ចម្ការកៅស៊ូដែលក្រុមហ៊ុន ទទួលសិទ្ធិវិនិយោគបានពីក្រុមហ៊ុនរដ្ឋ
ពលរដ្ឋប្រមាណ១០០នាក់ រស់នៅស្រុកមេមត់ បានធ្វើដំណើរមកកាន់សាលាខេត្តក្នុងបំណងធ្វើការតវ៉ាពីការ សុំកម្មសិទ្ធិស្របច្បាប់រស់នៅលើដីចម្ការកៅស៊ូមេមត់ ដែលរស់នៅជាង៣០ឆ្នាំ ក្រោយពីមានលិខិតប្រគល់ដីជូនពួកគាត់ពីក្រសួង។
ប៉ុន្តែរថយន្ត ដែលចេញមកពីម្សិលមិញ ត្រូវនគរបាលស្ទាក់មិនឲ្យមកដល់សាលាខេត្តកំពង់ចាម ទេ និងបង្វែរឲ្យទៅដោះស្រាយនៅសាលាស្រុកមេមត់វិញ។
លោកស្រី អ៊ុន ស៊ូចេង អាយុ៥២ឆ្នាំ ឲ្យដឹងថា ពលរដ្ឋតំណាងឲ្យ២២៥គ្រួសារ ព្រមទៅជួបអភិបាលស្រុកមេមត់ សុំការដោះស្រាយ។ ក្នុងនោះ មានអ្នកខ្លះជាគ្រួសារកម្មករចម្ការកៅស៊ូមេមត់រដ្ឋតាំងពីដើមមក កំពុងរស់នៅលើដីលំនៅឋានក្នុងភូមិខ្នងក្រពើខាងលិច ឃុំទ្រមូង បានធ្វើការតវ៉ាតាំងពីឆ្នាំ២០០៨ មក ពេលរដ្ឋាភិបាលកាត់យកដីចម្ការកៅស៊ូប្រមាណជាង៩ពាន់ ហិកតា ធ្វើសម្បទានវិនិយោគដល់ក្រុមហ៊ុនចម្ការកៅស៊ូមេមត់ខូអិលធីឌី រួចតម្រូវឲ្យកម្មករទាំងអស់រើលំនៅឋាន យកដីឲ្យក្រុមហ៊ុន។
ក្នុងខែតុលា ឆ្នាំ២០១២ ខាងក្រសួងកសិកម្ម បានកាត់ដីដែលពលរដ្ឋធ្លាប់នៅ ចេញពីក្រុមហ៊ុន ប្រគល់ដីជូនពលរដ្ឋវិញ ប៉ុន្តែមកទល់ពេលនេះពុំមានចំណាត់ការជាសញ្ញាថា ពលរដ្ឋនឹងទទួលបានប័ណ្ណកម្មសិទ្ធិឡើយ ហើយពលរដ្ឋរងការគំរាមមិនឲ្យជួសជុលផ្ទះនៅ ពីក្រុមហ៊ុនរហូត តែមិនមែនពីអាជ្ញាធរឡើយ។
លោកស្រីថា៖ «លិខិតក្រសួងរបស់ឯកឧត្តម ច័ន្ទ សារុន គឺឲ្យបង្កើតគណៈកម្មការមានសមាជិក២១រូប ធ្វើបច្ចុប្បន្នភាពលើផ្ទៃដីពលរដ្ឋកំពុងរស់នៅនិងកាន់កាប់លើដី ចម្ការកៅស៊ូរដ្ឋទាំង៧ ក្នុងនោះ មានចម្ការកៅស៊ូមេមត់មួយដែរ ដើម្បីកាត់ចេញពីទ្រព្យសម្បតិ្តរដ្ឋ ផ្តល់ជូនពលរដ្ឋកាន់កាប់ជាកម្មសិទ្ធិស្របច្បាប់»។
លោកស្រីថា ដីលំនៅឋានពលរដ្ឋក្នុងចម្ការកៅស៊ូមេមត់សព្វថ្ងៃមាន១២ហិកតា មានប្រមាណ៤០០គ្រួសារ តែគ្រួសារខ្លះព្រមចាកចេញទៅទទួលយកគោលនយោបាយរបស់ក្រុមហ៊ុនដែល ផ្តល់ផ្ទះឲ្យ ៤គុណ១០ម៉ែត្រ និងដី២០គុណ៣០ម៉ែត្រ។
ប៉ុន្តែ ដោយអ្នកភូមិបារម្ភចំពោះការមិនទទួលបានកម្មសិទិ្ធ ទើបចេះតែតវ៉ា ព្រោះក្រុមហ៊ុនតែងតែគំរាមមិនឲ្យពលរដ្ឋសង់ផ្ទះឬជួសជុលផ្ទះ ឡើយ។ លោកស្រីថា៖ «ផ្ទះឈើខ្ញុំ មិនអាចជួសជុលការធ្លុះធ្លាយបានឡើយ ព្រោះក្រុមហ៊ុនហាម ដូច្នេះយើងទ្រាំរស់នៅ ហើយពេលមានភ្លៀងខ្យល់ ក៏នាំគ្រួសារទៅជ្រកក្រោមផ្ទះគេ»។
លោក ចាន់ សុភី អភិបាលរងស្រុកមេមត់ កាលពីម្សិលមិញបានឲ្យដឹងថា អាជ្ញាធរស្រុកបានទទួលជួបតំណាងពលរដ្ឋបួនរូប និងបានសម្រេចថា នឹងបង្កើតគណៈកម្មការចុះធ្វើអត្តសញ្ញាណកម្មក្បាលដីនៅក្រោយចូល ឆ្នាំ។
លោកបន្តថា៖«ការចុះធ្វើអត្តសញ្ញាណកម្ម គឺមានន័យថា ចុះស្រង់ស្ថិតិពលរដ្ឋរស់នៅប៉ុន្មានគ្រួសារ ផ្ទៃដីប៉ុន្មានការ៉េ យើងឲ្យគាត់បំពេញទម្រង់បែបបទ»។
ទាក់ទិននឹងការចោទប្រកាន់ថា ក្រុមហ៊ុនហាមមិនឲ្យជួសជុលផ្ទះ លោកអភិបាលរងស្រុកបញ្ជាក់ថា៖«ខាងខ្ញុំនិងខាងខេត្ត ក៏មិនមានសិទ្ធិអារកាត់ឡើយ ព្រោះដីនេះរដ្ឋធ្លាប់ធ្វើអវិនិយោគ(ក្រុមហ៊ុនយកអភិវឌ្ឍន៍លើអ្វី ដែលមានស្រាប់) ឯការដោះស្រាយក៏ផុតពីដៃអាជ្ញាធរមូលដ្ឋានដែរ»។
លោកមាន ប្រសាសន៍ថា នៅពេលក្រុមហ៊ុនទទួលសិទ្ធិអភិវឌ្ឍន៍ពីរដ្ឋ តួលេខពលរដ្ឋនៅតំបន់ចម្ការកៅស៊ូមេមត់មានចំនួនប្រមាណ ១.២០០គ្រួសារ តែមួយចំនួនធំគឺ១.១០០គ្រួសារបានចាកចេញពីទីនោះ ហើយទៅទទួលគោលនយោបាយពីក្រុមហ៊ុន ដូច្នេះនៅសល់ប្រមាណ៩០គ្រួសារប៉ុណ្ណោះមិនព្រមចេញ។
តំណាងក្រុមហ៊ុនចម្ការកៅស៊ូមេមត់ មិនអាចទាក់ទងបានទេកាលពីម្សិលមិញ៕
No comments:
Post a Comment
yes