ព្រឹត្តិការណ៍នៃការបង្ហាញពីប្រវត្តិសាស្ត្រខ្មែរនៅមុខប្រាសាទអង្គរវត្ត ខេត្តសៀមរាប
កាលពីពេលកន្លងមក
នៅប៉ុន្មានថ្ងៃទៀតនេះ ពិធីបុណ្យចូលឆ្នាំខ្មែរ ឆ្នាំថ្មីប្រពៃណីជាតិនឹងឈានចូលមកដល់ប្រជាពលរដ្ឋខ្មែរភាគច្រើនប្រាកដណាស់ថានឹងមានគម្រោងដើរកម្សាន្ត នៅទីរមណីយដ្ឋាននានា។ ដូច្នេះខេត្តសៀមរាបក្រៅពីជាទីរមណីយដ្ឋានប្រវត្តិសាស្ត្រ និងធម្មជាតិដ៏ស្រស់ស្អាតនោះ នៅក្នុងរយៈពេល៣ថ្ងៃនៃពិធីបុណ្យចូលឆ្នាំខ្មែរ ក៏មានរៀបចំព្រឹត្តិការណ៍ធំអស្ចារ្យមិនធ្លាប់មានសម្រាប់ស្វាគមន៍ឆ្នាំថ្មីគឺ «អង្គរសង្ក្រាន្ត»។
តើព្រឹត្តិការណ៍ «អង្គរសង្ក្រាន្ត» នៅ ខេត្តសៀមរាបនឹងមានអ្វីប្លែកសម្រាប់ថ្ងៃបុណ្យចូលឆ្នាំ?
ព្រឹត្តិការណ៍«អង្គរសង្ក្រាន្ត» ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរជាលើកដំបូងនេះត្រូវបានរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក)ដោយធ្វើការសហការជាមួយអាជ្ញាធរពាក់ព័ន្ធ។
កូនប្រុស លោកនាយករដ្ឋមន្ត្រី ហ៊ុន សែន លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលដឹកនាំយុវជន២០០០នាក់ឈរជើងរៀបចំព្រឹត្តិការណ៍នេះនៅខេត្តសៀមរាបបានឲ្យដឹងថា «អង្គរសង្ក្រាន្ត» ប្រារព្ធធ្វើឡើងក្នុងគោលបំណងជួបជុំយុវជន និងមហាជនដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ។ ផ្ដល់ឱកាសដល់យុវជនដើម្បីស្វែងយល់និងផ្សព្វផ្សាយអំពីវប្បធម៌ អរិយធម៌ខ្មែរដែលធ្លាប់រុងរឿងល្បីនាសម័យមហានគររហូតមកដល់បច្ចុប្បន្ន។ ដើម្បីលើកទឹកចិត្តដល់យុវជនជំនាន់ក្រោយឲ្យមានមោទនភាពក្នុងការថែរក្សានិងលើកស្ទួយវប្បធម៌ អរិយធម៌ប្រពៃណីជាតិខ្មែរ ដែលធ្លាប់បានប្រតិបត្តិពីជំនាន់មួយទៅជំនាន់មួយនិងដើម្បីទាក់ទាញភ្ញៀវទេសចរជាតិ និងអន្តរជាតិបន្ថែមទៀត ឲ្យមកទស្សនាខេត្តសៀមរាប និងព្រះរាជាណាចក្រអច្ឆរិយ។
