តំណាងពលរដ្ឋនៅភូមិឆ្នែង ស្រុកកែវសីមា ខេត្តមណ្ឌលគិរី ដាក់ពាក្យប្ដឹងរកយុត្តិធម៌នៅ
ការិយាល័យសមាគមអាដហុក ខេត្តរតនគិរី កាលពីថ្ងៃ៤ ខែមេសា ឆ្នាំ២០១៣ បន្ទាប់ពី
ក្រុមហ៊ុនសុវណ្ណរាជសី បានឈូសឆាយដំណាំ និងរំលោភយកដីចម្ការពូកគាត់
ប្រមុខរាជរដ្ឋាភិបាល លោក ហ៊ុន សែន បានដាក់ចេញគោលនយោបាយចាស់សកម្មភាពថ្មី ពោលគឺវាស់វែងកាត់ដី និងចេញប័ណ្ណកម្មសិទ្ធិជូនប្រជាពលរដ្ឋណាដែលមានដីកាន់កាប់ជាក់ស្ដែងក្នុងបរិវេណដីក្រុមហ៊ុនសម្បទានសេដ្ឋកិច្ច ដើម្បីកាត់បន្ថយជម្លោះដីធ្លី បើទោះបីដីនោះប្រជាពលរដ្ឋកាប់រានព្រៃឈើខុសច្បាប់យ៉ាងណាក្ដី។ ប៉ុន្តែអ្នកឃ្លាំមើលបញ្ហាដីធ្លីអង្គការក្រៅរដ្ឋាភិបាលកត់សំគាល់ថា គោលនយោបាយនេះធ្វើឲ្យមានជម្លោះដីធ្លីថ្មីកើតមានបន្ថែមទៀត។
ប្រជាពលរដ្ឋ ៣៧គ្រួសារ រស់នៅភូមិឆ្នែង ឃុំស្រែខ្ទុំ ស្រុកកែវសីមា ខេត្តមណ្ឌលគិរី ចោទប្រកាន់ក្រុមហ៊ុនសម្បទានសុវណ្ណរាជសី ថាបានឈូសឆាយផលដំណាំ និងរំលោភយកដីអ្នកភូមិផ្ទុយទៅនឹងគោលនយោបាយចេញប័ណ្ណកម្មសិទ្ធិជូនប្រជាពលរដ្ឋអ្នកកាន់កាប់ដីជាក់ស្ដែងនៅក្នុងបរិវេណដីក្រុមហ៊ុនសម្បទានសេដ្ឋកិច្ច។
តំណាងអ្នកភូមិ អ្នកស្រី ឆាត់ ស នៅថ្ងៃច័ន្ទ ទី៨ ខែមេសា ឆ្នាំ២០១៣ មានប្រសាសន៍បញ្ជាក់ថា ដីអ្នកភូមិប្រមាណ ១០០ហិកតារ ក្នុងនោះមានដំណាំកៅស៊ូ និងដំឡូងប្រមាណ ៦០ហិកតារ និងដីទំនេរប្រមាណ ៤០ហិកតារ ត្រូវក្រុមហ៊ុនឈូសឆាយយកចាប់តាំងពីខែកុម្ភៈ ឆ្នាំ២០១៣ រហូតមក។
អ្នកស្រីបន្តថា នេះគឺជាការរំលោភសិទ្ធិរស់នៅពលរដ្ឋ និងធ្វើផ្ទុយទៅនឹងគោលនយោបាយកាត់បន្ថយជម្លោះដីធ្លីរបស់រាជរដ្ឋាភិបាល៖ «ដីហ្នឹងខ្លះកាន់កាប់តាំងពី ២០០៥, ២០០៧, ២០០៨។ក្រុមហ៊ុនហ្នឹងឈូសយកទាំងអស់ហ្នឹងឯង ទាំង ៣៧គ្រួសារដែលដាក់ពាក្យបណ្ដឹងទៅហ្នឹង។ គេដឹកដំឡូងទៅដាំផង អ៊ីចឹងបានពួកខ្ញុំចេះតែប្រឹងទៅ»។
