ប្រជាពលរដ្ឋក្រីក្រក្នុងសហគមន៍ភូមិអណ្ដូង គោករកា
ពលរដ្ឋក្រីក្រក្នុងសហគមន៍ភូមិអណ្ដូងមួយចំនួនបានបង្ហាញកង្វល់អំពី ការបាត់បង់ទីជម្រក ខណៈអាជ្ញាធរមានផែនការធ្វើផ្លូវមួយខ្សែទៀតចូលទៅកាន់ភូមិនេះ។
អ្នកស្រី កែវ ពុធណា ដែលមានកូន៦នាក់ ក្នុងបន្ទុករស់នៅក្នុងផ្ទះឈើប្រក់ស័ង្កសីតូចមួយបានប្រាប់ភ្នំពេញ ប៉ុស្តិ៍ថា អាជ្ញាធរបានប្រាប់ឲ្យពួកគាត់ជាង២០គ្រួសាររុះរើផ្ទះជាបណ្ដោះ អាសន្នដើម្បីយកដីនោះធ្វើផ្លូវនិងគ្រោងសង់ផ្ទះថ្មលក់បង់រំលស់ ជូនពួកគាត់ក្នុងតម្លៃជាង១ពាន់ដុល្លារ។
អ្នកស្រីបានថ្លែងថា៖ «ថ្វីដ្បិតតែរដ្ឋតម្រូវឲ្យយើងបង់រំលស់ក្នុងមួយខែ១០ដុល្លារ ប៉ុន្តែ ខ្ញុំបារម្ភខ្លាំងណាស់ ព្រោះពួកយើងក្រីក្ររក១ថ្ងៃសម្រាប់១ថ្ងៃ តើនឹងមានលុយឯណាបង់រំលស់នោះ»។
អ្នកស្រី យ៉ង់ សុភ័ណ្ឌ បានបង្ហាញពីកង្វល់ថា អាជ្ញាធរអាចនឹងបណ្ដេញពួកគាត់ចេញពីផ្ទះថ្មី ដែលគេគ្រោងសង់លក់ឲ្យពួកគាត់ក្នុងតម្លៃថោកនោះ បើពួកគាត់មិនមានលទ្ធភាពក្នុងការបង់រំលស់តាមកាលកំណត់នោះ។
អ្នកស្រីបារម្ភខ្លាចថា ក្រោយពីផ្ទះថ្មីសង់រួចហើយ អាជ្ញាធរមិនឲ្យពួកគាត់នៅ បែរជាឲ្យអ្នកមកពីតំបន់ក្រៅដែលគេមានលុយបង់នៅជំនួសទៅវិញ។
ប៉ុន្តែ លោក អ៊ុង ងួន តំណាងប្រជាសហគមន៍នេះឲ្យដឹងថា ពីបីថ្ងៃមុនពលរដ្ឋជាង២០គ្រួសារ បានផ្ដិតមេដៃឯកភាពរុះរើផ្ទះ បើកផ្លូវឲ្យអាជ្ញាធរសង់ផ្លូវបេតុង និងអគារផ្ទះថ្មទៅតាមស្តង់ដាររបស់អង្គការ ភីស៊ីអិល។
លោកបន្តថា៖«ពួកគេបានរុះរើផ្ទះរួចហើយ ដោយបានទៅសង់នៅលើដីអ្នកភូមិចាស់ស្នាក់នៅជាបណ្ដោះ អាសន្នដើម្បីរង់ចាំចូលនៅផ្ទះថ្មី ខណៈពលរដ្ឋមួយចំនួនបានបដិសេធការរុះរើ ព្រោះខ្លាចអាជ្ញាធរមិនផ្ដល់ផ្ទះថ្មីឲ្យជាថ្នូរ»។
ចៅសង្កាត់គោករកា លោក ភី ណុប ថ្លែងថា៖«អ្នកភូមិហាក់មានក្ដីបារម្ភជ្រុលពេក ពួកគេគួរតែរីករាយចំពោះគម្រោងអភិវឌ្ឍន៍របស់សាលារាជធានីភ្នំពេញនិងអង្គការភីស៊ីអិល»។
កាលពីថ្ងៃទី៦ ខែមិថុនា ឆ្នាំ២០០៦ ពលរដ្ឋក្នុងភូមិសម្បុកចាប សង្កាត់ទន្លេបាសាក់ ខណ្ឌចំការមន ប្រមាណជាង១៥០០គ្រួសារ ត្រូវអាជ្ញាធរជម្លៀសចេញដោយបង្ខំឲ្យទៅនៅភូមិអណ្ដូង លើផ្ទៃដីប្រមាណ២ហិកតា ទាំងកង្វះហេដ្ឋារចនាសម្ព័ន្ធ។
តែយ៉ាងណា សាលារាជធានីបានខិតខំស្វែងរកដៃគូអភិវឌ្ឍន៍តំបន់នេះ ក្រោយមកអង្គការភីស៊ីអិល បានចូលរួមក្នុងគម្រោងសង់ផ្ទះបង់រំលស់នេះនិងកំពុងដំណើរការល្អក្រោមទឹកប្រាក់ចំណាយជាងបីលានដុល្លារ។
សមិទ្ធផលថ្មីជាច្រើនបានកើតឡើងជាបន្តបន្ទាប់ រាប់ចាប់ពីផ្សារទំនើប ផ្លូវបេតុង ប្រព័ន្ធទឹកភ្លើង និងបណ្ដាញលូទឹកនិងអគារផ្ទះថ្ម៤មx៦ម ចំនួន២៣៥ខ្នង បានសង់ផ្ដល់ជូនពលរដ្ឋចំនួន២៣៥គ្រួសាររួចហើយ និងកំពុងបន្តគម្រោងតាមដំណាក់ៗ៕
No comments:
Post a Comment
yes