លោក ហ៊ុន ម៉ានី បន្តថា នឹងមានរៀបចំពិធីក្រុងពាលីបួងសួងបើកព្រឹត្តិការណ៍នៅប្រាសាទអង្គរវត្តនិងប្រាសាទបាយ័ន។ ពិធីទទួលទេវតាឆ្នាំថ្មី នាពេលទៀបភ្លឺនៅខាងកើតប្រាសាទបាយ័ន។ ពិធីបង្សុកូលនិងពូនភ្នំខ្សាច់ក្នុងវត្តអារាមដែលស្ថិតក្នុងបរិវេណប្រាសាទអង្គរវត្ត និងពិធីស្រង់ព្រះមុខប្រាសាទបាយ័ន។
ក្រៅពីនោះលោក ហ៊ុន ម៉ានី បានឲ្យដឹងបន្តថា ក្នុងព្រឹត្តិការណ៍នោះនឹងមានផ្ទាំងទស្សនីយភាពដ៏អស្ចារ្យមិនធ្លាប់មានជាច្រើនរួមបញ្ចូនគ្នាទាំងប្រវត្តិសាស្ត្រ និងប្រពៃណីជាតិផ្សេងៗ។ លោកបានឲ្យដឹងថាក្នុងនោះយុវជនស្ម័គ្រចិត្តប្រមាណ២.០០០នាក់ នឹងរៀបចំកម្មវិធីកម្សាន្តនិងផ្សព្វផ្សាយល្បែងប្រពៃណី និងល្បែងប្រជាប្រិយដែលមានក្នុងទំនៀមទម្លាប់ប្រពៃណីខ្មែរ។
ទោះបីជាយ៉ាងណា លោកបានបញ្ជាក់ថា ថ្វីដ្បិតតែមិនហ៊ានអះអាងថានឹងទទួលបានការគាំទ្រប៉ុនណាដោយសារជាព្រឹត្តិការណ៍នេះជាលើកទី១និងឆ្នាំដំបូង ប៉ុន្តែលោកសង្ឃឹមថា នឹងមានការចូលរួមក្នុងព្រឹត្តិការណ៍យ៉ាងច្រើនកុះករ។
ខេត្ត សៀមរាបស្ថិតនៅភាគពាយព្យនៃប្រទេសកម្ពុជា មានព្រំប្រទល់ជាប់ខេត្តកំពង់ធំ បាត់ដំបង ព្រះវិហារ បន្ទាយមានជ័យ ឧត្ដរមានជ័យ និងបឹងទន្លេសាប។ ខេត្តសៀមរាបមានផ្ទៃក្រឡា១០២៩៩គីឡូម៉ែត្រការ៉េ មានចម្ងាយផ្លូវប្រមាណ៣១៤គីឡូម៉ែត្រពីភ្នំពេញ ធ្វើដំណើរឆ្លងកាត់តាមផ្លូវជាតិលេខ៦អា។ កន្លែងសំខាន់ដែលជាទិសដៅក្នុងថ្ងៃដើរលេងថ្ងៃចូលឆ្នាំខ្មែរនៅ ខេត្តសៀមរាបៈ
ប្រាសាទអង្គរវត្ត និងតំបន់អង្គរ
ប្រាសាទអង្គរវត្ត ជាស្នាដៃព្រះបាទសូរ្យវរ្ម័នទី២ និងត្រូវចុះបញ្ជីជាសម្បត្តិបេតិកភណ្ឌពិភពលោកនៅឆ្នាំ១៩៩២។ ស្នាដៃដ៏អស្ចារ្យគ្មានពីរនេះត្រូវបានប្រជាជនខ្មែរយើងគិតថាមិនមែនជាស្នាដៃរបស់មនុស្សធម្មតាឡើយ គឺជាស្នាដៃរបស់ព្រះពិស្ណុការ។ ប្រាសាទអង្គរវត្តត្រូវសាងសង់អស់រយៈពេល៣០ឆ្នាំមានកម្ពស់៦៥ម៉ែត្រ និងមានផ្ទៃក្រឡាជាង២០០ហិកតា។ ក្រៅពីនោះតំបន់អង្គរមានប្រាសាទបុរាណជាច្រើនទៀតសម្រាប់ជាទីទាក់ទាញភ្ញៀវទេសចរជាតិ និងអន្តរជាតិ។
បារាយណ៍ខាងលិច
