តំណាងសហគមន៍ភូមិគ្លឹ ឃុំស៊ឺង ស្រុកបរកែវ ខេត្តរតនគិរី ដាក់ពាក្យប្ដឹងមេឃុំពីបទលក់ដី
សាលាឃុំ នាការិយាល័យសមាគមអាដហុក (Adhoc) កាលពីថ្ងៃទី៨ ខែមេសា ឆ្នាំ២០១៣
អ្នកភូមិ ៥០នាក់ រស់នៅភូមិគ្លឹ ឃុំស៊ឺង បានបន្តដាក់ពាក្យប្ដឹងមេឃុំរបស់ខ្លួនទៅអង្គភាពប្រឆាំងអំពើពុករលួយជាថ្មីទៀត ដើម្បីសុំឲ្យស្ថាប័ននេះស៊ើបអង្កេតទៅលើអំពើពុករលួយ លួចលក់ដីរដ្ឋបាលសាលាឃុំ។
កាលពីថ្ងៃច័ន្ទ ទី៨ ខែមេសា ឆ្នាំ២០១៣ តំណាងអ្នកភូមិមានគ្នា ៤នាក់ បានមកកាន់ការិយាល័យសមាគមអាដហុក (Adhoc) សុំជួយអន្តរាគមន៍ពាក្យប្ដឹងរបស់អ្នកភូមិ បញ្ជូនទៅកាន់អង្គភាពប្រឆាំងអំពើពុករលួយ។
តំណាងអ្នកភូមិ លោក រម៉ាស ទៀង មានប្រសាសន៍បញ្ជាក់ថា អ្នកភូមិបានដាក់ពាក្យប្ដឹងទៅមន្ត្រីស្ថាប័នអយ្យការតុលាការខេត្តប្រមាណមួយខែហើយ មិនទាន់ឃើញមានចំណាត់ការ។ ចំណែកអ្នកទិញដី និងមន្ត្រីឃុំ បានប្រើនគរបាលគំរាមចាប់អ្នកភូមិ ខណៈពេលអ្នកភូមិបានតវ៉ាសុំឲ្យអ្នកទិញដីផ្អាកសាងសង់ផ្ទះ រង់ចាំមន្ត្រីអយ្យការចាត់ការរឿងនេះ។
លោកបន្តថា ដីដែលមេឃុំកាត់លក់នោះ គឺជាដីភូមិចាស់របស់អ្នកភូមិជនជាតិដើមភាគតិច បានប្រគល់ជូនមន្ត្រីឃុំប្រើប្រាស់ជាប្រយោជន៍សាធារណៈ មិនមែនសម្រាប់លក់យកជាប្រយោជន៍ផ្ទាល់ខ្លួននោះទេ៖ «ទៅតុលាការហ្នឹង យើងរង់ចាំបានកន្លះខែហើយ អត់ឃើញ អត់ឮដំណឹងអ្វីតិចសោះ។ សហគមន៍គាត់ប្រជុំគ្នា គាត់អត់សុខចិត្ត»។
មេឃុំស៊ឺង លោក រមាម ថាំង កន្លងទៅនេះបានទទួលស្គាល់ថា លោកពិតជាបានលក់ដីមួយចំណែកដែលសល់ពីដីចុះបញ្ជីសារពើភ័ណ្ឌសាលាឃុំមែន ក៏ប៉ុន្តែប្រាក់ដែលបានពីលក់ដីនោះ លោកថាយកទៅទិញសម្ភារៈជួសជុលសាលាឃុំ។ លោកមានប្រសាសន៍បញ្ជាក់បន្ថែមថា អ្នកភូមិបាននាំគ្នាទៅបោះបង្គោលចូលបរិវេណដីប៉ុស្តិ៍នគរបាល និងដីសាលាឃុំ ទើបប៉ូលិសគំរាមចាប់ខ្លួននោះ៖ «កាលលក់ហ្នឹង ទាំងស្រុកដែរ គេថាទុកកសាងសាលាឃុំទៅ ពួកហ្នឹងចេះតែរករឿង។ មេប៉ុស្តិ៍គេឃាត់ ដោយសារគេបោះបង្គោលចូលដីប៉ុស្តិ៍ គេមកព័ទ្ធសាលាឃុំនៅសល់តែ ១០ម៉ែត្រ ពីជើងសសរសាលាឃុំហ្នឹង»។
យោងពាក្យបណ្ដឹងរបស់អ្នកភូមិ ដីភូមិចាស់របស់ពួកគាត់មានទំហំ ១ហិកតារកន្លះ បានប្រគល់ជូនមន្ត្រីឃុំ កាលពីឆ្នាំ២០០៦ ក៏ប៉ុន្តែដីនោះមួយផ្នែក មន្ត្រីឃុំបានកាត់ចែកទៅឲ្យសង្កាត់រដ្ឋបាលព្រៃឈើ និងប៉ុស្តិ៍នគរបាលរដ្ឋបាល ដើម្បីធ្វើការិយាល័យ។ ហើយនៅចុងក្រោយ មេឃុំបានកាត់ដីទំហំជិត ៤ពាន់ម៉ែត្រក្រឡា លក់តម្លៃប្រមាណ ១ម៉ឺនដុល្លារ។
មន្ត្រីសម្របសម្រួលសមាគមអាដហុក ខេត្តរតនគិរី លោក ឆាយ ធី មានប្រសាសន៍បញ្ជាក់ថា នៅថ្ងៃអង្គារ ទី៩ ខែមេសា ឆ្នាំ២០១៣ លោកបានអន្តរាគមន៍បញ្ជូនពាក្យបណ្ដឹងអ្នកភូមិទៅអង្គភាពប្រឆាំងអំពើពុករលួយរួចហើយ។ លោកអំពាវនាវសុំឲ្យមន្ត្រីអង្គភាពប្រឆាំងអំពើពុករលួយ ស៊ើបអង្កេត និងចាត់ការផ្លូវច្បាប់ក្នុងករណីនេះ ពីព្រោះជាជម្រើសចុងក្រោយហើយដែលអ្នកភូមិសម្រេចនាំគ្នាប្ដឹងសុំកិច្ចអន្តរាគមន៍ពីស្ថាប័នថ្នាក់ជាតិនេះ៖«អ្នកភូមិហ្នឹង គាត់អស់ជំនឿទៅលើស្ថាប័នពាក់ព័ន្ធក្នុងខេត្ត តុលាការដែរ ដែលបានប្ដឹងហើយមិនមានការដោះស្រាយជូនគាត់។ អ៊ីចឹងហើយ គាត់គិតថា រឿងនេះគាត់ត្រូវបញ្ជូនបណ្ដឹងគាត់សាជាថ្មី»។
ទាក់ទិនករណីនេះដែរ ព្រះរាជអាជ្ញារងអមតុលាការខេត្តរតនគិរី លោក ជា សុភ័ក្រ មានប្រសាសន៍បញ្ជាក់ថា លោកបានទទួលពាក្យបណ្ដឹងរបស់អ្នកភូមិហើយ។ លោកបន្តថា នៅក្រោយបុណ្យចូលឆ្នាំខ្មែរចប់ លោកនឹងចាត់ការរឿងក្តីនេះ៕
No comments:
Post a Comment
yes