នៅថ្ងៃច័ន្ទ ទី៨ ខែមេសា ឆ្នាំ២០១៣ តំណាងប្រជាពលរដ្ឋភូមិឆ្នែង បាននាំយកពាក្យបណ្ដឹងមានស្នាមមេដៃប្រជាពលរដ្ឋ ៣៧គ្រួសារដាក់ជូនអាជ្ញាធរស្រុក អាជ្ញាធរខេត្ត មន្ទីរជំនាញរៀបចំដែនដីនគរូបនីយកម្ម និងសំណង់ខេត្ត និងសមាគមការពារសិទ្ធិមនុស្សអាដហុក (ADHOC) ខេត្តសុំជួយអន្តរាគមន៍ផ្ដល់យុត្តិធម៌ដល់អ្នកភូមិ។
វិទ្យុអាស៊ីសេរី នៅថ្ងៃច័ន្ទ ទី៨ ខែមេសា មិនអាចទាក់ទងតំណាងក្រុមហ៊ុនសុវណ្ណរាជសី សុំបំភ្លឺសេចក្ដីចោទប្រកាន់នេះបានទេ។
អភិបាលស្រុកកែវសីមា លោក ស៊ិន វណ្ណវុឌ្ឍ មានប្រសាសន៍បញ្ជាក់ថា អាជ្ញាធរស្រុកបានទទួលពាក្យបណ្ដឹងពីពលរដ្ឋហើយ។ លោកបន្តថា អាជ្ញាធរស្រុក និងស្ថាប័នពាក់ព័ន្ធគ្រោងចុះពិនិត្យករណីនេះនៅសប្ដាហ៍នេះហើយ៖ «យើងបានជជែកពិភាក្សាគ្នាថា យើងនឹងជួបទាំងសហគមន៍ ទាំងក្រុមការងារដែលគេចុះវាស់វែងដីធ្លីនោះហើយ និងជាមួយអាជ្ញាធរឃុំស្រុក ដើម្បីគួបគ្នាដោះស្រាយ។អាជ្ញាធរយើងក៏មិនបានដឹងថា គាត់ដាំដុះដែរ ព្រោះនិស្សិតភូមិឆ្នែង ហ្នឹង គឺគេចុះវាស់វែងអស់ហើយ»។
អ្នកសម្របសម្រួលសមាគមអាដហុក ខេត្តមណ្ឌលគិរី លោក សុក រដ្ឋា មានប្រសាសន៍បញ្ជាក់ថា ការអង្កេតបឋមរបស់លោកឃើញថា ប្រជាពលរដ្ឋ ៣៧គ្រួសារបានចូលទៅរស់នៅ និងកាន់កាប់ដីតំបន់នោះមុនបទបញ្ជា ០០១ ឬគោលនយោបាយចាស់សកម្មភាពថ្មីរបស់រាជរដ្ឋាភិបាល។ ហេតុនេះក្រុមការងារវាស់វែងដី និងក្រុមនិស្សិតស្ម័គ្រចិត្តរបស់រាជរដ្ឋាភិបាល ត្រូវវាស់វែងកាត់ដីជូនប្រជាពលរដ្ឋដែលបានកាន់កាប់ដីនេះជាក់ស្ដែង។
លោកបន្តថា សកម្មភាពរំលោភឈូសឆាយផលដំណាំប្រជាពលរដ្ឋដោយភាគីក្រុមហ៊ុន គឺជាអំពើរំលោភច្បាប់ សិទ្ធិមនុស្ស និងជាពិសេសរំលោភទៅលើគោលនយោបាយកាត់បន្ថយជម្លោះដីធ្លីរបស់រាជរដ្ឋាភិបាល៖ «ដំបូងដែលគាត់ដាំដំណាំអ្វី គឺអត់មានការហាមឃាត់ពីអាជ្ញាធរអ្វីទេ ក្រោយមកបែរជាក្រុមហ៊ុនបំពានឈូសឆាយទៅវិញ។ ហ្នឹងបានន័យថា ខុសច្បាប់»។
ទាក់ទិនករណីនេះ តំណាងអ្នកភូមិ អ្នកស្រី ឆាត់ ស មានប្រសាសន៍បញ្ជាក់ថា អ្នកភូមិទាមទារឲ្យក្រុមហ៊ុនប្រគល់ដីមកអ្នកភូមិវិញ និងទទួលខុសត្រូវផ្ដល់សំណងផលដំណាំពួកគាត់ដែលក្រុមហ៊ុនបានឈូសឆាយបំផ្លាញ៕
No comments:
Post a Comment
yes