តាមឯកសាររបស់អ្នកស្រី កែវ ច័ន្ទបូរណ៍ បានឲ្យដឹងថា បារាយណ៍ខាងលិច ជាបារាយណ៍ដ៏ធំជាងគេបង្អស់នៅតំបន់អង្គរ ជាទីទប់ទឹកសម្រាប់ឲ្យប្រជាកសិករខ្មែរស្រោចស្រពចម្ការដំណាំ។ បារាយណ៍នេះស្ថិតនៅភាគខាងលិចនៃរាជធានីអង្គរធំ មានទំហំ៨គីឡូម៉ែត្រ គុណនឹង ២,១គីឡូម៉ែត្រ កសាងឡើងនៅសតវត្សរ៍ ទី១១ក្នុងរជ្ជកាលព្រះបាទសូរ្យវរ្ម័នទី១ ហើយសាងសង់រួចរាល់ក្នុងរាជព្រះបាទឧទយាទិត្យវរ្ម័នទី២។ នៅកណ្ដាលផ្ទៃទឹកនៃបារាយណ៍ខាងលិចនេះមានទីទួលកោះមួយដែលមានសាងសង់ប្រាសាទមួយសម្រាប់បូជាដល់ព្រះវិស្ណុ ឈ្មោះប្រាសាទមេបុណ្យខាងលិច។
បារាយណ៍ខាងកើត គឺជាបារាយណ៍ធំជាងគេបំផុតទី២នៅតំបន់អង្គរ បន្ទាប់ពីបារាយណ៍ខាងលិច។ បារាយណ៍នេះស្ថិតនៅភាគខាងកើតរាជធានីអង្គរធំ កសាងឡើងនៅអំឡុងឆ្នាំ៩០០រជ្ជកាលព្រះបាទយសោវរ្ម័ន មានទំហំ ៧,១៥០ម៉ែត្រ គុណនឹង១,៧៤០ម៉ែត្រ អាចផ្ទុកទឹកបាន៥០លានម៉ែត្រគុប សម្រាប់ផ្គត់ផ្គង់ទឹកដល់ប្រជាកសិករធ្វើស្រែចម្ការ។ នៅចំកណ្ដាលបារាយណ៍មានកូនកោះមួយតំណាងឲ្យភ្នំព្រះសុមេរុដែលជាលំនៅឋានរបស់ព្រះវិស្ណុ គឺប្រាសាទមេបុណ្យខាងកើត។
ភ្នំគូលែន ស្ថិតនៅក្នុងស្រុកស្វាយលើ និងស្រុកវ៉ារិន មានចម្ងាយប្រមាណ៦០គីឡូម៉ែត្រពីទីក្រុងសៀមរាប។ ភ្នំនេះជារាជធានីដែលព្រះបាទជ័យវរ្ម័នទី២ ប្រារព្ធពិធីទេវរាជតម្កើងខ្លួនឲ្យស្មើអាទិទេព និងប្រកាសសករាជពីប្រទេសជ្វានៅឆ្នាំ៨០២នៃគ្រិស្តសករាជ។ ភ្នំនេះពីដើមមានឈ្មោះថា មហិន្ទ្របពត៌ មានទាំងប្រាសាទបុរាណ និងទឹកជ្រោះដ៏ស្រស់ស្អាតថែមទៀតផង។ នៅបាតស្ទឹងសៀមរាបលើកំពូលភ្នំនេះ មានឆ្លាក់សិវលិង្គ និងយោនីនាងឧមា ដែលគេហៅទីនោះថាជាតំបន់លិង្គមួយពាន់។ ក្រៅពីនោះមានរូបសំណាកព្រះពុទ្ធរូបមួយយ៉ាងធំដែលឆ្លាក់ឡើងនៅលើថ្មដា។
ភូមិវប្បធម៌ ស្ថិតក្នុងក្រុងសៀមរាបត្រូវបានសាងសង់ឡើងនៅពាក់កណ្ដាលឆ្នាំ ២០០១ ហើយបានបើកឲ្យមានការចូលទស្សនានៅថ្ងៃទី២៤ ខែកញ្ញា ឆ្នាំ២០០៣។
ភូមិវប្បធម៌នេះ រៀបចំឡើងនៅលើផ្ទៃដីប្រមាណ២១០ ០០០ម៉ែត្រការ៉េ មានភូមិចំនួន១២ ដែលបង្ហាញនូវប្រពៃណីទំនៀមទម្លាប់ខុសៗគ្នាទៅតាមវប្បធម៌នៃជនជាតិចំនួន១៩៕
No comments:
Post a Comment
yes