ្នកនយោបាយចង់បង្ហាញថា ពួកគេកំពុងខ្វល់។
ក៏ដូចជាការធ្វើអន្តរាគមន៍ក្នុងបញ្ហា ប្រាក់ឈ្នួល និងការលុបចោលអនុក្រឹត្យដកយកដីក្នុងខេត្តព្រះសីហនុ ពីឧកញ៉ា ជៀម ផែន ដើម្បីសង្គ្រោះប្រជាជន ៤៩ គ្រួសារពីការផ្លាស់ទីលំនៅ លោក ហ៊ុន សែន ប្រកាសជាសាធារណៈពីសប្តាហ៍មុនថា លោកបានបញ្ឈប់តួនាទីលោក យាន ស៊ីណា អនុរដ្ឋលេខាធិការក្រសួងយុតិ្តធម៌ពីបទវាយដំអ្នកកាសែត។
លោក គល់ បញ្ញា នាយកអង្គការ ខុម ហ្វ្រែល ពុំបានចាត់ទុកការបញ្ឈប់តួនាទីលោក ស៊ីណា ជាយុទ្ធសាស្រ្តដើម្បីទាក់ទាញអ្នកបោះឆ្នោតទេ ប៉ុន្តែជឿថា សកម្មភាពវិស័យដីធ្លី និងបញ្ហាប្រាក់ឈ្នួល អាចទាក់ទាញខ្លាំងជាង។
លោកលើកឡើងថា៖«ខ្ញុំគិតថា ជាមួយនឹងប្រាក់ឈ្នួលអប្បបរមា វាជាកត្តាជំរុញការបោះឆ្នោត ក៏ដូចជាដីធ្លីផងដែរ»។
លោក បន្តថា៖ «ចាប់ពីខែមករា កាន់តែតឹងរ៉ឹងបន្តិចទៅៗ។ ក្នុងអំឡុងពេលនេះ រដ្ឋាភិបាលបានផ្តោតលើបញ្ហាសេដ្ឋកិច្ចថែមទៀត ប្រាក់ឈ្នួលអប្បបរមាជាបញ្ហាស្នូលផងដែរ ... តែមិនមែនវិស័យអប់រំ និងសុខាភិបាលទេ»។
ប៉ុន្មានខែខាងមុខនេះ លោក បញ្ញា គិតថាអំពើពុករលួយនឹងជាបញ្ហាដែលក្នុងយុទ្ធនាការ ហើយលោក ហ៊ុន សែន នឹងថ្លែងសារតាមទូរទស្សន៍ ទៅកាន់អ្នកបោះឆ្នោតជាយុវវ័យ។ លោកបន្ថែមថា៖ «ពេលនេះ គេនឹងតម្រង់រកយុវជន។ ពួកគេនឹងសម្លឹងមើលអ្នកបោះឆ្នោតទី១ ប៉ុន្តែ គណបក្សប្រជាជនកម្ពុជានឹងផ្តោតលើការបំពេញចិត្តអ្នកបោះឆ្នោត មិនមែនគោលនយោបាយទេ»។
ក្នុងសុន្ទរកថាកាលពីម្សិលមិញ លោក ហ៊ុន សែន ថ្លែងថា លោកនៅតែជឿថា គណបក្សប្រជាជនកម្ពុជាមានលទ្ធភាពរក្សាបានអាសនៈ២ភាគ៣នៅទូទាំងប្រទេស។ គណបក្សនេះកំពុងកាន់កាប់អាសនៈ៩០លើ១២៣ អាសនៈ គឺស្មើ ៧៣ ភាគរយ។
លោកសុន ឆ័យ តំណាងរាស្រ្តគណបក្ស សម រង្ស៊ី បានជឿថា គណបក្សប្រជាជនកម្ពុជាកំពុងរងសម្ពាធពីគណបក្សសង្គ្រោះជាតិកម្ពុជា ដែលជាហេតុធ្វើឲ្យ លោក ហ៊ុន សែន ចាប់ផ្តើមទាក់ទាញរកសំឡេងគាំទ្រនាប៉ុន្មានខែមុនការបោះឆ្នោត ៕
No comments:
Post a Comment
yes